Хуҷанд. 13 январ. Нишасти матбуотии Раиси вилояти Суғд Қоҳир Расулзода, ки субҳи имрӯз дар Кохи матбуоти Хуҷандшаҳр баргузор гардид, ба ҳисоботи раисони шаҳру навоҳӣ ва сохторҳои давлатии вилоят дар ҳузури намояндагони васоити ахбори  умум оғоз бахшид.
Нимаи дуюми рӯз Раиси шаҳри Хуҷанд Раҷаббой Каримов дар толори мақомоти иҷроияи ҳокимияти давлатии шаҳр бо хабарнигорони рӯзномаҳо, оҷонсиҳои иттилоотӣ, радиою телевизионҳои шаҳрию  вилоятӣ, ҷумҳуриявӣ ва хориҷӣ муоширати  рӯ ба рӯ орост. Дар он роҳбарони воҳидҳои сохтории мақомоти иҷроия низ иштирок доштанд.

Хуҷанд. 12 январ. Ҳанӯз солҳои 70-уму 80-уми асри гузашта дар қисмати соҳили рости шаҳри Хуҷанд ба хотири фароғати сокинон тавассути шинондани дарахтони сояафкан ва нишасткурсиҳову насби ҳар гуна таҷҳизоти варзишии бачагона боғе бо номи «Дӯстии халқҳо» бунёд шуд. Бо мурури замон ин мавзеи истироҳатӣ аз назарҳо пинҳон монд ва ба гӯшаи фаромӯшӣ афтод. Вале номаш то ба ҳол боғи «Дӯстии халқҳо» аст.

Хуҷанд. 12 январ. Тибқи Қарори Маҷлиси вакилони халқи  шаҳри Хуҷанд рӯзи якшанбеи 19 феврали соли 2012 дар ҳавзаи интихоботии рақами 13 интихоботи миёнадаврии вакили Маҷлиси вакилони халқи шаҳри Хуҷанд баргузор мегардад.

Аз ин ҳавза номзадии иҷрокунандаи вазифаи Раиси шаҳри Хуҷанд Раҷаббой Аҳмадҷонович Каримов ба вакилии маҷлиси шаҳрии вакилони халқ пешниҳод гардида, он аз ҷониби комиссияи ҳавзавии интихобот пазируфта шуд.

Раиси комиссияи шаҳрии интихобот Мақсудҷон Иномҷонов Шаҳодатномаи номзад ба вакилии Маҷлиси вакилони халқи шаҳри Хуҷандро ба Раҷаббой Каримов супорид.

Хуҷанд. 10 январ. Имрӯз дар толори маҷлисҳои мақомоти иҷроияи ҳокимияти давлатии шаҳри Хуҷанд бо иштироки роҳбарони воҳидҳои сохтории мақомоти иҷроия, корхонаҳо, ташкилоту муассисаҳо, мақомоти ҳифзи ҳуқуқу тарбибот, намояндагони васоити ахбори  умум таҳти раёсати Раиси шаҳр Раҷҷаббой Каримов маҷлиси фаъолон баргузор гардид.

Аз хусуси натиҷаҳои рушди иҷтимоию иқтисодии шаҳр дар соли 2011 муовини аввали Раиси шаҳр Иброҳимҷон Иброҳимов муфассал ҳисобот дод. Дастовардҳои аҳли заҳмати ҳамаи соҳаҳои хоҷагии халқи шаҳри Хуҷанд дар соли сипаришуда дилпуркунандаанд. Ҳаҷми истеҳсоли маҳсулоти саноатӣ назар ба нишондиҳандаҳои як сол пешина 19,8 фоиз афзуда, он дар маҷмӯъ 323,7 миллион сомониро ташкил дод. Барои таҷдиди техникӣ ва навсозии технологии корҳонаҳои саноатии қаламрави шаҳр беш аз 2 миллион доллари амрикоӣ сармояи хориҷию дохилӣ равона карда шуд.

Хуҷанд. 1 январ. Шафати Майдони «Ситораҳои Хуҷанд», ки он ҷо арчаи солинавии наздик 20-метра бо бозичаҳою силсилачароғакҳои ҳарранга ороста шудааст, маркази чорабиниҳои умумишаҳрии солинавӣ қарор гирифт.

Дар саҳнаи идгоҳ оғоз аз 15 декабр ҳамарӯза тадбирҳои фарҳангӣ, ғолибан консерти дастаҳои ҳунарӣ ва муғанниёну овозхонон, ситораҳои эстрадаи шаҳри Хуҷанду вилояти Суғд доир гардиданд.

Хуҷанд. 31 декабр. Рӯзи гузашта дар толори маҷлисҳои мақомоти иҷроияи ҳокимияти давлатии шаҳри Хуҷанд, бо иштироки собиқадорони меҳнат, ҷавонон ва фаъолони шаҳр ба муносибати 75-солагии собиқ котиби якуми кумитаи шаҳрии Ҳизби Коммунисти Тоҷикистон Шаҳрванди фахрии шаҳри  Хуҷанд Акобир Қозихонович Умаров ҷамъомади тантанавӣ баргузор гардид.

Раиси шаҳри Хуҷанд Раҷаббой Каримов соҳибҷашнро аз номи мақомоти иҷроияи ҳокимияти давлатии шаҳр бо ин рӯзи фархундаи ҳаёташ табрик намуда, чун рамзи эҳтиром ва арҷгузорӣ аз хизматҳои тӯлониаш тӯҳфаи хотиравии мақомоти иҷроияро тақдим дошт.