Директори Коллеҷи тиббии шаҳри Хуҷанд Амирҷон Нурзода донишҷӯдухтарон ва бонувони муассисаи таълимиро бо Рӯзи модар табрику таҳният гуфта, аз ҷумла афзуд, ки воқеан ба оғози фасли баҳор рост омадани Рӯзи модар рамзи шукуфоӣ ва мазҳари зебоӣ буда, озодагиву нафосат, сарсабзиву таровати онро дучанд меафзояд. Ба ибораи дигар, агар нури офтоб ҷаҳонро хуррамӣ бахшад, пас зан – модар бо меҳру муҳаббат ва раҳму шафқати хеш сарчашмаи зиндагӣ ва гармии ҳар як хонавода аст. Дар ситоиши зан – модар то имрўз ҳазорон асари саршор аз меҳру муҳаббат эҷод гардида, симои зани тоҷик ҳанўз дар аввалин китобҳои мардуми кўҳанбунёди мо ҳамчун фарди озоданажоду озодихоҳ, зебову зебоипараст, донишманду фарҳангдўст, диловару Гурдофарид, ватандору ватанпараст ва ҳунарманду кадбону тасвир ёфтааст.

Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон нисбати қадру манзалати зан чунин қайд кардаанд: «Модар азизтарин вуҷуди рўйи замин мебошад ва зиндагӣ аз нафаси гарму дилнавози ў оғоз мегардад. Зан – модар сарчашмаи меҳру вафо, олиҳаи зебоӣ, рамзи ишқи ҷовидонӣ, нахустин муррабӣ ва муаллими фарзанд мебошад. Зеро тору пуди модарон аз риштаи меҳру садоқат ришта шудааст. Худованд ба Зан- модар қудрате ато намудааст, ки офарандаи зиндагӣ ва чароғи ҳар хонадон бошад».

Дар ҳамоиш Шаҳванди фахрии Хуҷанд Шуҷоат Ҳасанова ва узви Иттифоқи нависандагони Тоҷикистон, шоир Гулноз Тоҳириён иштирок намуда, оид ба бузургии Модар сухан ронда, таъкид доштанд, ки модари тоҷик, ки дар тўли асрҳо ба инсоният ҳазорон алломаву нобиғаҳо додааст, сиёсатмадорону давлатдорони бузург, паҳлавонону қаҳрамонони миллатро дар домони покаш парваридааст, имрўз ва оянда низ қудрат дорад фарзандоне ба дунё орад, ки номбардорони аҷдоди худ бошанд. Занону модарони оқилу бономуси мо ҳалқаҳои заррини пайванди гузашта бо имрўзу ояндаи миллати кўҳанбунёди мо ҳастанд. Фарҳанги волои миллати соҳибмаърифат ва тамаддунсози мо аз «Алла»-и ширини тоҷикии занону модарони меҳрубон ва поксиришти мо ибтидо мегирад. Пас меарзад, ки чунин занону модарони фозилро тоҷи сар намоем ва дар назди қадру манзалати онҳо мардона сари эҳтиром ва таъзим фуруд орем.

Шоир Гулноз Тоҳирӣ аз тозачакидаҳои ашъори худ ба ҳли нишаст қироат намуд, ки боиси фараҳмандии аҳли нишаст гардид.

Раиси кумитаи иттифоқи касаба Мӯнисахон Умарова кулли бонувони муассисаро бо ҷашни Рўзи Модар таҳният гуфта, аз ҷумла таъкид дошт, ки ғамхорӣ нисбати занон ва ҳарчи бештар ҷалб намудани онҳо ба вазифаҳои роҳбарикунанда мунтазам дар мадди назари мақомоти иҷроияи ҳокимияти давлатӣ мебошад. Баланд бардоштани мақоми зан дар ҷомеа яке аз самтҳои муҳими фаъолияти имрўза гардидааст. Ҳамзамон ҳаллу фасли мушкилоту масъалаҳои иҷтимоии занону духтарон ва боло бурдани сатҳи донишу маърифати онҳо таҳти таваҷҷўҳи мақомоти иҷроия қарор дода шудааст.

Қайд кардан ба маврид аст, ки арзиши муқаддасу таърихӣ ва омили муҳимтарини ҳамаи дастовардҳои миллати мо баъди Истиқлолияти давлатӣ, ваҳдатӣ миллӣ, сулҳу оромӣ ва суботи сиёсӣ мебошад.

Дар ҳамоиш аз ҷониби роҳбарияти муассиса омўзгорони фаъол бо Ифтихорнома, Сипоснома ва туҳфаҳои хотиравӣ қадршиносӣ гардиданд.

Дар барномаи фарҳангӣ аз тарафи донишҷўёни муассисаи таълимӣ шеъру сурудҳо дар васфи зан ва модар пешкаш гардид.

Ҳунармандони мумтоз Ҳилолиддин Шамсиев ва Аловиддин Бобоҷонзода ба чорабинӣ ҳусни дигар зам намуданд.