Муяссара Қаҳҳорӣ, муовини Раиси шаҳри Хуҷанд мизи мудавварро ҳусни оғоз бахшида, аз ҷумла иброз дошт, ки Президенти мамлакат мухтарам Эмомалӣ Раҳмон дар Паёми навбатии хеш ба соҳаи тандурустӣ ва ҳифзи иҷтимоии аҳолӣ низ диққати хоса зоҳир намуда, таъкид намуданд, ки Ҳукумати мамлакат барои таъмин намудани фаъолияти босамари муассисаҳои соҳаи тандурустӣ ва баланд бардоштани сатҳу сифати хизматрасонии тиббӣ ба аҳолӣ тадбирҳои заруриро роҳандозӣ намуда истодааст.

Соҳаи тандурустӣ яке аз соҳаҳои афзалиятнок ва муҳими иҷтимоӣ маҳсуб ёфта, зери таваҷҷуҳи ҳамешагии Ҳукумати Ҷумҳурии Тоҷикистон, хоса Асосгузори сулҳу ваҳдати миллӣ Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон қарор дорад. Дар робита ба ин як қатор барномаҳои давлатии соҳавӣ ва стратегияҳо қабул гардидаанд, ки барои солимии аҳолӣ нигаронида шудааст.

Мизи мудаввари имруза бо мақсади татбиқ ва табдирҳои таъмини Қарори Ҳукумати Ҷумҳурии Тоҷикистон аз 31 августи соли 2023, № 418 «Дар бораи Барномаи давлатии солимии репродуктивӣ барои солҳои 2023-2027» доир гардида истодааст.

Барномаи мазкур ҷиҳати беҳбудии сифат ва дастрасӣ ба хизматрасониҳои солимии репродуктивӣ, солимии модару кӯдак, саломатии модарон ва навзодон, кудакону наврасон ва ҳифзи солимии репродуктивии аҳолӣ дар заминаи фарогирии умумии хизматрасониҳои тандурустӣ таҳия ва қабул гардидааст.

Ҳадафи барнома тарғиби таваллуди фарзанди солим, бо риояи фосилаи байни таваллуд, баланд бардоштани дастрасӣ, сифатнокӣ ва самаранокии репродуктивии аҳолӣ, беҳтар намудани саломатии занон, тарбияи ахлоқии ҷинсӣ, таҷҳизонидан бо техника ва технологияи муосир барои таъмини муассисаҳои тиббӣ бо маводи контрасептивӣ, омузонидани кормандони соҳаи тандурустӣ дар самти солимии репродуктивӣ, таҳияи маводи иттилоотию маърифатӣ, баланд бардоштани маърифатнокӣ ва дониши аҳолӣ оид ба масъалаҳои солимии репродуктивӣ мебошад.

Дар ҷараёни мизи мудаввар директори маркази солимии репродуктивии вилояти Суғд Раъно Меҳмонова, корманди таваллудхонаи шаҳрии шаҳри Хуҷанд Наргис Ҳасанова ва дигарон маърӯза намуданд.

Таъкид шуд, ки солимии модарон, навзодон, кӯдакон ва наврасон моҳияти муҳимро доро буда, воситаи муҳими рушди сармояи инсонӣ мебошад.

Тавре мутахассисони соҳаи тиб иброз медоранд, омилҳои боиси пайдо шудани нуқсонҳои модарзодӣ мегарданд инҳоянд: Якум, омили генетикӣ, яъне никоҳи хешутаборӣ, ки ба паҳншавии нуқсонҳои модарзодӣ оварда мерасонад. Дуюм, омили бемориҳои сироятӣ мебошад. Агар модар ё падар дорандаи бемориҳои сироятии ситомегаловирус, вируси одии герпесӣ ё токсоплазмоз бошад, метавонад сабаби пайдоиши нуқсонҳои модарзодӣ гардад. Сеюм, омили ғизои модар мебошад. Норасоии йод, туршии фолат, вазни зиёд ё ин ки ҳолати диабети қанд ба якчанд нуқсонҳои модарзодӣ вобастагӣ доранд. Масалан, норасоии туршии фолат хатари таваллуди кӯдакро бо нуқси найчаи асаб зиёд мекунад. Чорум, омили экологӣ, таъсири организми модар ба моддаҳои кимиёвӣ, инчунин ба доруҳо ва риоя накардани ташаккули тарзи ҳаёти солим мебошад. Аз ин сабаб аз тамоми ҷавонон хоҳиш карда мешавад, ки пеш аз оиладоршавӣ аввал андешаи оянда ва фарзандони солимро кунанд. Иқдоми пеш аз оиладоршавӣ аз ташхиси тиббӣ гузаштани ҷавонон ба фоидаи кор буда, сол то сол сатҳи пайдоиши нуқсонҳои модарзодӣ дар батни модарон кам мегардад.

Табибони тибби оилавӣ ва табибони амрози занона ҳамеша кӯшиш менамоянд, ки сатҳу сифати хуби хизматрасониро барои аҳолӣ ба роҳ монанд. Корҳои фаҳмондадиҳию профилактикӣ ва скринингҳои давраӣ, ки дар байни занҳои ҳомиладор гузаронда мешавад, ба хотири дарёфт намудани нуқсонҳои модарзодӣ ва сари вақт қатъ намудани ҳомиладорӣ равона мегардад.

Мизи мудаввар бо мубодилаи афкор ҳусни анҷом пазируфт.