23 Октябрь 2024
Недоступен ни однин перевод.
Дар шаҳри Хуҷанд ба истиқболи 35-солагии Истиқлоли давлатии Ҷумҳурии Тоҷикистон бунёди садҳо иншооти ҷашнӣ идома дошта, дар ин раванд ба таҷдиду навсозии иншооти соҳаи маориф таваҷҷуҳи зарурӣ зоҳир мегардад.
Бунёди бинои иловагии Гимназияи №1-и шаҳри Хуҷанд аз зумраи чунин иншооти ҷашнӣ ба шумор рафта, то таҷлили 35-солагии солагии Истиқлоли давлатӣ сохта ба истифода дода мешавад.
Зимни боздид аз ин муассисаи таълимӣ ва мулоқоту суҳбат бо ҷомеаи омӯзгорон, масъулини соҳаи сохтмон ва меъмории мақомоти иҷроияи ҳокимияти давлатии вилоят ва шаҳри Хуҷанд Раиси вилояти Суғд Раҷаббой Аҳмадзода иброз дошт, ки бо дастгириҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои баланд бардоштани сатҳу сифати таълиму тарбия ва ба камол расонидани насли босаводи миллат тамоми шароит фароҳам гардида, бо мақсади фарогирии хонандагон ба донишандӯзӣ дар синфхонаҳои барҳавову замонавӣ ва муҷаҳҳаз бо аёниятҳои хониш дар тамоми шаҳру навоҳии вилоят иншооти соҳаи маориф сохта ба истифода дода мешавад.
Бо дарназардошти зиёд шудани толибилмон зарурати бунёди бинои иловагӣ дар назди Гимназияи №1 ба миён омадааст. Зеро имрӯзҳо дар ин муассисаи таълимӣ дар ду баст зиёда аз 3100 хонанда ба таълиму тарбия фаро гирифта шуда, ба онҳо 102 нафар омӯзгор сабақ меомӯзанд. Бинои иловагӣ бо дастгирии мақомоти маҳаллии ҳокимияти давлатӣ ва саҳмгузории ширкатҳои сохтмонӣ сохта мешавад.
Раиси вилоят ба масъулин ҷиҳати омодасозии лоиҳаи бинои иловагӣ бо фарогирии тамоми имкониятҳо, аз ҷумла утоқҳои барҳавои таълимӣ, синфхонаҳои фаннӣ, ошхона, толори варзишӣ дастуру супоришҳои мушаххас дод. Таъкид гардид, ки бинои нав бояд барои фарогирии то 2000 нафар хонанда пешбинӣ карда шавад.
Сипас, роҳбари вилоят бо лоиҳаи сохтмони боз як бинои нави таълимӣ дар маҳаллаи навбунёди 26-уми шаҳри Хучанд шинос гардид. Тавре маълумот дода шуд, ин бинои нав барои истиқоматкунандагони маҳаллаҳои навбунёд пешбинӣ гардидааст. Мувофиқи лоиҳа бинои нави муассиса аз чор ошёна иборат буда, бо фарогирии утоқҳои таълимиву корӣ ва толори варзишиву ошхона сохта мешавад.
Бояд тазаккур дод, ки давоми нуҳ моҳи соли равон дар вилояти Суғд 52 иншооти соҳаи маориф бо 7975 ҷои нишаст дар як баст мавриди истифода қарор гирифтааст, ки намунаи олии татбиқи дастуру супоришҳои Пешвои миллат муҳтарам Эмомалӣ Раҳмон дар ин самт ба ҳисоб меравад.
Роҳбари вилоят барои боз ҳам мукаммалсозии лоиҳаи бинои нави таълимӣ ва зиёд намудани шумораи синфхонаҳову фарогирии бештари хонандагон ба масъулин дастуру супоришҳои мушаххас дод.
Дар ин рӯз роҳбари вилоят ҳамчунин сохтмони бинои таълими барои курсантони факултаи чоруми Академияи ВКД ҶТ дар шаҳри Хуҷандро мавриди таваҷҷуҳ қарор дода, барои бо сифати баланд ба охир расонидани корҳо супоришҳо дод.
