Асосӣ БойгонӣБУЗУРГДОШТИ МАВЛОНО: ХУРШЕДИ БЕҒУРУБ...

БУЗУРГДОШТИ МАВЛОНО: ХУРШЕДИ БЕҒУРУБ...

(1 овоз, миёна 1.00 аз 5)

27 Сентябр 2024

Бахшида ба Рӯзи Мавлоно Ҷалолиддини Балхӣ дар Коллеҷи тиббии шаҳри Хуҷанд ба номи Ю.Б. Исҳоқӣ чорабинии фарҳангӣ-адабӣ таҳти унвони «Хуршеди беғуруб» бо иштироки устодон ва донишҷӯёни ин муассисаи таълимӣ баргузор гардид.

Ин чорабинӣ ба ифтихори Рӯзи Мавлонои Румӣ аз тарафи омӯзгори кафедраи забони давлатӣ Мӯнисахон Умарова  гузаронида шуд. 
Донишҷӯёни фаъоли факултети кори ҳамширагӣ бо қироати шеърҳо дар васфи  Мавлоно Ҷалолиддини Румӣ  ва ашъори безаволи ӯ чорабинии адабӣ-фарҳангиро ифтитоҳ намуданд.
Аз тарафи донишҷӯи соли дуюми факултети кори табобатӣ Сараншоҳ Холов аз ҳаёти шоир бо далелҳои ҷолиби илмӣ маълумот пешкаш гардид. 
Донишҷӯён аз ғазалҳои ин шоир, ки ҳунармандон бо оҳанги махсус сурудаанд, рақсҳои ҷолибро ба намоиш гузоштанд.
Дар чорабинии фарҳангӣ-адабӣ мудири кафедраи умумидонишгоҳии забони тоҷикии ДДХ ба номи академик Б. Ғафуров номзади илмҳои филологӣ, дотсент, Ҳалимҷон Зоиров иштирок ва суханронӣ намуда, аз ашъори безаволи  шоири ҷаҳонй- «Маснавии маънавй» қиссаи «Баққол ва тӯтӣ»-ро шарҳ намуда, инчунин дар бораи қадру манзалати устоду шогирд ба аҳли нишаст андешаронӣ намуд.
  Дар  чорабинӣ донишҷӯёни факултети кори табобатӣ Султонбек Бобоёров ва Сараншоҳ Холов намунае аз ғазалиёти шоир «Ними шаб берун задам, рафтам пайи майхориям…»-ро бомаҳоратона суруда шуд. 
Чорабиниро  ҷонишини директор оид ба корҳои тарбия Мухбира Ҷӯрабоева натиҷагирӣ намуда, аз ҷумла таъкид дошт, ки ашъори гаронбаҳои Ҷалолиддини Румӣ нӯшдоруест дар тарбияти маънавии инсон, ки мо омӯзгорон масъулем, осори адибону нависандагони худро ба толибилмони худ омӯзонем ва онҳоро ба роҳи рост ҳидоят намоем. 
Баҳри гиромидошти Рӯзи Мавлонои Румӣ дар баргузории чорабинии фарҳангӣ-адабӣ таҳти унвони «Хуршеди беғуруб» ба масъули ин чорабинӣ Мунисахон Умарова, омӯзгори кафедраи забони давлатӣ ва донишҷӯёни факултети кори ҳамширагӣ пас аз хатми 9, факултети кори табобатӣ, роҳбари бадеии маҳфил миннатдории садорати коллеҷи тиббӣ расонида шуд.