Шиносоии ҷавонон аз рӯзгори аскарон

13 Октябр 2017

Субҳи имрӯз дар яке аз қисмҳои низомии комендатураи ҳарбии горнизони вилояти Суғд мустақар дар шаҳри Хуҷанд бо иштироки беш аз 100 нафар ҷавонони синни тодаъватӣ ва аскарону афсарони қисми ҳарбии номбурда Рӯзи дарҳои кушод баргузор гардид.
Бахтиёр Исматҷонов, мудири бахши кор бо ҷавонон ва варзиши Мақомоти иҷроияи ҳокимияти давлатии шаҳри Хуҷанд дар ҳузури ҷавонон ва аскарону афсарон зикр намуд, ки чорабинии мазкур бо мақсади баланд бардоштани ҳисси ватандӯстию ватанпарастии онҳо, эҳтиром ба арзишҳои миллӣ, ошноӣ аз будубоши аскарон дар қисмҳои низомӣ, ҷалби бештари ҷавонон баҳри хизмат ба Артиши миллӣ гузаронида мешавад.
Ҷавонони синни тодаъватӣ бо шароити хизмати сарбозон, ҷойи хоб, ошхона, ҳаммом, лавозимоти ҷангӣ шиносоии наздик пайдо намуда, аз маводи хӯрокаи сарбозон низ чашиданд. Сипас мудири бахши кор бо ҷавонон ва варзиши шаҳри Хуҷанд Бахтиёр Исматҷонов ба 10 нафар афсарону сарбозони қисми ҳарбӣ барои хизматҳои намунавиашон сипоснома ва тӯҳфаҳои хотиравӣ тақдим намуд.
Дар охири чорабинӣ аз ҷониби оркестри нафасӣ барномаи фарҳангӣ намоиш дода шуд.

Дафтари матбуоти
Раиси шаҳри Хуҷанд