20 Феврал 2017
Ҳамасола аз ҷониби ташкилоти ғайритиҷоратии русиягии фонди институти Аврупоии тадқиқотӣ беҳтарин донишҷӯёни вилоят ба гирифтани мукофоти идрорпулии ба номи Дмитрий Иванович Менделеев сазовор мешаванд.
Дирӯз дар факултети филологияи тоҷики Донишгоҳи давлати Хуҷанд маросими супоридани идрорпулӣ ба ғолибони навбатӣ доир шуд. Хуршеда Содиқова танзимгари ин ташкилот аз номи ин ҷамъият кулли ҷавононро ба муносибати эълон шудани соли 2017- соли ҷавонон табрик намуда, қайд кард, ки ташкилоти мазкур бо мақсади тақвияти дониши донишҷӯён ва мустаҳкам намудани робитаи ҷавонони кишвар бо Русия ин ҷоизаро ташкил намуда, то имрӯз наздик ба 110 нафар донишҷӯёни фаъол чунин идрорпулиҳоро додааст.
Раъно Бобоҷониён, муовини Раиси Ҳизби Халқии Демократии Тоҷикистон зимни суханронии хеш қайд намуд: «Дар тамоми кишварҳои дунё ҷавонон ба ҳайси як нерӯи бузурги бунёдкор ва пешбарандаи ҳаёт эътироф гардидаанд ва таҳкими нерӯи иқтисодиву сиёсӣ ва иҷтимоии мамлакатро бе иштироки фаъолони ҷавонон тасаввур намудан душвор аст. Бешубҳа афзалиятҳои стратегӣ насиби он давлат ва ҷомеа мегардад, ки истифодаи самарабахши афкори пешрафта, пеш аз ҳама он нерӯи навоварро, ки густаришдиҳандаи асосии он ҷавонон мебошанд, аз худ менамоянд. Дар Барномаи ҲХДТ омадааст: «ҲХДТ минбаъд низ ба ҷавонон ҳамчун ба ояндаи миллату давлат, нерӯи тавоно, созанда ва ташаббускор таваҷҷуҳ карда, барои амалӣ шудани иқдомҳои бунёдкоронаи онҳо кӯшиш менамояд ва тавассути намояндагони худ аз тариқи мақоми қонунгузор ҳуҷҷатҳои меъёрии ҳуқуқиро таҳия мекунад.
Ҷиҳати рушди қобилияти зеҳнии ҷавонон, фароҳам овардани шароити мусоид барои дастгирии фаъолияти эҷодии онҳо ва муттаҳид сохтани ҷавонон дар татбиқи барномаҳои инноватсионӣ тадбирҳои мушаххас меандешад».
Мажейка Кирас Иозович, ноиби президенти байналмилалии авруосиёии Академияи телевизион, радио ва матбуот, Академики академияи илмҳои Русия, мушовири давлатӣ, профессор дар баромади хеш аз робитаи ҳасанаи Русия бо Тоҷикистон сухан гуфт.
Сипас маросими қадршиносии донишҷӯён сурат гирифт. Боиси хушнудист, ки Бобоҷонов Хуршед, донишҷӯи курси 3, факултети сохтмон ва нақлиёти Донишкадаи политехникии Донишгоҳи техникии Тоҷикистон барои фаъолияти хубаш соҳиби идрорпулии ба номи Менделеев гардид.
Абдусабури Абдуваҳҳоб,
котиби матбуотии ДПДТТ
дар шаҳри Хуҷанд
