10 Декабр 2024
Ба муносибати 50-солагии фаъолияти эҷодӣ ва 70-солагии мавлуди Шаҳрванди фахрии Хуҷанд, узви Иттифоқи журналистони Тоҷикистон Мавлуда Шарифзода дар толори Раёсати Донишгоҳи давлатии Хуҷанд ба номи академик Бобоҷон Ғафуров маҳфили адабӣ доир гардид, ки дар он ҳамкорону пайвандон, ҳамкасбону ҳамқаламон ва умуман, алоқамандони матбуоти давр ҷамъ омаданд.
Маҳфилро муовини Раиси шаҳри Хуҷанд Муяссара Қаҳҳорӣ ифтитоҳ намуда, мақсад аз таҷлили ҷашни ин сарсупурдаи касби рўзноманигорӣ Мавлуда Шарифзодаро матраҳ сохт ва суханро ба муовини Раиси вилояти Суғд Зайнура Азимӣ дод.
Зайнура Азимӣ Номаи табрикотии Раиси вилояти Суғд Раҷаббой Аҳмадзодаро ба муносибати 50-солагии фаъолияти эҷодӣ ва 70-солагии мавлуди ин устоди сухан қироат намуд. Дар номаи шодбошӣ омадааст, ки Мавлуда Шарифзода баробари фаъолияти рўзноманигорӣ, ҳамчунин ба эҷод ва нашри китоб даст зада, муваффақ гаштааст. Алалхусус, китобҳои “Ҷўрабек Муродов”, “Ҷамолу зиннати дунё”, “Нури зиндагӣ” ва “Тўхтабой Ғаффоров” маҳсули заҳматҳои Мавлуда Шарифзода мебошанд.
Маҳз тавассути дониши амиқу сабки махсуси роҳбарӣ тавонистааст, ки нашрияи «Тирози ҷаҳон»-ро ҳамаҷиҳата хонданиву ҷолиб гардонда, сол аз сол шумораи муштариёнро бештар намояд.
Номаи табрикотии Раиси шаҳри Хуҷанд Фирдавс Шарифзодаро Муяссара Қаҳҳорӣ ба самъи ҳозирин расонда, гуфт, ки мавҷудияти чунин шахсияти бузург дар матбуоти шаҳри Хуҷанд боиси ифтихор ва сарбаландист. Зимни қироати тарҷумаи ҳоли Мавлуда Шарифзода қайд гардид, ки фаъолияти журналистии ў баъди хатми донишгоҳ дар рўзномаи донишгоҳии “Маҳорати педагогӣ”, ки имрўз маъруф бо “Нури маърифат” аст, ба сифати сармуҳаррир оғоз шуда, солҳои 1980 - 1998 мудири шўъба ва муовини сармуҳаррир дар идораи рўзномаи вилоятии “Ҳақиқати Ленинобод” ва солҳои 1998-2013 сармуҳаррири рўзномаи шаҳрии «Тирози ҷаҳон» буд. Чанд сол сарварии шўъбаи вилоятии Иттифоқи журналистони Тоҷикистонро низ ба ўҳда дошт. Роҳбарии тўлонӣ дар рўзномаҳои вилоятиву шаҳрӣ маҳорати касбии ўро рушд дод.
Ў инсони масъулиятшинос, нисбат ба матбуоти тоҷик, устод ва мураббии чандин қаламкашони ҷавон буда, меҳнати пуршарафаш ва талошҳои шоистааш аз ҷониби давлату ташкилотҳои эҷодӣ қадр гардидааст. Хизматҳояш дар рушди журналистикаи тоҷик ва соҳаи фарҳанг бо унвони “Аълочии матбуоти Тоҷикистон”, “Аълочии фарҳанги Тоҷикистон”, Ҷоизаи ба номи Қосим Дайламӣ қадр шудааст. Соли 1980 “Журналисти беҳтарини сол” дар Тоҷикистон интихоб гардид. Соли 1984 соҳиби медали нуқраи Намоишгоҳи Комёбиҳои хоҷагии халқи Иттиҳоди Шўравӣ шуд. Соли 1996 Ҷоизаи ташкилоти байналхалқии Юнеско “Оини бародарӣ”-ро соҳиб гардид.
Соли 2003 ўро бо мукофоти давлатӣ, Ифтихорномаи Ҳукумати Ҷумҳурии Тоҷикистон қадр карданд. Ў барандаи Ҷоизаи давлатии ба номи Камоли Хуҷандӣ мебошад.
Табрикоти сардори Саридораи ҳифзи сирри давлатии назди Ҳукумати Ҷумҳурии Тоҷикистон Адҳам Абдуллозода қироат гардида, ба самъи ҳозирин расонида шуд.
Ҳамчунин, Замира Мансурӣ, муовини раиси Кумиҷроияи ҲХДТ дар вилояти Суғд номаи шодбошии раиси кумиҷроия Мирзоқосим Каримзодаро ба соҳибҷашн қироат кард.
Раиси шўъбаи суғдии Иттифоқи нависандагони Тоҷикис-тон устод Аҳмадҷони Раҳматзод ва котиби Иттифоқи журналистони Тоҷикистон дар вилояти Суғд Карим Шариф дар ҳаққи шахсияти ин қаламкаши моҳир суханони меҳрбор ба забон оварданд. Ба соҳибҷашн нишони “Ифтихор”-и Иттифоқи нависандагони Тоҷикистон тақдим гашт.
Дар қисмати адабӣ Шоири халқии Тоҷикистон Фарзона меҳрномаи худро, ки саршор аз лутфу самимият буд, иброз дошта, хотироту ёддоштҳои худро варақгардон намуд.
Устоди донишгоҳ Субҳони Аъзамзод дар мавзўи «Шинохти чеҳраҳои маъруф дар таълифоти Мавлуда Шарифзода» ва рўзноманигору адиб Хуршеда Содиқова дар мавзўи «Мавлуда Шарифзода – бонуи суханвар» маърўза карданд.
Ҳамкорону дўстон ва шогирдони устод Мавлуда Шарифзода суханони пурмеҳру самимии худро нисбат ба ин зани дилогоҳу дардошно, рўзноманигори варзида, адиби моҳир иброз доштанд. Аз ҷумла, Шоири халқии Тоҷикистон, сармуҳаррири маҷаллаи «Паёми Суғд» Толиби Озарахш, шоир Аъзами Хуҷаста, сармуҳаррири рўзномаи вилоятии «Ҳақиқати Суғд» Аминҷон Шарифзода, сармуҳаррири рўзномаи шаҳрии «Тирози ҷаҳон» Муҳайё Воситзода, муҳаррири телевизион ва радиои вилояти Суғд Ҷовид Ниёзӣ ва хабарнигори радиои «Озодӣ» Фарзон Машарифов аз хусуси хислатҳои наҷиб, дастгирии ҳамкорону шогирдон, хоксориву фурўтанӣ, донишмандиву фозилии ўро ба забон оварданд.
Фарзанди соҳибҷашн Дилноза Аҳмадзода барои ташкили чунин маҳфили хотирмон аз номи аҳли оила ва пайвандон сипос гуфта, ифтихормандии худро бо чунин модари бузург изҳор кард.
Маҳфили адабиро соҳибҷашн Мавлуда Шарифзода ба итмом расонида, сипоси худро ба Пешвои миллат мўҳтарам Эмомалӣ Раҳмон, Раиси вилояти Суғд Раҷаббой Аҳмадзода ва Раиси шаҳри Хуҷанд Фирдавс Шарифзода, Раёсати ДДХ ба номи академик Бобоҷон Ғафуров ҷиҳати ташкили маҳфили адабӣ ба муносибати 50-солагии фаъолияти эҷодӣ ва 70-солагии мавлуд баён намуда, ваъда дод, ки минбаъд низ барои тарбияи мутахассисони соҳаи матбуот кўшиш хоҳад кард.
Дафтари матбуоти
Раиси шаҳри Хуҷанд
