01 Июль 2024
Недоступен ни однин перевод.
Рӯзҳои 23-30-юми июни соли 2024 дар шаҳри Лондони Британияи Кабир Олимпиадаи байналмилалии «TееnEаglе 2024» аз фанни забони англисӣ баргузор гардид. Олимпиадаи мазкур аз рўи 3 категорияи синнусолӣ ва 2 номинатсия доир гардида, байни хонандагони синфҳои 3-11 сурат гирифт. Дастаи мунтахаби вилояти Суғдро 12 нафар хонандагон аз муассисаҳои таълимии вилоят муаррифӣ намуда, эшон мақомҳои ифтихориро ба даст оварданд.
Субҳи имрӯз дар майдони Парчами миллии Ҷумҳурии Тоҷикистон ғолибонро муовини Раиси вилояти Суғд Зайнура Азимӣ, муовини Раиси шаҳри Хуҷанд Муяссара Қаҳҳорӣ, сардори раёсати маорифи вилоят Мадина Набизода, омӯзгорон ва волидайн истиқболи гарм намуданд.
Зайнура Азимӣ, муовини Раиси вилоят хонандагони ғолибро аз номи Раиси вилояти Суғд Раҷаббой Аҳмадзода табрику таҳният гуфта, зикр дошт, ки дар суханрониҳои Президенти мамлакат муҳтарам Эмомалӣ Раҳмон борҳо таъкид мешавад, ки «…Ғамхорӣ кардан ба илму маориф, яъне ҳалли масъалаҳои дар ин самт ҷойдошта — сармоягузорӣ ба хотири рушди неруи инсонӣ — саҳмгузорӣ ба иқтидори иқтисодии мамлакат мебошад».
Тарбияи чунин истеъдодҳо ба дониш ва маҳорати педагогии устодон вобастагии зич дорад. Омӯзгори бомаҳорату ватандӯст метавонад донишварзони ҳақиқӣ ва поквиҷдон тарбия намояд, ки ба миллату Ватан хидмати софдилона намоянд. Хушбахтона, сафи чунин омӯзгорон ва шогирдон рӯз ба рӯз бо афзудани мунтазами ҳавасмандии моддии онҳо аз тарафи Ҳукумати мамлакат меафзояд.
Бояд таъкид намуд, ки дар Олимпиадаи байналмилалии «TeenEagle» 2 нафар аз Муассисаи таълимии ғайридавлатии «Гулчини маърифат» дар шаҳри Хуҷанд Пӯлод Каримов ва Азамат Каримов иштирок намуда, мақомҳои дуюм ва сеюмро ба даст оварданд. Ҳамчунин Манучеҳр Зокиров, хонандаи литсейи физикӣ-математикии №1-и ба номи академик Муҳаммад Осимии шаҳри Хуҷанд ширкат варзида ҷойи сеюмро соҳиб гардид.
Бояд қайд, ки дар олимпиадаи мазкур беш аз 2140 нафар хонанда аз 66 кишвари дунё ширкат варзиданд. Манучеҳр Зокиров, хонандаи синфи 5-и литсейи физикӣ-математикии №1-и ба номи академик Муҳаммад Осимии шаҳри Хуҷанд аз рӯйи ду номинатсия: “Малакаи қабулкунӣ” ва “Малакаи истеҳсолӣ” иштироки фаъолона намуда, мақоми сеюм ва соҳиби Ифтихорнома гардид.
Ҷоиз ба зикр аст, ки дар ин олимпиада муҳассилини Муассисаи таълимии давлатии «Мактаби Президентӣ» дар шаҳри Бӯстон ва Муассисаи таълимии ғайридавлатии Мактаби хусусии «Амид»-и ноҳияи Бобоҷон Ғафуров низ мақомҳои ифтихориро ба даст оварданд.