Чернобилчиён ёдбуд намуданд

25 Апрел 2018

Дар каҳвахонаи «Фирдавс»-и шаҳри Хуҷанд бахшида ба Рӯзи ёдбуди бартарафкунандагони садамаи Нерӯгоҳи барқӣ-атомии Чернобил ҷамъомади идона баргузор гардид.

Ғайрат Эшонқулов, мудири бахши ҳифзи иҷтимоии аҳолии Мақомоти иҷроияи ҳокимияти давлатии шаҳри Хуҷанд ба аҳли нишаст номаи сипоси Раиси шаҳри Хуҷанд Маъруф Муҳаммадзодаро расонид, дар он аз ҷумла омадааст: «26 апрели соли 1986 бар асари садама  дар яке аз агрегатҳои Нерӯгоҳи барқи атомии Чернобил ҳодисаи мудҳише ба вуқӯъ пайваст, ки бар асари он дар якчанд давлатҳои ҷаҳон ифлосшавии радиатсионӣ мушоҳидашуда, аксари аҳолии ҳамшафат зарар диданд. Мутаасифона бо вуҷуди он, ки аз ин ҳодисаи мудҳиш 32 сол сипарӣ шуда бошад, ҳам вале доғу осори он то ҳол дар ҳаёту фаъолияти иштирокчиёни бартарафкунии ин садама аз байн нарафтааст.

Ҷиҳати бартараф намудани ин ҳодисаи мудҳиш аз Ҷумҳурии Тоҷикистон аз ҷумла, аз шаҳри Хуҷанд низ  120 нафар ҷавонмардон бо ҳисси баланди ватандӯстӣ барои анҷом додани ин амали башардӯстона ширкат варзиданд. Онҳо собит намуданд, ки барояшон амнияти аҳли  башар, ободии Ватан ва дӯстии халқҳо арзиши бебаҳоаст. Бар асари оқибатҳои ин садама даҳҳо нафари онҳо ба бемории радиатсионӣ гирифтор шуда, баъзеашон бармаҳал аз ҳаёт рафтанд. Хотираи неки ин фарзандони ҷоннисори Ватан  дар дилу дидаи мо абадӣ боқӣ хоҳад монд».

Таъкид карда шуд, ки гузаронидани Рӯзи ёдбуди бартарафкунандагони садамаи барқии атомӣ, аёдати беморон, қадршиносӣ аз фаъолияти аъзоёни ҷамъияти «Иттифоқи Чернобилчиён», дар арафаи 30-юмин солгарди садамаи Нерӯгоҳи барқӣ-атомии Чернобил гузошташудани Муҷассамаи ёдгории фавтидагон бартарафкунандагони садамаи Нерӯгоҳи барқӣ-атомии Чернобил дар «Боғи Ғалаба»-и шаҳри Хуҷанд арҷ гузоштан ба хотири фавтидагон бар асари ин садама ва аз дастгириву ғамхории пайвастаи роҳбарияти шаҳру вилоят дарак медиҳад.

Бояд қайд намуд, ки имрӯз дар шаҳри Хуҷанд Ташкилоти ҷамъиятии «Иттифоқи Чернобил» 47 нафар чернобилчиёнро сарҷамъ намудааст, ки аз онҳо 30 нафарашон маъюбони гурӯҳҳои 1,2,3 мебошанд. Ҳамчунин аз 63 нафар кӯдакон 5 нафар маъюб аз волидайни иштирокчии садама тавлид гардида, 22 оилаи бесаробонмонда ба қайд гирифта шудааст.

Сипас, ба аъзои ин ташкилоти ҷамъиятӣ тӯҳфаҳои Раиси шаҳри Хуҷанд Маъруф Муҳаммадзода тақдим карда шуд.

Дафтари матбуоти
Раиси шаҳри Хуҷанд