15 Апрел 2025
Субҳи имрӯз Раиси шаҳри Хуҷанд Фирдавс Шарифзода ба манзили “Муаллимаи хизматнишондодаи ИҶШС ва Ҷумҳурии Тоҷикистон”, Корманди шоистаи Тоҷикистон, Шаҳрванди фахрии шаҳри Хуҷанд Муқаддамхон Юсупова рафта, мавсуфро бо ҷашни 85 солагиаш табрику таҳният гуфт.
Фирдавс Шарифзода омӯзгори собиқадорро, ки беш аз 60 сол дар МТМУ №2-и шаҳри Хуҷанд кору фаъолияти педагогӣ дошт, аз номи Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон аёдат намуда, зикр дошт, ки собиқадорони меҳнат ҳамеша зери таваҷҷуҳи доимии Давлату Ҳукумат қарор дошта, эшон хазинаи тиллоӣ ва тарбиятгару раҳнамои ҷавонони соҳибистиқлоли мамлакат мебошанд.
Шаҳрдор гуфт, ки дар ҳаёти Шумо чун инсони меҳнатқарин, омӯзгори серталаб, мураббии даврон рўзҳои фаромўшношуданӣ хеле бисёранд ва ҳар яки онҳо ҳолномаатонро бо рангҳои назаррас муҷалло сохтаанд.
Мо бисёр ифтихор дорем, ки имрўз зани қавиирода, фозил ва хушмуомила, бонуи фидокору ғамхор ва яке аз пешқадамтарин фаъолзанони шаҳру вилоят ва ҷумҳурӣ, устод ва мураббии ҳазорҳо омӯзгорон ҷавонон, Шаҳрванди фахрии шаҳри Хуҷанд – Муқаддамхон Юсуповаро бо фазилатҳои нек ва корномаҳои бемисл бомуҳаббат ном мегирем.
Мақомоти иҷроияи ҳокимияти давлатии шаҳри Хуҷанд бо камоли эҳтиром Шуморо ба муносибати ҷашни 85 – солагии мавлудатон табрику муборакбод гуфта, бароятон дар ин рўзи неку фархунда тансиҳатии ҳамешагӣ ва саодати зиндагиро таманно менамояд. Ҳар як фарди солимфикру нексиришт Шуморо чун шахси меҳнатдўсту зафарпеша, зиндадилу шуҳратёр мешиносад ва арзи сипос менамояд, зеро бо меҳнати ҳалолу замири поки худ Шумо ба чунин соҳибэҳтиромиҳо мушарраф гаштаед.
Муқаддамхон Юсупова, ки солҳои тӯлонӣ ба сифати омӯзгор кору фаъолият дошту имрӯз даврони пирӣ меронад, соҳиби 4 фарзанд, 12 набера, 29 абера ва 5 чабера мебошад, аз ташрифи ногаҳонии Раиси шаҳри Хуҷанд Фирдавс Шарифзода хушнуд гардида, миннатдории хешро ба роҳбарияти Давлату Ҳукумат расонд.
Дафтари матбуоти
Раиси шаҳри Хуҷанд
