10 Июл 2023
Субҳи имрӯз дар толори Мақомоти иҷроияи ҳокимияти давлатии шаҳри Хуҷанд таҳти роҳбарии Раиси шаҳри Хуҷанд Фирдавс Шарифзода, бо иштироки муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон Абдухолиқ Амирзода, муовини аввали Раиси вилояти Суғд Хол Ҳайдар, муовинони Раиси шаҳри Хуҷанд, роҳбарони мақомоти ҳифзи ҳуқуқ ва тартибот ва фаъолони хоҷагии халқи шаҳр оид ба натиҷаи фаъолият дар шаш моҳи аввали соли ҷорӣ ҷаласаи васеъ баргузор гардид.
Нахуст маърӯзаи муовини Раиси шаҳри Хуҷанд Бахтиёр Боқизода оид ба натиҷаҳои рушди иҷтимоию иқтисодии шаҳри Хуҷанд дар нимсолаи аввали соли равон ироа гардид.
Иттилоъ дода шуд, ҳаҷми истеҳсоли маҳсулоти саноатӣ бо назардошти истеҳсол ва фурўши обу барқ ба 738,9 миллион сомонӣ баробар гашта, нисбат ба ҳамин давраи соли сипарӣ 115,4 фоизро ташкил додааст. Аз ин миқдор ба маблағи 213,6 миллион сомонӣ ба хориҷи кишвар содирот карда шудааст, ки он нисбати нишондиҳандаи ҳамин давраи соли гузашта 26,3 млн. сомонӣ афзоиш ёфта, барои рушди иқтидори содиротии шаҳр заминаи устувор мегузорад. Маврид ба зикр аст, ки дар нимсолаи аввали соли равон 34 адад корхонаҳои нави хурду миёнаи истеҳсолии пурра бо таҷҳизотҳои замонавӣ муҷаҳҳазгардида таъсис дода шуда, шумораи умумии корхонаҳои саноатии шаҳр ба 241 адад расид, ки танҳо аз ҳисоби корхонаҳои нав бунёдгашта 208 нафар шаҳрвандон бо ҷойи кори доимӣ таъмин шуданд.
Ҳамзамон аз ҷониби 108 адад корхонаҳои хурду калон маҳсулотҳои ивазкунандаи воридот ба маблағи 369,8 млн. сомонӣ истеҳсол гардид, ки нисбат ба ҳамин давраи соли сипаригашта 47,4 млн. сомонӣ ё 14,7 фоиз зиёд мебошад. Дар ин марҳила аз 168 намуд маҳсулотҳои асосӣ истеҳсоли 112 намуд ё 66,7 фоиз нисбат ба ҳамин давраи соли 2022 зиёда аз 100,0 фоиз таъмин карда шудааст.
Илова бар ин, номгўи намуди маҳсулотҳои саноатӣ низ зиёд шуданд, ки онҳо асосан аз ашёи хоми маҳаллии аз ҷиҳати экологӣ тоза истеҳсол гардида, ба 17 давлатҳои муштараку манофеъ содирот карда шуда истодаанд. Ба онҳо истеҳсоли маҳсулоти армуғонӣ, маҳсулоти заргарӣ, собуни хоҷагӣ, пойафзоли бачагона ва дигарон мисол шуда метавонанд.
Таъкид шуд, ки натиҷаҳои рушди бонизоми бахши воқеъии иқтисодиёти шаҳр ва чораҳои андешидашудаи ин давра ба мо имкон дод, ки иҷрои нақшаи буҷети давлатӣ 110,5 фоиз ва буҷети маҳаллӣ 106,7 фоиз таъмин гашта, он боиси аз нақшаҳои пешбинишуда мутаносибан дар ҳаҷми 29,9 млн. сомонӣ ва 8,8 млн. сомонӣ зиёд ворид шудани андозҳо гардид. Нақшаи хазинаи иҷтимоии шаҳр 100,2 фоиз таъмин шуда, таъминоти нафақа саривақт ва пурра ба роҳ монда шудааст.
Бояд қайд намуд, ки қисми хароҷоти буҷети маҳаллӣ 99,7 фоиз таъмин гардида, аз ин сарчашма барои рушди соҳаҳои иҷтимоӣ бахусус маориф, тандурустӣ, фарҳанг ва ҳифзи иҷтимоии аҳолӣ 101,6 миллион сомонӣ ва ё 68,8 фоизи маблағҳои харҷгардидаи буҷетӣ равона карда шудааст.
Бояд қайд намуд, ки дар ин давра барои рушди соҳаҳои иҷтимоӣ барои эҳтиёҷоти иҷтимоӣ 72665,5 ҳазор сомонӣ ва ё 49,2 фоизи маблағҳои харҷгардидаи буҷетӣ равона карда шуда, аз ин ҳисоб қарздорӣ ва ё қафомонии пардохти музди меҳнат ҷой надорад. Музди меҳнат якҷоя бо маблағҷудокуниҳо барои эҳтиёҷоти иҷтимоии ба кормандони буҷетии аз ҳисоби буҷети маҳаллӣ пардохтгардида нисбат ба ҳамин давраи соли сипаригашта 13363,5 ҳазор сомонӣ зиёд ё 122,5 фоизро ташкил додааст.
Дар раванди бунёдкориву созандагӣ бинокорони шаҳр саҳми назаррас гузошта, аз ҳисоби ҳамаи манбаъҳои молиявӣ маблағгузории асосӣ 349,3 миллион сомониро ташкил дода, ба маблағи 286,2 миллион сомонӣ корҳои сохтмонию васлкунӣ ба анҷом расонида шуданд, ки он нисбат ба ҳамин давраи соли гузашта мутаносибан 180,0 ва 171,5 фоизиро ташкил медиҳад. Яке аз сарчашмаҳои корҳои ба сомон расида, ин маблағгузории мутамарказ буда, аз ин ҳисоб дар ҳаҷми 127,3 миллион сомонӣ корҳои сохтмонӣ ба анҷом расонида шудааст, ки он нисбат ба ҳамин давраи соли сипаригашта 145,7 фоизро ташкил медиҳад.
Бахтиёр Боқизода, муовини Раиси шаҳри Хуҷанд доир ба дигар нишондиҳандаҳои хоҷагии халқи шаҳр низ дар нимсолаи аввали соли равон маълумоти муфассал ироа намуд.
Раиси шаҳри Хуҷанд Фирдавс Шарифзода дар ҷараёни кори ҷаласа аз масъулини соҳаи саноат, занон, ҷавонон, ободонӣ, муассисаҳои коммуналӣ, иқтисод ва савдо, нақлиёти мусофиркашон, маҳаллаҳо ва ғайраҳо пурсиш ба амал оварда, ҷиҳати ислоҳи камбудиҳои ҷойдошта супоришҳои қатъӣ дод.
Абдухолиқ Амирзода, муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон намояндаи роҳбари гуруҳи кории Ҳукумати Ҷумҳурии Тоҷикистон дар шаҳри Хуҷанд оид ба таҷлили 35 солагии Истиқлолият, маҷмуан фаъолияти хоҷагии халқи шаҳри Хуҷандро дар давраи сипаришуда мусбат арзёбӣ ва миннатдорӣ баён карда, ҳамзамон аз фаъолон даъват ба амал овард, ки ҷиҳати бо дастовардҳои назаррас истиқбол намудани ҷашнҳои умумиллӣ, иҷрои босифати нақша-чорабиниҳои марбут ба 35 солагии Истиқлолияти давлатӣ ва рушди бемайлони шаҳр саъю кӯшиши бештар намуда, якдилона Ватани маҳбубамонро ободу мунаввар созем.
Хол Ҳайдар, муовини аввали Раиси вилояти Суғд баромад намуда, доир ба самти пешравиҳо дар шаҳр андешаронӣ намуда, ҳамзамон баҳри тақвияти корҳои ободонӣ, суръатбахшии иқтисодият ва маҷмуаъан сазовор пешвоз гирифтани ҷашни умумиллии 35 солагии Истиқлолияти давлатии Ҷумҳурии Тоҷикистон ба масъулин дастуру ҳидоятҳо дод.
Раиси шаҳри Хуҷанд Фирдавс Шарифзода зимни натиҷагирӣ аз фаъолияти нимсолаи аввали соли равон аз ҷумла таъкид дошт, ки имрўз мо аз фаъолияти тамоми соҳаҳои хоҷагии халқи шаҳр натиҷабардорӣ намуда, изҳори боварӣ менамоем, ки рушди бемайлони иқтисодию иҷтимоии шаҳр дар натиҷаи заҳмати софдилонаи тамоми фаъолон ва кулли мардуми шарафманди шаҳрамон таъмин гаштааст. Мақомоти иҷроияи ҳокимияти давлатии шаҳр ҷиҳати таъмини дастуру ҳидоятҳои Асосгузори сулҳу ваҳдати миллӣ – Пешвои муаззами миллат, Президенти Ҷумҳурии Тоҷикистон, муҳтарам Эмомалӣ Раҳмон, нишондодҳои Раиси вилоят Раҷаббой Аҳмадзода ва истиқболи сазовори ҷашни 35-солагии Истиқлолияти давлатии Ҷумҳурии Тоҷикистон тадбирҳои муассир меандешад.
Дафтари матбуоти
Раиси шаҳри Хуҷанд
