07 Февраль 2025
Недоступен ни однин перевод.
Бо мақсади иҷроиши нақшаи муштараки мулоқоту вохӯриҳои гурӯҳҳои тарғиботӣ- ташвиқотии назди Мақомоти иҷроияи ҳокимияти давлатии вилояти Суғд ва Кумитаи иҷроияи Ҳизби Халқии Демократии Тоҷикистон дар вилояти Суғд ҷиҳати шарҳу тавзеҳи Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон “Дар бораи самтҳои асосии сиёсати дохилӣ ва хориҷии ҷумҳурӣ” аз 28-уми декабри соли 2024 санаи 6-уми феврали соли 2025, дар толори Муасисаи таҳсилоти миёнаи умумии №28-и шаҳри Хуҷанд мулоқоти судманд баргузор гардид.
Дар мулоқот Муовини Раиси шаҳри Хуҷанд Муяссара Қаҳҳорӣ, муовини раиси Кумитаи иҷроияи Ҳизби Халқии Демократии Тоҷикистон дар вилояти Суғд Фирдавс Салимов, раиси Шӯрои иттифоқҳои касабаи вилоят Шарифулло Абдуллозода, Раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Мунзифа Ҷабборӣ ва раиси Шӯрои собиқадорони ҲХДТ дар шаҳри Хуҷанд, дотсенти Донишгоҳи давлатии Хуҷанд ба номи академик Бобоҷон Ғафуров Шарипов Абдуҳаким дар бораи мазмуну муҳтавои Паёми Президенти мамлакат ба Маҷлиси Олӣ баромад намуданд.
Мулоқотро муовини раиси шаҳри Хуҷанд Муяссара Қаҳҳорӣ ҳусни оғоз намуда, доир ба нақши Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар таҳкими давлатдории миллӣ, рушду ободии мамлакат ва ҷомеа изҳори андеша намуда, зикр намуд, ки сокинони Хуҷанди бостонӣ, бахусус соҳибкорони бонангу номус ҷиҳати татбиқи дастуру супоришҳои Пешвои муаззами миллат, бо ҳисси ватандӯстиву меҳанпарастӣ, азму талоши пайгирона ва садоқамандона кору фаъолият намуда, барои рушди соҳаҳои саноат, бунёди роҳу пулҳо, иншооти маорифу тандурустӣ ва дигар соҳаҳо неру ва ташаббусҳои худро равона намудаанд.
Муовини раиси Кумитаи иҷроияи Ҳизби Халқии Демократии Тоҷикистон дар вилояти Суғд Фирдавс Салимов зимни суханронии хеш баён намуд, ки Паёми Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон, рӯйдоди муҳим дар ҳаёти сиёсӣ, иҷтимоӣ, иқтисодӣ ва маънавии ҷомеа буда, он аҳамияти муҳими таърихӣ ва сиёсӣ дорад. Ҳадафи ин санади стратегӣ давра ба давра боло бурдани сатҳи некуаҳволии халқ ва фароҳам овардани зиндагии шоиста мебошад.
Раиси Шӯрои иттифоқҳои касабаи вилоят Шарифулло Абдуллозода дар баромади хеш баён намуд, ки Паёми Президенти мамлакат барои тамоми мақомотҳои давлатӣ, сохторҳои идоракунӣ, вазорату идораҳо, муассисаҳо, мақомоти ҳифзи ҳуқуқ ва мақомоти маҳаллии ҳокимияти давлатӣ, кулли мардум ҳуҷҷати роҳнамо буда, аз он вазифаҳои барномавии тамоми сохтору мақомоти зикршуда бар меояд ва Паём онҳоро ба иҷрои ҳадафҳои ояндасоз сафарбар менамояд.
Раиси Шӯрои собиқадорони ҲХДТ дар шаҳри Хуҷанд Шарипов Абдуҳаким зимни суханронӣ қайд намуд, ки таъмини иҷрои вазифаҳои дар Паёми Президенти мамлакат баёнгардида, аз ҳар яки мову Шумо, аъзои Ҳизби Халқии Демократии Тоҷикистон – аз коргари оддӣ то роҳбари корхона, олимону зиёиён, кишоварзону соҳибкорон, инчунин роҳбарони ҳамаи шохаҳои ҳокимият ва тамоми мардуми кишвари азизамон, вобастагии мустақим дорад.
Раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Мунзифа Ҷабборӣ зимни баромади худ ҷиҳати нақши Паёми роҳбари давлат дар самти баланд бардоштани нақши занон дар ҷомеа, арҷгузорӣ ба зан - модарро бо ҳарфҳои саодатбори Пешвои миллат баён дошта, масъулияти занонро беш аз пеш дар тарбияи фарзандон ва тарғиби либоси миллӣ муҳим арзёбӣ намуд. Ҳамчунин қайд намуд, ки ҲХДТ бо роҳбарии Пешвои миллат муҳтарам Эмомалӣ Раҳмон дар таҳкими сулҳу субот ва боло бурдани сатҳи зиндагии мардум нақши муассир дошта, бо барномаи созандааш тавонист эътимоди мардумро ҷалб кунад.
Дар охир сокинони шаҳри бостонии Хуҷандро даъват ба амал овард, ки дар маъракаи муҳими сиёсӣ – интихоботи Маҷлиси Олии Ҷумҳурии Тоҷикистон ва Маҷлисҳои маҳаллии вакилони халқ фаъолона иштирок намуда, барои пешрафту шукуфоии кишвар саҳмгузор бошанд.
Дафтари матбуоти
Раиси шаҳри Хуҷанд
