26 Феврал 2015
Бо дастгирии Мақомоти иҷроияи ҳокимияти давлатии шаҳри Хуҷанд дар 6 маркази саломатии шаҳри Хуҷанд ҳуҷраҳои махсуси дандонпизишкии кӯдакона ташкил карда мешавад.Бо мақсади шиносоии шароитҳои мавҷуда ва фаъолияти имрӯза Раиси шаҳри Хуҷанд Раҷаббой Аҳмадзода ва сардори Раёсати тандурустии вилояти Суғд Абдусалом Ваҳҳобов ба марказҳои саломатӣ омаданд. Шиносоии онҳо аз маркази саломатии № 5 оғоз гардид.
Маркази номбурда ба наздик 44 ҳазор нафар аҳолии минтақаи вобасташуда хизмат расонда бо назардошти бунёди маҳаллаҳои нав дар ин минтақа теъдоди аҳолии ба ин марказ вобасташуд тамоюли зиёдшавӣ дорад. Раиси шаҳри Хуҷанд Раҷаббой Аҳмадзода ҳангоми мулоқот кормандону табибон таъкид намуд, ки маҳз соли равон мушкилоти чандсолаи онҳо,-таъмири куллии боми бинои мазкур ҳалли худро ёфтааст. Бо ин мақсад аз ҳисоби Мақомоти иҷроии ҳокимияти давлатии шаҳри Хуҷанд 200 ҳазор сомонӣ маблағ пешбинӣ гашта дар нимаи аввали соли равон корҳои таъмири бино ба анҷом расонда мешавад.
Раиси шаҳри Хуҷанд таъкид намуд,ки роҳбарияти марказ барои баланд бардоштани сифати хизматрасонӣ, беҳтар намудани шароити корӣ, ороиши толор ва долонҳои ин муасиссаи тиббӣ чораҳои амалӣ андешанд.
Ҳамчунин бо мақсади сари вақт расондани кӯмаки фаврии тиббӣ ба сокинони маҳаллаҳои ба номи «Темурмалик» ва «Мевағул» дар як қисми бино ташкили маркази тиббии «Ёрии таъҷилӣ» ба нақша гирифта шудааст. Баъди шиносоӣ бо макони пешббинишуда масъулини соҳаи тандурустӣ вазифадор гардиданд, ки дар мӯҳлатҳои кӯтоҳтарин барои ташкили маркази «Ёрии таъҷилӣ» тамоми шароитхои лозимаро таъмин намоянд.
Боздиди ҳайати корӣ бо роҳбарии Раиси шаҳри Хуҷанд аз маркази саломатии № 4 идома ёфт.
Дар маркази номбурда наздик 200 нафар кормандон фаъолияти дошта, аз онҳо 27 нафарашон бо тахассуси духтур дар ҳифзи сиҳатии мардум ҳастанд.
Раиси шаҳри Хуҷанд ҳангоми боздид аз ҳуҷраи кории барои муолиҷаи дандони кӯдакон пешбинишуда дидан намуда, нисбати фаъолияти минбаъда ва таҷхизоти тиббии он таваҷҷӯҳ зоҳир намуд.
«Имрӯз дастгирии Президенти Ҷумҳурии Тоҷикистон, Ҷаноби Олӣ, мӯҳтарам Эмомалӣ Раҳмон ба он нигаронда шудааст, ки сифати хизматрасонӣ барои сокинон баланд бардошта шуда, шаҳрвандон набояд ба ташхисгоҳҳо ва дармонгоҳҳои хориҷи кишвар ниёз дошта бошанд. Зеро барои таъмину фароҳам овардани шароиту имкониятҳои мусоид, замина мавҷуд аст. Дар баробари фаъолияти зиёда аз 20 муассисаи тиббии шахсӣ, ки дар шаҳр амал мекунад, бояд дараҷаи дармонгоҳ ва марказхои тиббии давлатӣ низ ба меъёрҳои имрӯзаи хизматрасонӣ ҷавобгӯ бошанд.»
Собиқ маслиҳатгоҳи занона, ки алҳол чун маркази тиббии № 3 ба сокинони чанд маҳаллаҳои шаҳр хизмат мерасонад, яке аз муассаисаҳои тиббии махсусгардонишудаи шаҳр ба ҳисоб меравад. Раиси шаҳри Хуҷанд баъди шиносоӣ бо ҳолати феълии ин муассиса табибонро даъват намуд, ки барои боло бурдани сатҳи маърифатнокии мардум мусоидат намуда, тарзу усули муосири корбариро истифода баранд. Ҳамзамон таъкид гардид, ки шароите, ки имрӯз ин муассиса дорад ҷавобгӯи маркази тиббии шаҳри Хуҷанд нест. Аз ҷониби Раҷаббой Аҳмадзода таъкид гардид, ки нисбати саломатии модару кӯдак ва занҳои ҳомиладор савияи дониши духтурон ва ҳамшираҳои шафқатро беҳтар намудан лозим аст.
Раиси шаҳри Хуҷанд ба тамоми роҳбарони марказхои тиббии супориш дод, ки то нимаи моҳи марти соли равон бинои маъмурии марказҳоро таъмири ҷорӣ намуда, саҳни ҳавлиро гулзору сабзпӯш намоянд.Барои боло бурдани маданияти хизматрасонии тиббӣ, ҷалби духтурони баландихтисос, таҷҳизонидани воситахои техники тиббии муосир, устувор намудани заминаҳои моддӣ ва беҳтар намудани вазъи иҷтимоии кормандони тибб таклифу лоиҳаи худро пешниҳод намоянд.
Тибқи дастури Раиси шаҳри Хуҷанд Раҷаббой Аҳмадзода то интиҳои нимсолаи якуми соли равон дар тамоми марказхои тиббии шаҳр ҳуҷраҳои дандонпизишкӣ барои кӯдакон бояд ба фаъолият шурӯъ намояд.
