Конститутсия дурнамои рушди ҷомеаи навинро муайян ва бунёди ҳуқуқиеро ба вуҷуд овард

Конфронсро ректори донишкада Раҳимҷон Назаров ифтитоҳ намуда, роҷеъ ба “Конститутсияи Ҷумҳурии Тоҷикистон-бахтномаи миллат” маърӯзаи илмӣ намуд.

Сипас намояндаи Мақомоти иҷроияи ҳокимияти давлатии вилояти Суғд Сӯҳроб Рустамзода ва сардори шуъбаи назорати иҷрои қонунҳо оид ба ноболиғон ва ҷавонони прокуратураи вилояти Суғд, мушовири адлияи дараҷаи дуюм Хуршед Худоёрзода доир ба аҳамияти қабули Конуститусия ва мазмуну моҳияи он дар ҷомеаи демократӣ баромад намуданд.

Таъкид шуд, ки омили асосие, ки ба қабули Конститутсия замина гузошт, Эъломияи соҳибихтиёрии Ҷумҳурии Тоҷикистон аз 9 сентябри соли 1991 мебошад. Конститутсия аввалин шуда, асосҳои сохтори сиёсӣ, иқтисодӣ ва иҷтимоии Тоҷикистонро пурра дар шакли нав муқаррар кард ва дурнамои рушди ҷомеаи навини Тоҷикистонро муайян намуд. Конститутсия дар худ арзишҳои демократии сохтори конститутсионӣ — соҳибихтиёрӣ, давлати ҳуқуқбунёд, ҳокимияти халқӣ, волоияти қонун, эътирофи шахсият ва арзиши олӣ доштани ҳуқуқу озодиҳои он, таҷзияи ҳокимият ба се шохаи мустақил, гуногунандешии сиёсӣ ва мафкуравӣ, ташаккули худидоракунии маҳаллӣ, фаъолияти озоди иқтисодӣ ва ҳимояи баробарии ҳамаи шаклҳои моликият, тақвияти назорати судӣ, институти президентиро инъикос намуд.

Конститутсия Истиқлоли давлатиро ба расмият дароварда, дурнамои рушди ҷомеаи навинро муайян ва бунёди ҳуқуқиеро ба вуҷуд овард, ки он минбаъд ҳам метавонад ягонагии сиёсӣ, иқтисодӣ ва иҷтимоии Тоҷикистонро таъмин намояд. Ин санади сарнавиштсоз инъикосгари арзишҳои ҳуқуқӣ буда, симои муосир ва таърихии Тоҷикистонро дар худ инъикос намудааст. Ин талабот дар моддаи 10-и Конститутсияи Ҷумҳурии Тоҷикистон чунин дарҷ гардидааст: «Конститутсияи Тоҷикистон эътибори олии ҳуқуқӣ дорад ва меъёрҳои он мустақиман амал мекунанд. Дар қисми аввали моддаи 10-и ин санади муҳим афзалияти меъёрҳои Конститутсия нисбат ба дигар санадҳои меъёрии ҳуқуқӣ муқаррар шудаанд. Тамоми санадҳои меъёрии ҳуқуқӣ аз Конститутсия ибтидо мегиранд ва набояд ба он зид бошанд. Дар мавриди мухолифат доштани санадҳои меъёрии ҳуқуқӣ ба Конститутсия онҳо эътибори ҳуқуқӣ надоранд. Аз ин рӯ, меъёрҳои Конститутсия дорои эътибори олии ҳуқуқӣ мебошанд.

Дар ҷараёни кори конфронс донишҷӯи соли сеюми донишкада Умархон Умаров дар мавзуъи “Конститутсияи Ҷумҳурии Тоҷикистон-кафили ҳуқуқу озодиҳои шаҳрванд” маърӯза намуд.

Бояд қайд намуд, ки дар Донишкадаи илмҳои дақиқ ва технологияи Тоҷикистон дар шаҳри Хуҷанд ба муносибати 30 солагии қабули Рӯзи Конститутсияи Ҷумҳурии Тоҷикистон як силсисла чорабиниҳо, аз ҷумла дарси кушод, озмуну маҳфилҳо, ҳафтаи таърих ва ҳуқуқ ва дигар чорабиниҳои маърифатию фарҳангӣ ташкил ва баргузор карда шуд.