20 Август 2016
Мулоқоти навбатии Раиси шаҳри Хуҷанд Шарифзода Шариф Файз дар маҷлисгоҳи МТМУ №23 бо сокинони кумитаи маҳаллаи «Мевағул» барпо гардид.
Чун анъана шаҳрдор нахуст ҳозиринро аз нишондиҳандаҳои иқтисодию иҷтимоии шаҳр ва вазъи кунунии маҳаллаи 12-уми шаҳр шинос кард. Бино ба гуфти мири шаҳр ин микроноҳия аз сернуфустарин минтақаи маркази вилоят буда, дар он 18 ҳазор нафар аҳолӣ дар 4 ҳазору 866 оила ва 63 бинои баландошёна истиқомат мекунанд, ки 10- фисади аҳолии шаҳрро ташкил медиҳад. Дар ин маҳалла 5 кӯдкистону 3 мактаби таҳсилоти миёнаи умумӣ, 3 тӯйхона амал мекунад. Ӯ гуфт, ки сохтмони ин микроноҳия ба солҳои 80-уми қарни гузашта рост меояд. Аз он, ки тибқи нақшаи меъморӣ ин маҳал бо тарзу усулҳои нави меъморӣ бунёд ёфта буд, аксар орзу мекарданд, ки аз ин маҳалла соҳиби хона шаванд.
-Субҳи имрӯз ман микроноҳияро давр задам,-гуфт Шарифзода Шариф Файз,- дидам, ки корҳои ободонӣ хеле зиёд ба ҷо оварда шудаанд, аммо, дар қиёс бо минтақаи соҳили чапи шаҳр он хеле кам аст.
Раиси шаҳр барои исботи гуфтаҳояш мисол овард, ки дар маҳаллаи ба номи Содирхон Ҳофизи шаҳр 15 ҳазор мукаабметр кӯча мумфарш шудаасту дар ин маҳалла ҳамагӣ 2,95 ҳаз.мукаабметр. Ӯ аз иштироки худи аҳолӣ ёдовар шуда, гуфт, ки айни ҳол дар корҳои ободонӣ «50 бар 50» ба ҳукми анъана даромадаст, ки ин фоли нек аст. Яъне, маблағгузории корҳо 50% аз ҳисоби буҷету 50% аз ҷониби аҳолӣ, хусусан соҳибкорон сурат мегирад. Мутаассифона, ин амали хайр дар ин минтақаи шаҳр ба назар намерасад.
Шарифзода Шариф Файз нисбати чанде аз камбудиҳо эроди ҷиддӣ гирифт. Хусусан, беназорат мондани баъзе аз мавеҳои маҳалла, майдончаи назди биноро «мангирифт» кардани аҳолӣ, ноободӣ дар боғчаҳои бачагонаи №№31-32, нобасомониҳо дар қафои масҷиди ҷомеъи «Тақво» зери тозиёнаи танқиди сахт гирифта шуд, ки шаҳрдор масъулонро вазифадор кард, то ки нисбати ислоҳи камбудиҳо чораҷӯӣ намоянд.
Дар қисмати арзу дархости аҳолӣ маълум гардид, ки дар ин маҳалла низ муаммои асосӣ норасоии оби полезист, ки бинобар камчинии он дарахтон ба майдони холӣ табдил ёфтаанд. Дар ин бора раиси Шӯрои собиқадорони ҷангу меҳнати маҳалла Муззам Маҳмудов сухан кард. Роҳбарияти «Хуҷандобуканал» муаззаф гардид, то масъаларо дар мӯҳлати 1 ҳафта ҳаллу фасл намояд. Тибқи дастури шаҳрдор пардохти ҳаққи оби истифодашуда «50 бар 50» хоҳад шуд. Аниқтараш, 50 фисади маблағ аз ҳисоби аҳолвиу 50 фисади боқимонда аз ҳисоби буҷет пардохта мешавад.
Дархости сокини маҳалла, собиқадори мақомоти амнияти миллӣ ва ҷанги Афғонистон Амонулло Абдуллоев оид ба мавҷуд набудани чойхона дар микроноҳия буд Ҳалли ин масъала дар асоси дастуру супориши раиси шаҳр ин тавр бояд сурат гирад. Дар микроноҳия чанде аз иншоотҳои хусусӣ шуда, солҳост, ки бекор истодаанд. Ба шӯъби амволи давлатии шаҳр дастур шуд, ки кадом аз иншооте, ки зиёда аз 3 сол инҷониб истифода нашудааст, қарори хусусигардониаш бекор ва барои ташкили чойхона қарор нав ба тасиб расонида шавад. Ё ин ки, чойхона аз ҳисоби худи аҳолӣ дар назди кумитаи маҳалла сохта шавад.
Мулоқотро раиси шаҳр бо баёни фикру мулоҳизаҳояш ҳусни хотима бахшид ва якчанд нафар сокинонро, ки бо масъалаҳои шахсиашон ба мири шаҳр муроҷиат карданӣ буданд, дар алоҳидагӣ қабул кард.
