Раиси вилояти Суғд Раҷаббой Аҳмадзода бо раванди корҳои ободонӣ шинос шуд. Тавре зикр гардид, ба истиқболи ҷашни 35-солагии Истиқлоли давлатии Ҷумҳурии Тоҷикистон дар асоси лоиҳа аз пули куҳнаи шаҳр то пули «Ҷашнӣ» ба дарозии 2 км ва паҳноии беш аз 8 метр роҳрав бунёд шуда, таҷҳизоти муосири варзишӣ барои обутоби бадан, нишастгоҳҳои замонави гузошта мешавад. Дар маҷмуъ, ин мавзеъ ба макони истироҳативу варзишӣ табдил меёбад. Корҳои чароғонкунӣ ва панҷарабандӣ оғоз гардида, тибқи супориши Раиси вилоят дар муҳлати пешбинишуда бо сифати баланд ба анҷом расонида мешавад. Дар шафати соҳил бунёди биноҳои баландошёнаи гуногун дар назар дошта шудааст, ки метавонад шаҳри Хуҷандро ҳамчун маркази сайёҳиву истироҳатӣ дар минтақа муаррифӣ намояд.

Раиси вилоят ба масъулин барои татбиқи лоиҳа ва бо сифати баланд иҷро намудани корҳо супоришҳои мушаххас дод. Таъкид гардид, ки соҳили дарё ҳамеша макони дӯстдоштаи сокинон ба ҳисоб меравад ва бо назардошти ин бояд минтақаи истироҳатӣ ба талаботи рӯз ҷавобгӯ бошад. Татбиқи лоиҳаҳо дар ду соҳили дарёи Сир марҳилаи нави рушд дар шаҳри Хуҷанд арзёбӣ карда мешавад.