22 Апрел 2015
Дар асоси дастури Раиси вилояти Суғд Абдураҳмон Қодирӣ ҳоло дар маркази вилоят сабзпӯш ва гулзор намудани мавзеҳои истироҳатӣ, кучаю хиёбонҳо ва гулгаштҳои шаҳр идома дорад.Бо мақсади шиносоӣ аз мавҷудияти захираҳои гулу буттаҳои орошӣ ва сатҳу сифати парвариши онҳо Раиси шаҳри Хуҷанд Раҷаббой Аҳмадзода аз муассисаҳои кабудизоркунию гулпарварии шаҳр,- Идораи кабудизоркунӣ ва коргоҳи ғайридавлатии «Гулафшон», ки ҳамчунин ба парвариши гулҳои орошӣ машғул аст, дидан намуд.
Ҳоло дар муассисаҳои номбурда зиёда аз 30 намуд гулҳои ороишӣ аз қабили «Марҷонгул», «Питунья», «Голларгия», «Пагетис» ва ғайра парвариш меёбанд. Раиси шаҳри Хуҷанд роҳбарияти ин коргоҳҳои гулпарвариро муваззаф намуд,ки минбаъд барои қонеъ намудани талаботи тамоми ташкилоту муассисаҳои шаҳр бо гулҳои орошӣ фаъолитяи худро ба роҳ монанд. Баъдан Раиси шаҳри Хуҷанд ҳамроҳи мутахассисони соҳа ва идораи ободнию кабудизоркунӣ бо ҳолати воқеии сабзу гулпӯш гаштаи мавзеҳои шаҳр шинос шуд. Аз ҷониби Раҷаббой Аҳмадзода мавриди эътибор додан ба ороиш (дизайн), тарзи шинондан ва нигоҳубини онҳо дастурҳои мушаххас дод.
