Кӯчаи марказии маҳаллаи «Навбаҳор» азнавсозӣ мегардад.

12 Январь 2016

Дар асоси дастуру супоришҳои Президенти Ҷумҳурии Тоҷикистон Эмомалӣ Раҳмон ва бахшида ба 25 солагии Истиқлолияти давлатии Ҷумҳурии Тоҷикистон ар шаҳри Хуҷанд корҳои созандагию ободкорӣ оғоз гаштанд. Раиси шаҳри Хуҷанд Раҷаббой Аҳмадзода ҳамроҳи масъулини идораи ободонӣ, кабудизоркунӣ, чароғонкунӣ ва сохтмони шаҳр яке аз кӯчаҳои маҳаллаи «Навбаҳор»,- «30 солагии Ғалаба» боздиди корӣ анҷом дод. Тибқи нақша дар соли ҷорӣ кӯчаии мазкур пурра азнавсозӣ мегардад. Мувофиқи супориши Раиси шаҳри Хуҷанд бояд идораҳои дахлдори ҳифзи муҳити зист ва ободонӣ дарахтҳои хушкида ва беморро бурида дар ҷойи он ниҳолҳои ҳамешасабзи сӯзанбарг шинонанд. Идораи чароғонкунӣ ва роҳсозӣ бошад сутунпояҳои чароғҳои равшандиҳандаро рангубор намуда, фурӯзонакҳои онро ба фурӯзонакҳои светодиодӣ иваз хоханд кард.

Дар боғи ботаники шаҳр ниҳолҳои нав мешинонанд.

12 Январь 2016

Дар боғи ботаники шаҳри Хуҷанд мавсими ниҳолшинонӣ ва шинондани гулу буттаҳои  ороишӣ оғоз ёфт.
Назар ба иттилои масъулин, айни замон бештар 10 нафар кормандону мутахассисони ин боғ ба решакан ва буридани ниҳолу дарахтони аз нашъунамо монда ва омоданамудани майдони гулзоркунӣ машғуланд.
Тибқи нақша кормандон ният доранд  давоми мавсим бештар 500 бех ниҳол ва 5 ҳазор гули лола шинонанд.
То имрӯз ба ҷойи дарахтони хушкида 50 бех ниҳоли «Сарвинози аризонӣ», 50  бех «Ёси ҳиндӣ», 140 бех «Сарвинози ҳамешасабз», шинонда шудааст. Ҳамчунин боғдорон ният доранд иловатан пиёзаки лолаи навъи ҳолландӣ ва ниҳолҳои навъи «Санавбар», «Сарви шарқӣ» «Магнолияи баргрез»-ро то интиҳои мавсим шинонанд.