Асосӣ БойгонӣИфтихори мо: Профессор Азизулло Авезов бо медали “Хизмати шоиста” сарфароз гардид

Ифтихори мо: Профессор Азизулло Авезов бо медали “Хизмати шоиста” сарфароз гардид

(0 овоз, миёна 0 аз 5)

06 Сентябр 2024

Субҳи имрӯз дар бинои Мақомоти иҷроияи ҳокимияти давлатии вилояти Суғд ба ифтихори ҷашни 33-солагии Истиқлоли давлатии Ҷумҳурии Тоҷикистон ба кормандони касбу кори гуногун, ки дар фаъолияташон натиҷаҳои шоистаи таҳсин доранд, мукофотҳои давлатӣ ва унвонҳои фахрӣ супорида шуд.

Муовини якуми Сарвазири Ҷумҳурии Тоҷикистон Ҳоким Холиқзода ва Раиси вилояти Суғд Раҷаббой Аҳмадзода аз номи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба 43 нафар кормандони соҳаҳои гуногун мукофотҳои давлатиро супориданд.
Зимни тақдими мукофотҳои давлатӣ қайд карда шуд, ки хизматҳои онҳое, ки бо меҳнати босубот ва фидокоронаашон дар бунёди ҷомеаи навини кишвар ва рушди соҳаҳои он саҳми назаррас гузоштаанд, ҳамеша қадршиносӣ карда мешавад.
Сипас, дар вазъияти тантанавӣ 35 нафар кормандони соҳаҳои тандурустӣ, маориф, фарҳанг, матбуот, энергетика, варзиш бо медали «Хизмати шоиста», 1 нафар бо медали «Шафқат», 2 нафар бо унвони фахрии «Донори ифтихории Тоҷикистон» қадршиносӣ карда шуданд. Ҳамзамон ба 5 нафар кормандони соҳаҳои хизмати давлатӣ, маориф, саноату хизмати маишӣ «Ифтихорномаи Ҷумҳурии Тоҷикистон» супорида шуд.
Боиси ифтихор ва сарфарозист, ки устоди Донишкадаи политехникии Донишгоҳи техникии Тоҷикистон ба номиакадемик Муҳаммад Осимӣ дар шаҳри Хуҷанд профессор Азизулло Авезов бо медали “Хизмати шоиста” қадршиносӣ гардид.
Бояд қайд намуд, ки Авезов Азизулло Ҳабибович аз зумраи олимони мўътабар ва мураббиёни варзидаи муҳаќќиќони ҷавон ва донишҷӯён маҳсуб ёфта, 45 сол инҷониб пайгирона ва босамар ба фаъолияти илмӣ-таълимӣ машғул буда, ҳамчун иқтисодшинос дар байни олимони сатҳи ҷаҳонӣ ва ҷумҳурӣ эътироф гардидааст.
Азизулло Авезов худ хатмкардаи Донишгоҳи техникии Тоҷикистон буда, фаъолияти илмию педагогии худро ба ҳайси омӯзгори ин муассиса оғоз кардааст. Солҳои зиёдеро ба кори таълимӣ, илмӣ ва тарбияи олимони ҷавон бахшид. Аз моҳи сентябри соли 2010 фаъолияти меҳнатиашро дар Донишкадаи политехникии Донишгоҳи техникии Тоҷикистон ба номи академик М.С. Осимӣ ба ҳайси профессори кафедраи иқтисоди муҳандисӣ ва менеҷменти идома дод.
Соли 1986 Азизулло Авезов дар шаҳри Маскав дар мавзўи “Таъминоти самараноки энергетикии истеъмолкунандагони маҳаллаҳои кӯҳӣ (дар мисоли Ҷумҳурии Тоҷикистон) рисолаи номзадиашро ва соли 1999 рисолаи докториро дар мавзӯи “Ташаккулёбӣ ва рушди системаи миллии энергетикӣ (дар мисоли Ҷумҳурии Тоҷикистон”  ҳимоя намуд. Дар ин марҳила мавсуф худро ҳамчун мутахассиси ботаҷриба, донишманд, нисбат ба худ серталаб, принсипнок муаррифӣ намуд. Соли 2022 академики Академияи байналмилалии муҳандисӣ интихоб шуд.
Азизулло Авезов дар конфронсҳо, симпозиумҳо ва семинарҳои байналхалќӣ дар ИМА, Британияи Кабир, Малайзия, Финляндия, шаҳрҳои Маскав, Алмаато, Рига, Таллин, Тошкент, Бишкек, Душанбе дар мавзўъҳои  истифодаи манбаъҳои нерӯи барқароршаванда ва рушди устувори кишвар ва минтақа иштирок намудааст. Дар ин бахши илмӣ фаъолияти эшон хело назаррасанд. Аз тарафи ӯ 14  монография, 8 маводи методӣ-таълимӣ ва зиёда аз 250 мақолаҳои илмӣ ба чоп расиданд.
Профессор Авезов А.Ҳ. дар коркарди Стратегияи миллии рушди ҶТ барои давраи то соли 2030 фаъолона иштироқ кард. Таҳти роҳбарии ӯ 5 нафар рисолаҳои номзадӣ оид ба масъалаҳои мубрами тараққиёти иқтисодиёти Тоҷикистон ва вилояти Суғд ҳимоя намуданд. Ҳоло Авезов А.Ҳ. роҳбари илмии 2 рисолаи докторӣ, 3 рисолаи номзадӣ ва 2 рисолаи магистерӣ мебошад.
Профессор Азизулло Авезов барои хизматҳояш  бо унвони «Аълочии маориф ва илми Ҷумҳурии Тоҷикистон», Ифтихорномаи Раиси вилояти Суғд, Ифтихорномаи Вазорати рушди иқтисод ва савдои ҶТ, Ифтихорномаи Раиси шаҳри Хуҷанд ва якчанд ифтихорномаю сипосномаҳои директори ДПДТТ ба номи академик М.С. Осимӣ сазовор гардидааст.
Дастоварди навбатӣ ба Устод муборак бошад!