05 Ноябр 2024
Имрӯз дар МТТ №14 ба муносибати 30 солагии қабули Рӯзи Конститутсияи Ҷумҳурии Тоҷикистон маҳфили хушҳолӣ бо иштироки намояндаи Раёсати маорифи вилоят Гулсара Тошматова ва мудири шуъбаи маорифи шаҳри Хуҷанд Шаҳноза Мақсудзода баргузор шуд.
Дар чорабинӣ аз ҷониби кўдакон ва мураббиёни муассисаи томактабӣ доир ба Конститутсия шеъру суруд ва гуфторҳо қироат шуданд. Рақсҳои ҷолиб намоиш дода шуд.
Таъкид шуд, ки мояи ифтихор ва хушнудист, ки пас аз ҳазорсолаҳо аввалин маротиба имконияти таърихӣ ва ҳуқуқии қабули бевоситаи санади волои миллӣ амалӣ гардида, ба шарофати он пойдевори давлати демократӣ, ҳуқуқбунёд ва дунявии тоҷикон таҳким ёфт.
Ҳукумати ҷумҳурӣ бо сиёсати хирадмандонаи Президенти Ҷумҳурии Тоҷикистон муҳтарам Эмомалӣ Раҳмон баробари қабули Конститутсия дар асоси талаботи он фаъолият намуда, дар пешрафти ҳаёти сиёсӣ, иқтисодӣ, иҷтимоию фарҳангии ҷомеа ва таъмини ҳуқуқу озодиҳои шаҳрвандон иқдоми созандаро амалӣ менамояд.
Яке аз вазифаҳои муҳимми таърихиву ҳуқуқӣ ва иҷтимоиву сиёсии Конститутсия- дар он муқаррар гардидани тағйирнопазир будани шакли идораи ҷумҳурӣ, моҳияти демократӣ, ҳуқуқбунёдӣ, дунявӣ ва иҷтимоии давлат, тамомияти арзӣ ва тақсимнашавандаву дахлнопазир будани ҳудуди Тоҷикистон буд, ки ин меъёри конститутсионӣ барои таъмини соҳибихтиёрӣ ва рушди Тоҷикистон ҳамчун давлати воҳид шароити мусоид фароҳам овард. Дар сатҳи Конститутсия дарҷ гардидани кафолати фаъолияти озоди иқтисодӣ, соҳибкорӣ ва эътирофи моликияти хусусӣ ба созмон додани асосҳои иқтисодиёти миллии пешрафта мусоидат намуд. Ин аст, ки дар мамлакат бо мақсади рушди соҳаҳои афзалиятноки иқтисодӣ даҳҳо стратегияву барномаҳои давлатӣ қабул ва татбиқ гардиданд.
Дафтари матбуоти
Раиси шаҳри Хуҷанд
