14 Январ 2015
Субҳи имрӯз Раиси шаҳри Хуҷанд Раҷаббой Аҳмадзода аз ду маҳаллаи шаҳри Хуҷанд маҳаллаҳои «Сари баландӣ» ва «Раззоқ» дидан намуд.
Дар маҳаллаи «Сари баландӣ» бо ибтикори соҳибкори маҳаллӣ Музаффар Ҷумъаев бинои истиқоматии 6 ошёна бо 15 ҳуҷра сохта шуда истодааст. Тибқи лоиҳа ҳучраҳои истиқоматии се хонагӣ барои шахсони ниёзманди маҳаллаи мазкур бо нархи нисбатан арзон,- 2 ҳазор сомонӣ барои ҳар як метрии мураббаъ фурӯхта шуда, барои беҳтар шудани шароити манзили 15 оилаи маҳаллаи мазкур мусоидат менамояд.
Ҳамчунин бо назардошти он,ки то ин дам дар маҳалла чойхона набуд, ошёнаи якум аз чойхонаи маҳалла иборат хоҳад буд. Раиси шаҳри Хуҷанд дастур дод, ки қисмати дигари бино барои ҳуҷраҳои кории Кумитаи маҳаллаи мазкур ҷудо карда шавад. Ҳамчунин таъкид гардид, ки то санаи 1 марти соли равон тамоми корҳои сохтмонӣ ба анҷом расонда шуда, бинои мазкур бо тамоми имкониятҳояш ба истифода дода шавад.
Дар маҳаллаи «Раззоқ» яке аз чойхонаҳои қадимаи шаҳри Хуҷанд «Чойхонаи Сари санг» амал мекунад. Ба ғайр аз он,ки ин макон барои фароғат ва иштирок дар маҳфилҳои гуногуни собиқадорон ва пирони маҳалла хизмат мекунад, дар чойхона чорабиниҳои гуногуни фарҳангӣ ва оммавӣ гузаронида мешавад. Ба Раиси шаҳри Хуҷанд Раҷаббой Аҳмадзода маълумот дода шуд, ки ҳоло бо қувваи сокинон ва фаъолони маҳалла чойхона ва мавзеи атрофии он таъмир ва азнавсозӣ мешавад. Барои ба макони маърифату фароғат табдил додани он то таҷлили ҷашни Наврӯз нақшаи мушаххас таҳия гардидааст.
Раиси шаҳри Хуҷанд ҳамзамон ба масъулони Мақомоти иҷроияи ҳокимияти давлатии шаҳри Хуҷанд бо назардошти дархости сокинон дастур дод,ки барои асфалтпӯш намудани як қисмати роҳи маҳалла дар якҷоягӣ бо худи фаъолони хоҳишманд, таъмири бинои маъмурии Кумитаи маҳалла, дастрас намудани ҷиҳозу ашёи зарурӣ барои беҳтар гаштани фаъолияти чойхона давоми як моҳ тадбирҳо андешанд.
