Нахуст, мудири шуъбаи кор бо занон ва оилаи шаҳри Хуҷанд Манучеҳра Кенҷазода ҳисобот оид ба фаъолият дар соли 2024-ро ироа намуд.

Иттилоъ дода шуд, ки Шуъбаи кор бо занон ва оилаи Мақомоти иҷроияи ҳокимияти давлатии шаҳри Хуҷанд дар соли 2024 фаъолияти хешро баҳри дар амал татбиқ намудани сиёсати хирадмандонаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, қонунҳои Ҷумҳурии Тоҷикистон, қарорҳои Ҳукумати Ҷумҳурии Тоҷикистон, қарорҳои Раиси вилоят ва Раиси шаҳр, Барномаҳои давлатии марбут ба соҳа ва нақшаи корӣ ба роҳ монд.

Ба тасвиб расидани Фармони Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон «Дар бораи баланд бардоштани мақоми зан дар ҷомеа», қабули Стратегия ва Барномаҳои давлатӣ марҳилаи тозаеро дар ҳаёти сиёсии мамлакат ва бештар намудани ҷалби занон ба ҳаёти ҷамъиятӣ боз намуд.

Имрўз дар шаҳри Хуҷанд 205 ҳазору 900 нафар аҳолӣ буда аз ин 101 ҳазору 400 нафарашонро занону духтарон ташкил медиҳад, ки аз он 55 ҳазору 488 ҷуфташон оила мебошанд.

Дар асоси “Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занон ва духтарони лаёқатманд дар Ҷумҳурии Тоҷикистон барои солҳои “2022-2030”, ҳамасола курси 3 моҳаи “Зан-роҳбар” дар назди шўъбаи кор бо занон ва оила баргузор мегардад, ки то ин дам 200 нафар занону бонувон онро хатм намуда, соҳиби “Гувоҳнома” гардиданд.

Соли ҷорӣ низ курси 3-моҳаи “Зан сарвар”-и назди шуъбаи кор бо занон ва оила баргузор гардида курси мазкур санаи 10 декабр бо тантана ҷамъбаст карда мешавад. Бояд қайд намуд, ки шунавандагони курси мазкур аз ҳисоби ҷонишинони директорони муассисаҳои таълимии шаҳр мебошанд.

Дар асоси мактуби Кумитаи кор бо занон ва оилаи назди Ҳукумати Ҷумҳурии Тоҷикистон оид ба баргузор намудани даври шаҳрии Озмуни «Беҳтарин хизматчии давлатӣ аз ҳисоби занон» баргузор гардид. Озмун дар асоси “Барномаи давлатии тарбия, интихоб ва ҷобаҷогузории кадрҳои роҳбарикунанда аз ҳисоби занон ва духтарони лаёқатманд дар Ҷумҳурии Тоҷикистон барои солҳои 2023- 2030 бо мақсади ҷалб ва пешбарӣ намудани занҳо ба вазифаҳои роҳбарикунанда, баланд бардоштани обрўву нуфузи зани тоҷик дар арсаи сиёсат ва афзудани теъдоди занон дар сатҳи роҳбарикунанда замина гузошта, инчунин ҳавасмандгардонии занон-хизматчиёни давлатӣ баҳри фаъолияти самарабахш дар хизмати давлатӣ, тақвият бахшидан ба донишу малака ва касбияти занон – хизматчиёни давлатӣ баланд бардоштани ҳисси ватандўстию ифтихори миллӣ, таъмини хуқуқу манфиатҳои занон доир гардид.

Дар Озмун беш аз 14 нафар хизматчиёни давлатӣ аз ҳисоби занон ширкат варзиданд.

Дар ҷамъбасти озмуни “Беҳтарин хизматчии давлатӣ аз ҳисоби занон” аз рўи бахшҳои зикргардида 3 нафар ғолиб муайян карда шуда, ба даври озмуни вилоятӣ роҳхат гирифтанд. Ғолибону иштирокчиён барои иштироки фаъолона дар Озмуни мазкур бо сипосномаи мақомоти иҷроияи ҳокимияти давлатии шаҳри Хуҷанд ва туҳфаҳои хотиравӣ қадрдонӣ карда шуданд.

Дар асоси нақшаи чорабиниҳои тасдиқнамудаи Мақомоти иҷроияи ҳокимияти давлатии шаҳр доир ба Паёми Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон бо сокинони маҳаллаҳои шаҳри Хуҷанд, суҳбату корҳои тарғиботӣ доир карда шуд.

Ҷиҳати иҷрои дастуру супоришҳои Раиси вилоят ва Раиси шаҳр оид ба баргузории суҳбату вохўриҳо ва корҳои фаҳмондадиҳӣ дар муассисаҳои таҳсилоти олӣ, миёнаи касбӣ ва мактабҳои миёнаи умумӣ ва маҳаллаҳои шаҳр ҷиҳати пешгирии пошхўрии оилаҳо, ҷиноятсодиркунӣ, худкушӣ ва сўиқасд ба ҷони худ, пўшидани либоси бегона, пешгирии таваллуд дар хона, нишасти занҳои аз сафари ҳаҷ баргашта дар тарабхонаҳо, нишастҳои беасоси занҳо ва дигар ҳодисаҳои номатлуби ҷомеа аз санаи 1-март то имрўз дар маҳаллаҳои Чорчароғ, 1-Май, Сари Баландӣ, Қ.Қурбонов, Мевағул, С.Ҳофиз, Ваҳдат, Бофанда, Масҷиди Савр, Навбаҳор, Раззоқ, Тути калон, Сирдарё, Чашмаи Арзана, Тиллокон, Шарқ, Хуҷанд, Дўстии халқҳо, Ҷ.Расулов ва дар муассисаҳо таҳсилоти миёнаи умумии шаҳр, МДТ Донишгоҳи давлатии Хуҷанд ба номи академик Бобоҷон Ғафуров, Донишгоҳи давлатии ҳуқуқ, бизнес ва сиёсати Тоҷикистон, Донишкадаи иҷтисод ва савдои Донишгоҳи тиҷорати Тоҷикистон, Коллеҷи тиббии шаҳри Хуҷанд вохўрӣ бо сокинону донишҷўён, омўзгорону хонандагон баргузор гардида истодааст. Дар вохўриҳо масъулини шуъбаи кор бо занон ва оила, собиқадорони меҳнат ва фаъолзанон иштирок ва баромад намуданд.

Бо мақсади татбиқи қарори Раиси вилояти Суғд аз 20 январи соли 2024, № 22 ва қарори Раиси шаҳри Хуҷанд аз 27 феврали соли 2024, № 106 «Дар бораи таҷлили Рўзи Модар» як қатор тадбирҳо амалӣ гардид.

Сохторҳои Мақомоти иҷроияи ҳокимияти давлатии шаҳри Хуҷанд бо мақсади татбиқи сиёсати давлат дар ҷодаи дастгирии занон ва духтарон, қадршиносӣ аз саҳми арзандаи онҳо дар ҳаёти ҷамъиятӣ таъмини фаъолнокии минбаъдаи онҳо таҳкими нақш ва мақоми занону модарон дар ҷомеа, чунин корҳоро ба сомон расонид.

Дар муассисаҳои таҳсилоти олӣ ва миёнаи умумӣ, чорабиниҳои адабию-фарҳангӣ, маҳфилҳо, соатҳои тарбиявӣ дар мавзуи “Модар - неруи бузургу пешбаранда”, “Модар олиҳаи ҳастӣ”, “Ҷаннат зери қудуми модарон аст”, “Зан олиҳаи ҳусну малоҳат ”, “Кадбонуи беҳтарин”, «Модар фариштаи осмонист», «Модар-тоҷи офариниш», «Модар дурдонаи меҳру муҳаббат», «Модар меҳвари муҳаббату садоқат аст», “Зиндагӣ аз модар сарчашма мегирад”, «Сарчашмаи рўзгори одам-Модар», «Рамзи ишқи ҷовидонӣ, Модар аст», «Қалби пурэҳсоси Модар зинда бод!» доир гардиданд, ки онҳо аз нақшу мақом, рисолати азалии Зан-Модар бозгўӣ мекунад.

Кенҷазода Манучеҳра доир ба дигар самтҳои фаъолияти шуъбаи кор бо занон ва оилаи шаҳри Хуҷанд маълумоти муфассал дод.

Дар музокираи ҷаласа мудири шуъбаи сабти асноди ҳолати шаҳрвандии шаҳри Хуҷанд Нигина Рустамзода, сардухтури таваллудхонаи шаҳрӣ Муқаддасхон Ёқубова, профессор Умеда Ғаффорова, муовини сардухтури беморхонаи шаҳрии №1 Саодатхон Аминҷонова ва дигарон баромад намуданд.

Дар маҷмуъ фаъолияти шуъбаи кор бо занон ва оилаи Мақомоти иҷроияи ҳокимияти давлатии шаҳри Хуҷанд мусбат арзёбӣ гардида, вазифаҳо барои ҷоннок намудани раванди фаъолият дар соли 2025 муайян мушаххас карда шуданд.

Дар анҷоми ҷаласа барои ҳамкориҳои судманд ба як қатор бонувони фаъол Сипосномаҳо тақдим гардиданд.