Мулоқоти номзад ба вакилии Маҷлиси вакилони халқи вилояти Суғд ва Маҷлиси вакилони халқи шаҳр, Раиси шаҳри Хуҷанд Фирдавс Шарифзода бо интихобкунандагон

Шахси боэътимоди номзад ба Вакили Маҷлиси вакилони халқи шаҳри Хуҷанд ва вилояти Суғд Раиси шаҳри Хуҷанд Фирдавс Шарифзода, Раиси бахши суғдии Иттифоқи нависандагони Тоҷикистон, Шоири халқии Тоҷикистон Аҳмадҷони Раҳматзод доир ба фаъолияти меҳнатии номзад ба вакилӣ, Раиси шаҳри Хуҷанд Фирдавс Шарифзода маълумот дода, аз натиҷаҳои корҳои анҷомшуда дар давоми 5 соли охир иттилои муфссал дод.

Сипас дар назди интихобкунандагон номзад ба вакилии Маҷлиси вакилони халқи шаҳри Хуҷанд аз ҳавзаи интихоботии шаҳрии “Тиллокон №37” ва номзад ба вакилии Маҷлиси вакилони халқи вилояти Суғд аз ҳавзаи интихоботии Камоли Хуҷандӣ баромад намуда, аз ҷумла афзуд, ки Мақомоти иҷроияи ҳокимияти давлатии шаҳри Хуҷанд дар соли сипаригашта баҳри дар амал татбиқ намудани сиёсати хирадмандонаи Асосгузори сулҳу ваҳдати миллӣ, Пешвои муаззами миллат, Президенти Ҷумҳурии Тоҷикистон, мўҳтарам Эмомалӣ Раҳмон, бо мақсади иҷрои босифату саривақтии Амру Фармонҳо ва инчунин дастуру ҳидоятҳое, ки аз Паёмҳояшон ба Маҷлиси Олии Ҷумҳурии Тоҷикистон бармеояд ва нишондодҳои Раиси вилояти Суғд мўҳтарам Раҷаббой Аҳмадзода як силсила корҳои назарраси созандагиро роҳандозӣ намуд.

Бояд зикр намуд, ки дар давраи ҳассоси ҷаҳонишавӣ ва дар натиҷаи дарёфти захираҳои иловагӣ ба мо имконпазир гашт, ки рушди бонизоми иқтисодии шаҳр ҳамчун қисми таркибии иқтисодиёти кишварамон сифатнок таъмин карда, давраи ҳисоботиро бо дастовардҳои назаррас натиҷабардорӣ намоем.

Бо мақсади тақвияти ҳадафи саноатикунонии босуръат соли 2024 дар шаҳр корҳои пурмаҳсул ба роҳ монда шуд, ки дар натиҷа аз ҷониби корхонаҳои калону хурд 2 миллиарду 30,4 миллион сомонӣ маҳсулот истеҳсол карда шуд. Ин нишондиҳанда дар муқоиса бо соли 2023-юм 119,3 миллион сомонӣ зиёд шудааст. Аз миқдори умумии маҳсулотҳои истеҳсолгашта 416,0 миллион сомонӣ ба хориҷи кишвар содир шуда, 110 корхонаҳо маҳсулотҳои воридотивазкунанда ба маблағи 894,0 миллион сомонӣ истеҳсол карданд, ки ин нишондиҳанда 110,0 фоизро ташкил додааст.

Дар раванди рушду инкишофи ин соҳа бо ҷалби зиёда аз 36,5 миллион сомонӣ сармояҳо, 48 адад корхонаҳои нави истеҳсолии хурд бо 966 ҷойи корӣ таъсис дода шуд, ки он боиси зиёд шудани иқтидори истеҳсолии соҳа ба маблағи 7,5 миллион сомонӣ гаштааст.

Дар навбати худ соли сипаригашта тамоми корхонаҳои шаҳр фаъолияташонро самаранок ба роҳ монда нерўи барқро сарфакорона истифода бурдаанд, ки дар натиҷа талафоти барқ то ба 7,2 фоиз поён рафта, барои дар амал татбиқ намудани ҳадафи стратегӣ - Истиқлолияти энергетикӣ замина гузошта истодааст.

Сарфи назар аз хатарҳои бўҳрони иқтисодии ҷаҳонӣ, дар дигар сектори реалии иқтисодиёти шаҳр низ, нишондиҳандаҳои асосӣ пурраю барзиёд таъмин гардида, ҳаҷми корҳои пудратӣ 650,8 миллион сомонӣ ё 189,7 фоиз, хизматрасонии пулакӣ 1,8 миллиард сомонӣ ё 102,4 фоиз, ҳаҷми муомилоти гардиши мол 5,3 миллиард сомонӣ ё 120,5 фоиз, воридоти молҳо 403,5 миллион доллари амрикоӣ ё 137,1 фоиз, сармоягузорӣ 54,2 миллион доллари амрикоӣ ё 119,4 фоиз, шумораи кашонидани бор 4,3 миллион тонна ё 137,5 фоиз, мусофиркашонӣ 99,4 миллион нафар ё 125,3 фоиз ва музди миёнаи маоши кормандон 2 ҳазору 402,8 сомонӣ ё 110,6 фоизро ташкил додааст.

Самаранок истифода бурдани имкониятҳои иловагии тамоми соҳаҳо баҳри ташаккули буҷет имкон дод, ки нақшаи қисми даромади буҷети умумӣ 112,2 фоиз ё 84,4 миллион сомонӣ ва буҷети маҳаллӣ 107,5 фоиз ё 23,3 миллион сомонӣ аз нақшаҳои пешбинишуда барзиёд таъмин гардид.

Фирдавс Шарифзода гуфт, ки дастовардҳои ба миёномада ба мо имкон дод, ки 37,0 миллион сомонӣ маблағи зиёдшавии музди маош ва нафақа таъмин карда шуда, аз ин ҳисоб қарздорӣ ва ё қафомонии пардохти музди меҳнат ҷой надорад.

Мавриди тазаккур аст, ки бо мақсади пешвози ҷашни 35-солагии Истиқлоли давлатии Ҷумҳурии Тоҷикистон дар ҳудуди шаҳри Хуҷанд, дар панҷ соли минбаъда сохтмон, азнавсозӣ ва таъмиру таҷдиди 950 иншоотҳои ҳаётан муҳим ба нақша гирифта шуда, танҳо дар соли 2024-ум 319 адади онҳо бунёд карда шуда, иҷроиши нақшаи солона 167,9 фоиз ва иҷроиши нақшаи умумӣ 76,0 фоизро ташкил дод.

Боиси ифтихор аст, ки соли 2024 дар доираи сафарҳои кории худ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар маросими ифтитоҳи 13 адад иншоотҳои ҳаётан муҳими шаҳр иштирок варзида, ба онҳо ҳусни оғоз бахшиданд.

Дар корҳои ободонию гулзоркунӣ саҳми соҳибкорону аҳолӣ низ, мунтазам фаъол гардида, дар мавзеъҳои шаҳр дарахтони ороишию мевадиҳанда ва ҳамешасабз, инчунин гулҳои ҳархелаи ороишию маҳаллӣ шинонида шуда, баҳри ҳусну таровати замонавӣ бахшидан ба кўчаю хиёбонҳо ва майдонҳои ҳудуди шаҳр лампаҳо, чароғакҳою фурўзонакҳо ва равшанкунакҳои муосир насб карда шуда, биноҳои баландошёнаи истиқоматӣ рангубор карда шуданд.

Дар ин раванд 52,6 км роҳҳои мавзеъи шаҳр мумфаршу таъмири асосӣ гузаронида шудаанд, ки он нисбат ба нақшаи тасдиқгардида 108,5 фоизро ташкил додааст.

Бо кўмаку дастгирии бевоситаи Раиси вилояти Суғд, соҳили рости дарёи Сир ба мавзеи сайру гашт ва истироҳати замонавии сокинону сайёҳон табдил гашта, ҳоло дар ин самт корҳо давом доранд.

Дар ин давра баҳри дастгирии иҷтимоии ниёзмандон ва оилаҳои камбизоат 8100 оилаҳо аёдат карда шуда, ҷиҳати беҳтар кардани шароити манзилии шаҳрвандони эҳтиёҷманд, дар давраи ҳисоботӣ 16 нафар оилаҳои эҳтиёҷманд бо манзили истиқоматӣ таъмин карда шуданд.

Маврид ба зикр аст, ки ба соҳаҳои маорифу тандурустӣ, ҳамчун самтҳои афзалиятноки сиёсати иҷтимоии давлат таваҷҷўҳи бештар зоҳир гардида, соли сипаригашта муассисаҳои ин соҳаҳо барои ба талаботи муосир ҷавобгў будан, бунёду азнавсозӣ ва таъмиру таҷдид гардиданд. Ҳамзамон дар 4 муассисаҳои таълимии шаҳр, аз ҷумла, гимназияҳои №1 ва 4, муассисаҳои таҳсилоти миёнаи умумии №7 ва 14-и шаҳр баҳри бунёди биноҳои иловагии таълимӣ санги асос гузошта шуд, ки он пурра бо саҳми соҳибкорон сохта мешавад. Бояд қайд намуд, ки баъди истифодадиҳии ин биноҳои таълимӣ беш аз 5000 адад ҷойи нишасти хонандагон фароҳам оварда мешавад. Ғайр аз ин сохтмони боз 4 адад кӯдакистони нави замонавӣ аз ҷониби соҳибкорони ватанӣ бомаром идома дорад, ки соли ҷорӣ мавриди баҳрабардорӣ қарор дода мешаванд.

Бояд тазаккур дод, ки ҷиҳати иҷрои Барномаи давлатии амалӣ намудани технологияи иттилоотӣ-коммуникатсионӣ дар муассисаҳои таҳсилоти умумии Ҷумҳурии Тоҷикистон барои солҳои 2024-2028 дар 52 муассисаҳои таълимӣ 86 кабинетҳои фаннӣ, 2580 адад компютер, 365 адад принтер, 441 проектор ва 375 адад тахтаи электронӣ таъмин карда шудааст.

Ҷавобан ба ин ғамхориҳо толибилмони шаҳр бо ҳисси баланди завқу шавқи донишомўзӣ дар олимпиадаҳои гуногуни фаннии сатҳи баланд иштирок намуда, танҳо дар давраи ҳисоботӣ дар олимпиадаҳои байналмилалӣ – фаннӣ 475 нафар ва дар олимпиадаҳои ҷумҳуриявӣ 90 нафар ба ҷойҳои ифтихорӣ сазовор гардида, 5 нафар хатмкунандагони муассисаҳои таълимии шаҳр бо гирифтани аттестати аъло бо медали тилло хатм намуданд.

Ҳамчунин баҳри рушди маънавию фарҳангии ҷомеа дар шаҳр 278 адад чорабиниҳои гуногун доир гардид, ки дар он зиёда аз 81,0 ҳазор нафар сокинону 35,0 ҳазор нафар сайёҳони дохилию хориҷӣ иштирок намуданд.

Номзад ба вакилии Маҷлиси вакилони халқи шаҳри Хуҷанд аз ҳавзаи интихоботии шаҳрии “Тиллокон №37” ва номзад ба вакилии Маҷлиси вакилони халқи вилояти Суғд аз ҳавзаи интихоботии Камоли Хуҷандӣ №4 Раиси шаҳри Хуҷанд Фирдавс Шарифзода доир ба дигар паҳлуҳои фаъолият маълумоти муфассал дод.

Сипас дар назди интихобкунанандагон шахсони бовариноки номзад ба вакилии Маҷлиси вакилони халқи шаҳр ва вилоят аз аз ҳавзаи интихоботии шаҳрии “Тиллокон №37” ва номзад ба вакилии Маҷлиси вакилони халқи вилояти Суғд аз ҳавзаи интихоботии Камоли Хуҷандӣ №4, аз ҷумла Абдумавлон Абдуллозода, Мақсудҷон Самеъзода ва Илҳом Бобоев, ки ба тариқи худпешбарӣ номзадии худро гузоштаанд, баромад карда, барномаҳои пешазинтихоботии хешро муаррифӣ намуданд.

Мулоқот бо саволу ҷавоб ва пешниҳодот анҷом пазируфт.