Иштироки Раҷаббой Аҳмадзода дар конференсияи байналмилалии илмӣ-амалии “Мақоми Фарзона дар адабиёти муосири тоҷик”

Конференсияи байналмилалии илмӣ-амалӣ дар Театри мазҳака ва мусиқии ба номи Камоли Хуҷандӣ баргузор гардида, дар он шумораи зиёди олимону донишмандони дохилу хориҷи мамлакат, ҳаводорони шеъри Шоири халқии Тоҷикистон Фарзона иштирок доштанд.

Раиси вилояти Суғд Раҷаббой Аҳмадзода зимни суханронӣ нахуст меҳмононро хайрамақдам гуфта, иброз дошт, ки зиёиёни кишвари мо дар муддати беш аз се даҳсолаи охир дар таҳкими давлатдории навини тоҷикон, муаррифии таъриху фарҳанги миллӣ, адабиёти оламшумул ва санъату ҳунар саҳми муносиб мегузоранд.

-Имрўз аз он ифтихормандем, ки дар замони истиқлоли давлатӣ таҳти сиёсати хирадмандонаи Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби давлату Ҳукумат хизматҳои аҳли илму адаб пайваста арҷгузорӣ гардида, бо баргузории чорабиниҳои мухталифи фарҳангию адабӣ мақому ҷойгоҳи онҳо мавриди қадршиносии бештар қарор мегирад.

Чунонки Пешвои муаззами миллат, муҳтарам Эмомалӣ Раҳмон дар китоби “Чеҳраҳои мондагор” таъкид намудаанд, “мардуми шарифи Тоҷикистон ҳуқуқи комили маънавӣ доранд, ки бо фарзандони фарзонаи миллат, саҳми беназири онҳо дар рушди тамаддуни умумибашарӣ ифтихор намоянд, осори гаронбаҳои онҳоро омўзанд ва ҳикмати ҷовидонаи абармардони миллии худро кутбнамои рўзгори хеш қарор диҳанд”.

Зеро ормонҳои волои истиқлол, меҳанпарастиву башардӯстӣ, озодфикриву озодманишӣ, илмомӯзиву маърифатпарварӣ, хайрхоҳиву таҳаммулгароӣ, ваҳдату дӯстӣ, хулоса ахлоқи ҳамидаву фазилатҳои неки инсонӣ мероси бегазанди тамоми ниёгони бузурги мо аст, ки мардуми тоҷик ва аҳли оламро ба сӯи ояндаи нек ва рӯзгори пурсаодат ҳидоят менамояд, — таъкид кард роҳбари вилоят.

Қайд карда шуд, ки конференсияи байналмилалии “Мақоми Фарзона дар адабиёти муосири тоҷик” ба фаъолияти адабии Шоири халқии Тоҷикистон Фарзона бахшида шудааст. Шоири халқии Тоҷикистон Фарзона аз зумраи адибони номваре ҳастанд, ки офаридаҳоя таҷассумгари андеша, ҷавҳар ва фитрати миллӣ ба ҳисоб рафта, дар ташаккули ғояи ватанхоҳӣ нақши муҳим доранд. Сабк ва услуби баёни нотакрори Фарзона навоварона буда, пешорӯи суханварон уфуқҳои тозаро мекушоянд.

Фарзона бо эҷоди ашъори баландмазмун, таблиғи арзишҳои бузурги ахлоқиву фалсафӣ шеъри моро ҷилои тоза бахшида, кохи пурҷалолу бегазанди адабиёти муосири тоҷикро ғанӣ гардонидааст. Маҷмуаҳои ашъори шоир бо номҳои “Барги сабз”, «Тулўи хандарез» «Шабохуни барқ”, «Ояти ишқ», «То бекаронаҳо», «Меъроҷи шабнам», «Қатрае аз Мўлиён», «Як ғунча роз», «Муҳри гули мино», «Сад барги ғазал», «Саду як ғазал», «Себарга», «Парниёни ҷон», «Ҳама гул, ҳама тарона» ва девони ғазалҳо, “Найшакар”, “Найсон”, “Ношири баҳор”, “Арғунуни офтоб”, “Модарнома” ва чандин китобҳои дигар бо накҳати атрбор зиндагии моро доим муаттару зебо месозанд.

Боиси ифтихор аст, ки осори Фарзона на танҳо дар Тоҷикистони азизамон, балки дар кишварҳои Россия, Амрико, Британияи Кабир, Фаронса, Олмон, Покистон, Эрон, Арабистони Саудӣ, Ироқ, Белорус, Ўзбекистон, Қирғизистон интишор ёфта, соли 2018 маҷмуаи ашъори шоир дар Эрон ва Афғонистон ба ҷоизаи “Шеъри сол” сазовор гардиданд.

Хизматҳои беназири Фарзона дар рушди адабиёти муосири тоҷик аз ҷониби давлату Ҳукумат, бахусус дастгирию таваҷҷӯҳи Пешвои муаззами миллат муҳтарам Эмомалӣ Раҳмон бо ордени “Шараф”, унвони Шоири халқии Тоҷикистон, Ҷоизаи давлатии Тоҷикистон ба номи Абўабдуллоҳ Рўдакӣ, ҷоизаи Иттифоқи нависандагони Тоҷикистон ба номи Мирзо Турсунзода қадр гардидааст.

Изҳори боварӣ карда шуд, ки баргузории конференсияи илмӣ-амалӣ саҳифаҳои ҷадидеро дар шинохти паҳлӯҳои ношинохтаи осору афкори шоира Фарзона боз хоҳад намуд.

Дар ҷаласаи ифтитоҳии конференсия ҳамзамон як қатор олимону донишмандон, ходимони давлативу ҷамъиятӣ, аҳли зиё ва шоирон, аҳли ҳунар доир ба палҳуҳои гуногуни эҷодиёти Фарзона ибрози андеша намуданд.