Асосӣ БойгонӣБа бинои иловагии гимназияи №1-и шаҳри Хуҷанд санги асос гузошта шуд

Ба бинои иловагии гимназияи №1-и шаҳри Хуҷанд санги асос гузошта шуд

(1 овоз, миёна 1.00 аз 5)

12 Декабр 2024

Имрӯз бо иштироки Раиси вилояти Суғд Раҷаббой Аҳмадзода ва Раиси шаҳри Хуҷанд Фирдавс Шарифзода ба бинои иловагии гимназияи №1-и шаҳр санги асос гузошта шуд.

Раиси вилояти Суғд Раҷаббой Аҳмадзода дар маросими гузоштани санги асос барои синфхонаҳои иловагии гимназияи №1-и шаҳри Хуҷанд дар ҳузури аҳли таълимгоҳи номбурда изҳор дошт, ки алъон дар ҳудуди вилоят бинобар афзоиш ёфтани аҳолӣ бунёди ҳамасола 50 адад мактаби нав ва 20 адад кӯдакистон бунёд карда мешавад ва ин иқдомот то ҷашни 35 солагии Истиқлолияти давлатии Ҷумҳурии Тоҷикистон идома хоҳад ёфт. Хушбахтона ин иқдоми Давлату Ҳукуматро соҳибкорон, аҳолӣ ва шахсони алоҳида дастгирӣ намуда, дар бунёди иншооти соҳаи маориф саҳми муассир гузошта истодаанд.

Роҳбари вилоят гуфт, ки ин ҳама тадбир дар партави дастуру супоришҳои Асосгузори сулҳу Ваҳдати миллӣ, Пешвои миллат Президенти мамлакат муҳтарам Эмомалӣ Раҳмон сурат гирифта, сол ба сол масъалаи мушкилоти норасоии ҷои нишаст дар макотиби вилоят аз байн бурда мешавад.

Иттилоъ дода шуд, ки бунёди бинои иловагӣ ин муассисаи таълимӣ аз 5 ошёна ва таҳхона иборат буда, бо назардошти фарогирии 1400 нафар хонанда дар 2 баст то ҷашни 35 солагии Истиқлоли давлатӣ ба истифода дода хоҳад шуд.

Иқдом ва сохтмони ин бинои иловагии таълимӣ аз ҷониби 5 адад ширкати ватанӣ амалӣ карда мешавад, ки дар шаҳри Хуҷанд таҷрибаи хуби хонасозиро доранд.

Бо дуои собиқадорони соҳаи маорифи шаҳр ба сохтмони бинои иловагии гимназияи №1-и шаҳри Хуҷанд санги асос гузошта шуд.

Дафтари матбуоти
Раиси шаҳри Хуҷанд