Асосӣ БойгонӣДар Хуҷанд санги асоси бинои Палатаи савдо ва саноати вилояти Суғд гузошта шуд

Дар Хуҷанд санги асоси бинои Палатаи савдо ва саноати вилояти Суғд гузошта шуд

(0 овоз, миёна 0 аз 5)

06 Сентябр 2024

Субҳи имрӯз дар нақша-чорабиниҳои ҷашни 35-солагии Истиқлоли давлатии Ҷумҳурии Тоҷикистон дар маҳаллаи "Ваҳдат"-и шаҳри Хуҷанд ба бунёди бинои маъмурии Палатаи савдо ва саноати вилояти Суғд санги асос гузошта шуд.

Дар маросими оғози корҳои сохтмонии бинои Палатаи савдо ва саноати вилояти Суғд Раиси вилояти Суғд Раҷаббой Аҳмадзода, муовини якуми Сарвазири Ҷумҳурии Тоҷикистон Ҳоким Холиқзода, Раиси Суди Олии Ҷумҳурии Тоҷикистон Шермуҳаммад Шоҳиён, Раиси Палатаи савдо ва саноати Ҷумҳурии Тоҷикистон Ҷамшед Ҷумъахонзода ва Раиси шаҳри Хуҷанд Фирдавс Шарифзода ширкат варзиданд.
Таъкид шуд, ки тибқи дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон омодагиҳо ба ҷашни 35-солагии Истиқлоли давлатии Ҷумҳурии Тоҷикистон идома дошта, дар вилоят 12 ҳазор иншооти гуногун ба истифода дода хоҳад шуд. Бинои маъмурии Палатаи савдо ва саноати вилояти Суғд низ иншооти ҷашнӣ буда, бо бунёду мавриди истифода қарор гирифтани он барои кормандон шароити мусоиди корӣ фароҳам оварда мешавад.
Фармоишгари иншоот Палатаи савдо ва саноати вилояти Суғд буда, пудратчӣ ҶДММ «Сохтмони Истиқлол» мебошад.
Бино аз таҳхона ва 4 ошёна иборат буда, дар он ҳуҷраҳои корӣ барои кормандон, толорҳои конфронсӣ, толорҳои намоиш, ошхона ва ғайра ҷойгир мегардад.
Мавриди зикр аст, ки Палатаи савдо ва саноати вилояти Суғд дар самти ташкил ва баргузор намудани намоишгоҳҳои минтақавию ҷаҳонӣ, муаррифии молу маҳсулоти Тоҷикистон дар сатҳи байналмилалӣ, дарёфти шарикони рушд ва ҷалби сармояи хориҷӣ хеле нақши муҳим дорад.
Танҳо дар давоми 8 моҳи сипаришудаи соли 2024 бо саҳм ва ташаббуси Палатаи савдо ва саноати вилоят 295 нафар соҳибкорон дар намоишгоҳҳои минтақавию байналмилалӣ ширкат варзида, 14 созишномаи ҳамкорӣ ба имзо расонида шудааст. Шумораи аъзои палата бошад аз 300 ба 400 нафар расонида шуд.