05 Июнь 2024
Недоступен ни однин перевод.
Дар толори тарабхонаи “Суғдиён”-и шаҳр, Суди сайёри шаҳри Хуҷанд баргузор гардид, ки дар он парвандаи маъмурии Ҷаҳонгир Маҳкамов, маъмури тарабхонаи "Жасмин" бо моддаи 481 қисми 1 -и Кодекси ҳуқуқвайронкунии маъмурӣ мавриди баррасӣ қарор гирифта, мавсуф бо 110 нишондиҳанда барои ҳисобҳо, яъне ба маблағи 7 ҳазору 920 сомонӣ ҷаримабандӣ карда шуд.
Ҳамчунин якчанд аъмоли нафар ашхоси ба сеҳру ҷоду ва фолбинӣ машғулбуда, бо иштироки васеъи сокинони касбу кори гуногун мавриди баррасӣ қарор гирифт.
Иттилоъ дода шуд, ки дар натиҷаи гузаронидани чорабиниҳои оперативӣ-ҷустуҷӯйӣ аз ҷониби кормандони ШВКД ҶТ дар шаҳри Хуҷанд муайян карда шуд, ки шаҳрванд Джиянова Сухсиройи 58 сола, сокини микроноҳияи 3-юм бо роҳи фиреб бар ивази аз шаҳрвандон гирифтани маблағи пулӣ дар хонаи истиқоматиаш машғули сеҳру ҷоду ва фолбинӣ гардида, бо ин амалаш қисми 1, моддаи 482-и Кодекси ҳуқуқвайронкунии маъмурии Ҷумҳурии Тоҷикистонро вайрон намудааст. Нисбати мавсуф парвандаи ҳуқуқвайронкунии маъмурӣ оғоз ва ҷазои маъмурӣ дар намуди ҷарима ба маблағи 2880 сомонӣ таъин карда шуд.
Ҳамин тавр, дар натиҷаи санҷиши муштарак Бимукаррам Саидова, сокини кӯчаи Варзишгарон низ муайян карда шуд, ки дар хонаи истиқоматиаш машғули сеҳру ҷоду ва фолбинӣ гардида, бо роҳи фиреб аз шаҳрвандон пул меситонад.
Сокини кӯчаи Пайрав Сулаймонии шаҳр Нуриддин Иброҳимов, истиқоматкунандаи микроноҳияи 31-ум Ҳафизахон Тоштемирова ва сокини кӯчаи Шараф Барноҷон Бобоҷонова низ дар ин радиф қарор гирифтанд ва ба чунин амал, яъне ба сеҳру ҷоду ва фолбинӣ машғул гардида, роҳи осони пулкоркуниро дарёфтаанд ва ба ин тоифа парвандаи маъмурӣ оғоз ва ба маблағи 2880 сомонӣ ҷаримабандӣ карда шуданд.
Дар натиҷаи гузаронидани санҷиши муштарак аз ҷониби кормандони мақомоти ҳифзи ҳуқуқ ва тартибот муайян карда шуд, ки сӯфии масчиди Шайх Маслиҳадтин Абдураззоқ Солибоев ва посбони ин масчид Қодирҷон Ахмедов низ бо роҳи фиреб бар ивази аз шаҳрвандон гирифтани пул дар ҷои кор ба сеҳру ҷоду ва фолбинӣ машғул буданд, ки онҳо низ бо ин амали нангин дастгир карда шуданд.
Ба эшон низ тибқи талаботи қисми 1, моддаи 482-и Кодекси ҳуқуқвайронкунии маъмурии Ҷумҳурии Тоҷикистон парвандаи ҳуқуқвайронкунии маъмурӣ оғоз ва нисбаташон ҷазои маъмурӣ дар намуди ҷарима ба маблағи 2880 сомонӣ таъин карда шуд.
Номбаршудагон аз ин кирдори худ сахт пушаймон гардида, иқрор шуданд, ки то ба имрӯз ба мардумфиребӣ машғул буданд ва назди иштирокдорони Суди сайёр ваъда доданд, ки дигар ин кирдорашонро такрор намекунанд.
Дар Суди сайёр муовини сардори Раёсати ҳифзи тартиботи ҷамъиятии ВКД Ҷумҳурии Тоҷикистон полковники милитсия Ҳотам Дадобойзода ва иҷрокунандаи вазифаи сардори ШВКД ҶТ дар шаҳри Хуҷанд, полковники милитсия Авазхон Азиззода иштирок намуда, таъкид доштанд, ки имрӯзҳо дар ҷомеаи мо нафароне, ки аз худ муллову фолбин тарошида, мардумфиребиро барои хеш як василаи рӯзгузаронӣ қарор додаанд, зиёд ба чашм мерасанд. Аксар мизоҷони ин нафарони ба ном табибу сеҳргар бонувон буда, барои табобат, аз дарди дил ва фарзанддор шудан, гармиву сардӣ намудани шахсе ба назди онҳо мераванд. Ҳарчанд сеҳр намудану фол дидан, ҷодугарӣ кардан тибқи оини мусалмонӣ гуноҳи азим ба ҳисоб равад ҳам, мутаассифона мардум аз сабаби паст будани маърифату содагии хеш ба назди ин тоифа мераванд ва ин нафарони мардумфиреб, ки гӯё аз ғайб ҳарф мезананд ва мушкилоти нафари корафтодаро комилан бартараф карда метавониста бошанд, эшонро дилпур менамоянд ва ваъдаи дар муҳлати муайян гӯё “ҳал” шудани мушкилоташонро медиҳанд. Ҳол он ки, худашон дар ҳалли мушкилоти хеш зимни боздошташон аз ҷониби кормандони милитсия оҷиз монданд.
Аз шаҳрвандон эҳтиромона хоҳиш менамоем, ки баъди тамошои ин наворҳо, хулосабарорӣ намуда, ҳаргиз ба суханони макромези чунин тоифа дода нашаванд, бо ақлу имони солим муносибат намуда, танҳо ба такя ба тибби муосир мушкилоти худро ҳал намоянд.
Дафтари матбуоти
Раиси шаҳри Хуҷанд
