Асосӣ БойгонӣИстиқболи ғолибони Чемпионати Осиё оид ба бокс

Истиқболи ғолибони Чемпионати Осиё оид ба бокс

(0 овоз, миёна 0 аз 5)

11 Сентябр 2024

Субҳи имрӯз дар майдони Парчами давлатии Ҷумҳурии Тоҷикистон дар шаҳри Хуҷанд ғолибони Чемпионати Осиё оид ба бокс, ки бо дастоварди назаррас ва бо руҳияи баланд ба Ватан баргаштанд, масъулини соҳа ва устодону собиқадорон ва волидайн бо эҳсоси гарми ватандӯстӣ истиқбол намуданд.

Ҷамшед Набизода, муовини Раиси шаҳри Хуҷанд ва Бахтиёр Исматзода, сардори Раёсати кор бо ҷавонон ва варзиши вилояти Суғд боксчиёнро бо ин дастоварди назаррас аз номи роҳбарияти Мақомоти иҷроияи ҳокимияти давлатии вилояти Суғд ва шаҳри Хуҷанд таҳният гуфта, барояшон дар мусобиқаҳои минбаъда барору зафарҳои нав таманно намуданд.
Ёдовар мешавем, ки дар Чемпионати Осиё оид ба бокс байни наврасон ва мактаббачагон, ки дар шаҳри Ал-Айни Аморати Муттаҳидаи Араб баргузор гардид, 7 нафар варзишгарони шаҳри Хуҷанд бо роҳбарии мураббиён Саидхӯҷа Мамуров ва Хуршед Абдуллоев иштирок намуда, соҳиби 3 медал (1 тилло, 1 нуқра ва 1 биринҷӣ) гардиданд.
Мусобиқа аз 27 август то 10 сентябр дар шаҳри Ал-Айни Амороти Муттаҳидаи Араб баргузор гардида, дар он байни мактаббачаҳо аз Тоҷикистон Анӯшервон Сиддиқов (33 кг) ба гирифтани медали тилло шарафёб гардид. Инчунин Фирӯзҷон Бойматов (37 кг) медали нуқра ва Дилшод Сиджаев (35 кг) медали биринҷиро ба даст оварданд. Варзишгарони мазкур дастпарвари мураббӣ оид ба бокси Муассисаи давлатии “Мактаби варзишии №3”-и шаҳри Хуҷанд Саидхӯҷа Мамуров мебошанд. Дар  чемпионати мазкур дар байни 149 варзишгар аз 24 давлати Осиё Анӯшервон Сиддиқов  “Беҳтарин боксчии Осиё” дониста шуд.