Масоили рушди саноат ва хоҷагию коммуналии Хуҷанд баррасӣ гардид

Раиси шаҳри Хуҷанд Фирдавс Шарифзода ҷаласаро ҳусни оғоз бахшида, афзуд, ки мо ҳамагон иқдоми ояндабинонаи Асосгузори сулҳу ваҳдати миллӣ, Пешвои муаззами миллат, Президенти Ҷумҳурии Тоҷикистон, мўҳтарам Эмомалӣ Раҳмон, ки солҳои 2022-2026 «Солҳои рушди саноат» эълон намуданд, бо мамнуният ҷонибдорӣ намуда, дар раванди рушди босуръати ин соҳа ташаббусҳои некро амалӣ гардонида, чораҳои судманд андешида истодаем. Давоми 3 моҳи соли ҷорӣ ҳаҷми истеҳсоли маҳсулоти саноатӣ бо назардошти истеҳсол ва фурўши обу барқ ба 368,4 миллион сомонӣ баробар гашта, нисбат ба ҳамин давраи соли сипарӣ 123,5 фоизро ташкил додааст. Аз ин миқдор ба маблағи 99,6 миллион сомонӣ ба хориҷи кишвар содирот карда шудааст, ки он нисбати нишондиҳандаи ҳамин давраи соли гузашта 900,0 ҳазор сомонӣ афзоиш ёфта, барои рушди иқтидори содиротии шаҳр заминаи устувор мегузорад.

Сипас муовини Раиси шаҳри Хуҷанд Бахтиёр Боқизода доир ба бурду бохти соҳаи саноат маълумоти муфассал дода, аз ҷумла иттилоъ дод, ки дар семоҳаи аввали соли равон 20 адад корхонаҳои нави хурду миёнаи истеҳсолии пурра бо таҷҳизотҳои замонавӣ муҷаҳҳазгардида таъсис дода шуда, шумораи умумии корхонаҳои саноатии шаҳр ба 228 адад расид, ки танҳо аз ҳисоби корхонаҳои нав бунёдгашта 134 нафар шаҳрвандон бо ҷойи кори доимӣ таъмин шуданд. Ҳамзамон аз ҷониби 92 адад корхонаҳои хурду калон маҳсулотҳои ивазкунандаи воридот ба маблағи 172,2 млн. сомонӣ истеҳсол гардид, ки нисбат ба ҳамин давраи соли сипаригашта 8,1 млн. сомонӣ ё 4,5 фоиз зиёд мебошад. Дар ин давра аз 151 намуд маҳсулотҳои асосӣ истеҳсоли 95 намуд ё 62,9 фоиз нисбат ба ҳамин давраи соли 2022 зиёда аз 100,0 фоиз таъмин карда шудааст. Инчунин номгўи намуди маҳсулотҳои саноатӣ низ зиёд шуданд, ки онҳо асосан аз ашёи хоми маҳаллӣ истеҳсол гардида, ба 17 давлатҳои муштараку манофеъ содирот карда шуда истодаанд. Ба онҳо истеҳсоли маҳсулоти армуғонӣ, маҳсулоти заргарӣ, собуни хоҷагӣ, пойафзоли бачагона ва дигарон мисол шуда метавонанд.

Таъкид шуд, ки дар давраи ҳисоботӣ бо иштироки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Ҷамъияти масъулияташ маҳдуди “Азияполитекс” дар Минтақаи озоди иқтисодии “Суғд” бо маблағгузории соҳибкорони ватанӣ ва ҷалби сармояи хориҷӣ, ки зиёда аз 4,0 млн. доллари амрикоиро ташкил медиҳад, ба истифода дода шуд. Дар корхона панҷ хатти муосири технологӣ, ки аз Ҷумҳурии Мардумии Чин ва Туркия ворид гардидааст, бо ҷалби мутахассисони ватанӣ васлу насб шуда, халтаҳои полипропилении калонҳаҷм бо ғунҷоиши аз 500 килограмм то 3 тонна истеҳсол карда мешавад.

Инчунин фаъолияти корхонаи мазкур ба таври шабонарўзӣ ба роҳ монда шуда, 300 нафар кормандон дар се баст фаъолият менамоянд.

Қайд кардан бамаврид аст, ки чораҳои амалишуда ҷиҳати афзоиш ёфтани иқтидори истеҳсолии маҳсулотҳои рақобатпазиру воридотивазкунанда, ҷойҳои нави корӣ, ҳаҷми сармоягузории дохилию хориҷӣ, ҳаҷми маҳсулоти содиротӣ ва манбаҳои андоз ба буҷети давлатӣ заминаи устувор гузоштанд.

Маврид ба зикр аст, ки барои азнавсозии технология ва муҷаҳҳаз гардонидани корхонаҳои саноатӣ зиёда аз 20,1 миллион сомонӣ сармояҳои дохилию хориҷӣ ҷалб карда шудааст.

Дар стратегияи рушди кишвар афзалияти бештар ба рушди соҳаи энергетика дода шуда, ба роҳ мондани истифодаи оқилонаву сарфакоронаи захираҳои энергетикӣ аҳамияти рўзафзун дорад.

Дар давраи ҳисоботӣ мувофиқи маълумоти идораи фурўши барқи шаҳр ба миқдори 235,3 миллион кВт/соат нерўи барқ интиқол карда шуд. Маблағи пардохти умумии он 93,6 млн. сомонӣ ё 114,0 фоиз, аз ҷумла аз тарафи аҳолӣ 54,5 млн. сомонӣ ё 122,0 фоизро ташкил менамояд.

Сипас, муовини аввали Раиси вилояти Суғд Хол Ҳайдар аз масъулини соҳа доир ба фаъолияташон пурсиш ба амал оварда, роҳбарони як қатор корхонаҳои саноатии шаҳрро барои афзун намудани ҳаҷми истеҳсолот муваззаф намуд. Ҳамзамон ҷиҳати коркарди ниҳоии нахи пахта дар корхонаҳои Хуҷанд, эҳёи корхонаҳои дўзандагӣ, ба коранадозии корхонаҳои азкормонда, омодаасозии корхонаҳои консервабарорӣ ба мавсими нав, иҷрои ўҳдадориҳои андоз ва ғайраҳо масъалагузорӣ карда шуданд.

Зимни баррасии масоили хоҷагию коммуналӣ ба рушди соҳа, мутобиқ намудани хизматрасонӣ ба талаботи имрўза, баланд бардоштани маърифати шаҳрдорӣ, ҷалби сокинон ба корҳои ободонию созандагӣ, мумфаршкунии роҳҳо, таъмини оби нӯшокӣ, тозагии муҳити зист ва ғайраҳо таваҷҷуҳ зоҳир гардида, ба масъулин ҷиҳати бартараф намудани камбудиҳо муҳлат дода шуд.