27 Июн 2024
Сулҳу ваҳдат – ҳаёти пурсаодат
Ҳамдиёрони азиз!
Аз номи Мақомоти иҷроияи ҳокимияти давлатии шаҳри Хуҷанд шумо, сокинони сарбаланди шаҳр ва кулли ҳамдиёронро бо ҷашни фархундаи миллат – Рўзи ваҳдати миллӣ табрику таҳният гуфта, бароятон сиҳативу саломатӣ ва саодати зиндагиро таманно менамоям.
Шоистаи зикр аст, ки падидаи беназири замони истиқлол расидан ба Созишномаи умумии истиқрори сулҳ ва ризоияти миллӣ ба шумор рафта, дар саҳифаи таърих бо ҳарфҳои заррин сабт шудааст. Мафҳуми Истиқлол ва Ваҳдат арзиши баробар дошта, ҳамчун ғояи миллӣ дар замиру андешаи мо ташаккул меёбад. Чуноне Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар яке аз суханрониҳояшон таъкид намудаанд: «Ваҳдат барои мо як вожа ва калимаи одӣ нест, балки номаи тақдири мо, шарти пешрафти кишварамон ба сўйи ояндаи ободу осуда ва муҳимтар аз ҳама, кафили сарҷамъию хушбахтии имрўзу ояндаи халқамон аст». Дар мавриди дигар изҳор доштаанд, ки “Рисолати давлату Ҳукумати кишвар таъмини рушди устувори иқтисодиёт ва дар ин замина баланд бардоштани сатҳу сифати зиндагии мардум, тарбияи насли аз лиҳози ҷисмониву маънавӣ солим, ҳифзи сулҳу субот ва ваҳдати миллӣ аст”.
Ин рўзи таърихӣ, воқеан ба марҳалаи нави такомули давлати соҳибистиқлоламон оѓоз бахшида, барои татбиқи ҳадафҳои созандаи давлат заминаи устувору мусоидро фароҳам овард. Бо итминони комил гуфта метавонем, ки ин ҳама ободиву осудагии Ватани маҳбубамон – Тоҷикистон меваи шаҳдбори истиқлолият ва ваҳдати миллӣ мебошад.
Дар партави сиёсати хирадмандонаи Асосгузори сулҳу ваҳдати миллӣ – Пешвои миллат, Президенти кишвар мўҳтарам Эмомалӣ Раҳмон мамлакати азизи мо сол аз сол рушду нумўъ дорад ва вилояти Суѓду шаҳри бостонии Хуҷанд дар қатори аввали ин пешравиву тараққиёт қарор гирифтааст. Бунёди корхонаву муассисаҳои саноатӣ, гулгашту хиёбон, иншооти таъйиноташ гуногун, биноҳои маъмуриву истиқоматӣ ҳама бозгўи онанд, ки Ватани мо ба ҳадафҳои пешгузоштаи хеш ноил гардида истодааст ва ба мардум зина ба зина зиндагии шоиста муҳайё мешавад.
Эътимоди комил дорам, ки мо дар ҳамбастагию шукргузорӣ аз Ватани соҳибистиқлол, аз ин неъмати бузург – сулҳи бебозгашти тоҷикон, аз ваҳдати миллиамон, хонаи умумии хеш – Тоҷикистони пешрафтаро бо меҳнати сидқидилонаву садоқати бепоён ҳифз мекунем, тамоми қувваю нерўи хешро ба он равона месозем, ки Тоҷикистон дар арсаи ҷаҳон мавқеи худро боз ҳам устувор созад.
Ба истиқболи шоистаи ҷашни 35-солагии Истиқлоли давлатии Ҷумҳурии Тоҷикистон ва сазовор ҷашн гирифтани Рўзи ваҳдати миллӣ дар қаламрави шаҳри Хуҷанд даҳҳо тадбири созанда ва ояндабинона амалӣ шуда истодааст, ки хуҷандиёни меҳнатқарин барои сарсабзу хуррам гардонидани шаҳри азиз ҷидду ҷаҳд менамоянд.
Бори дигар ҳамаи шумо – ҳамшаҳриёни азизро бо ҷашни ҳуҷаставу муқаддаси Рўзи ваҳдати миллӣ самимона муборакбод намуда, ба ҳар хонадон оромиву хушбахтӣ ва рўзгори ободу осуда орзу менамоям.
Бигзор ваҳдати миллии халқи тоҷик ҳамеша пойдору устувор ва ҷовидона бошад!
