Дар ҳамоиш муовини Раиси шаҳри Хуҷанд Ҷамшед Набизода, муовини раиси Кумитаи иҷроияи Ҳизби Халқии Демократии Тоҷикистон дар вилояти Суғд Фирдавс Салимов, раиси Шӯрои иттифоқҳои касабаи вилоят Шарифулло Абдуллозода ва раиси Кумитаи иҷроияи Ҳизби Халқии Демократии Тоҷикистон дар шаҳри Хуҷанд Мунзифа Ҷабборӣ дар бораи мазмуну муҳтавои Паёми Президенти мамлакат ба Маҷлиси Олӣ баромад намуданд.

Таъкид шуд, ки мамлакати соҳибистиқлоли мо ба марҳилаи рушди таърихие ворид мешавад, ки барои он тақвияти ҳамешагии низоми посухгӯӣ ба равандҳои сиёсию иҷтимоӣ ва иқтисодию маънавии ҳаёти дохилии ҷомеа, минтақа ва байналмилалӣ аҳаммияти аввалиндараҷа касб менамояд. Таъмини бархӯрд мутавозин бо ин равандҳо ба ҳузури иродаи босуботи сиёсӣ алоқамандӣ дорад, ки он дар мавқеъгириҳои расмӣ, баёнияҳо, ҳуҷҷатҳои барномавии рушд ва дигар санадҳои меъёрии ҳуқуқӣ таҷассум меёбад.

Дар Паёми навбатии Сарвари давлат бурду бохти хоҷагии халқи мамлакат ва фаъолияти Ҳукумати Тоҷикистон соҳа ба соҳа таҳлилу баррасӣ гардид. Ҳамзамон самтҳои асосии фаъолият барои соли 2025 ва солҳои минбаъда ба таври мушаххас нишон дода шуданд. Аз ин нуқтаи назар метавон гуфт, ки ин ҳуҷҷати таърихӣ роҳнамои аҳли ҷомеа мебошад ва иҷрои дастуру ҳидоятҳои Пешвои муаззами миллат муттаҳидию сарҷамъии ҳамагонро тақозо менамояд.

Воқеан ҳам, дар муддати сию се соли соҳибистиқлолӣ ҷумҳурии тозаистиқлоли Тоҷикистон, ки дар ибтидои ин марҳила қувваҳои зиёди дохилию берунӣ ба мавҷудияту рушди он ҳар гуна монеаҳо пеш меоварданд, зина ба зина аз парокандагию харобӣ берун омада, раванди муназзами рушд ва пешравиро соҳиб гардид. «Ҳоло ҷумҳурии мо, — таъкид намуданд Сарвари давлат,- дар марҳилаи нави тараққиёт қарор дошта, бо амалӣ намудани стратегияву барномаҳои иқтисодию иҷтимоӣ ба дастовардҳои назаррас ноил мегардад».

Аммо дар вазъи ниҳоят ноороми ҷомеаи муосири ҷаҳонӣ нигоҳ доштани суръати муназзами рушд, татбиқи стратегияю барномаҳои гуногунмуҳлати иқтисодию иҷтимоӣ ва расидан ба ҳадафҳои асосӣ сиёсати ниҳоят дурбинонаро талаб менамояд. Бесабаб нест, ки Президенти Тоҷикистон ба ин масъала таваҷҷуҳ намуда, омилҳои асосии таъсиргузорро ба рушди иқтисодию иҷтимоии ҷумҳурӣ як ба як номбар намуданд. Пеш аз ҳама, Пешвои миллат нооромию низоъҳо дар минтақаҳои гуногуни олам, шиддат гирифтани мухолифатҳои сиёсӣ ва таҳримҳо байни давлатҳои абарқудрат, мусаллаҳшавии бошитоб, «ҷанги сард», тағйирёбии иқлим, канда шудани занҷираҳои таҳвили молу маҳсулотро омилҳои асосии берунаи таъсиргузор ба иқтисоди мамлакат ҳисобиданд. Албатта, барои пешгирӣ кардани таъсири манфии ин ва дигар омилҳои ҷойдошта ҷумҳурии моро зарур аст, ки пайваста тадбирҳои саривақтӣ ва таъминкунандаи назму низоми тараққиётро қабул намояд.

Паёми ҳамасолаи Президенти кишвар мӯҳтарам Эмомалӣ Раҳмон ба Маҷлиси Олии Ҷумҳурии Тоҷикистон ба сифати як роҳнамо дар рушди иқтисодиву иҷтимоии Тоҷикистон нақши хеле муҳим дорад. Сокинони шаҳри Хуҷанд, алалхусус ҳизбиён мекӯшад дар иҷрои саривақтии дастуру супоришҳои Пешвои миллат, ки дар Паём ироа гардид, саҳми назарраси худро гузоранд.