“Хуҷанд” -Чемпиони Тоҷикистон!

04 Декабр 2017

Дар Варзишгоҳи марказии шаҳри Душанбе бозии финали Ҷоми Тоҷикистон байни бошгоҳҳои “Истиқлол”-и Душанбе ва “Хуҷанд”-и Хуҷанд баргузор шуд. Бозӣ байни тимҳо хеле ҷолибу диданӣ сурат гирифта, дар дақиқаи 41-уми дидор сарвони тими “Хуҷанд” Манучеҳр Ахмедов бо як усули зебо ҳисобро боз намуд. Дар қисми дуюми бозӣ аниқтараш дар дақиқаи 56-уми дидор Ҳикматулло Расулов шумораи голҳои дастаашро дучанд намуд. Футболбозони дастаи “Истиқлол” ҳарчанд кӯшишу талош намуданд, ки дарвозаи меҳмононро рахна кунанд, аммо ҳамааш бе фоида буд, чун ки хати дифоъи меҳмонон хеле қавӣ буд. Бо ҳамин бозӣ байни тимҳо бо ҳисоби 2:0 ба фоидаи бошгоҳи “Хуҷанд”-и шаҳри Хуҷанд хотима ёфт. Ёдовар мешавем, ки “Хуҷанд” маротибаи чаҳорум барандаи Ҷоми Тоҷикистон шуд. Қаблан даста дар солҳои 1997/1998, 2002 ва 2008 ба гирифтани ин ҷоиза даст ёфта буд.

Аз хушунат даст кашем

04 Декабр 2017

Дар толори Мақомоти иҷроияи ҳокимияти давлатии шаҳри Хуҷанд дар чаҳорчӯбаи «16 рӯзи мубориза алайҳи хушунат» мулоқоти фаъолзанон, роҳбарияти ташкилоти ҷамъиятии «Гулрухсор» бо мудирони шуъба ва воҳидҳои сохтории МИҲД-и шаҳр сурат гирифт.
Муяссар Сангинова, мудири шуъбаи кор бо занон ва оилаи шаҳр ҳадафи мулоқотро дар самти баланд бардоштани маърифати мардон нисбат ба занон, пешгирии хушунати хоноводагӣ, ташаккул додани муносибати эҳтиромона дар ҷамъият ва мушарраф гардидан ба баробарии гендерӣ, решакан намудани ақидаҳои хурофотӣ ва қолабҳои шахшудаи мардум ва ғайраҳо унвон намуда, аз ҳозирин даъват ба амал овард, ки зимни баррасии масъалаҳои мазкур фаъолнокӣ зоҳир намоянд.