23 Май 2024
Эътимод ба ҷавонон
Ҳамдиёрони гиромӣ, ҷавонони саодатманди диёр!
Ҳамасола дар қаламрави Тоҷикистони соҳибистиқлол рўзи 23-юми май Рўзи ҷавонон эълом гардидааст ва ба ин муносибат тадбирҳои зиёди идона андешида, амалӣ карда мешаванд. Ба ин муносибат кулли ҷавонон ва сокинони сарбаланди шаҳрро бо Рўзи ҷавонони Ҷумҳурии Тоҷикистон табрику муборакбод менамоям, барояшон таҳсили хубу аъло, тарбияи неку шоиста, барори кору осудагии рўзгор хоҳонам.
Тавре Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар яке аз мулоқотҳояшон бо ҷавонони кишвар иброз кардаанд, «Ҷавонони мо давомдиҳандагони фаъолияти насли калонсол, нерўи тавоно ва иқтидори воқеии пешрафти ҷомеа, хулоса, ояндаи давлат буда, фароҳам овардани шароити мусоид барои фаъолияти онҳо минбаъд низ ҳамчун яке аз масъалаҳои муҳимтарини сиёсати ҳукумат боқӣ мемонад».
Кишвари соҳибистиқлоли мо ба сўи ояндаи босубот қадамҳои устувор мегузорад ва дар ин раванд таваҷҷўҳ ба қишри ҷавони ҷомеа дар меҳвари сиёсати давлату Ҳукумати кишвар қарор дорад. Воқеан ҳам, ҷавонони ғаюру шуҷои мо ин масъулияти хешро хуб дарк мекунанд ва дар эъмори давлати ҳуқуқбунёд, дунявӣ ва ягона саъю талош меварзанд.
Мақомоти иҷроияи ҳокимияти давлатии шаҳри Хуҷанд бо ҷавонони донишҷўву ихтироъкор, ватандўсту меҳанпарвар, соҳибкору варзишгар, мутахассису ҳунарманд ифтихор мекунад ва ташаббусҳои созандаи ононро ҷонибдорӣ мекунад.
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон дар яке аз суханрониҳояшон қайд намудаанд, ки “Хизмат кардан ба Ватан, аслан хизмат кардан ба падару модар ва бародарону хоҳарони машғули меҳнати осоишта аст. Зеро Ватан ва миллат ду рукни муқаддасест, ки бидуни онҳо ҳеҷ фард сари баланду ифтихори инсонӣ дошта наметавонад».
Таъсис ва баргузории озмунҳои ҷумҳуриявии “Тоҷикистон – Ватани азизи ман”, “Фурўғи субҳи доноӣ китоб аст”, “Илм – фурўғи маърифат” ва амсоли он маҳз барои рушди зеҳнии наврасону ҷавонон, санъатдўсту зебоипараст тарбия кардани онон, баланд бардоштани сатҳи донишу малакаи онон, кашфи истеъдодҳо равона гардидааст.
Таъсиси идрори Президенти кишвар, Раиси вилоят, Раиси шаҳр барои мактабиёну ҷавонони доништалабу фаъоли муассисаҳои таҳсилоти миёна ва олӣ ба ҳукми анъана даромадааст ва ҳар сол дар остонаи Рўзи ҷавонон сазовортарин ҷавонон ба гирифтани ин гуна идрорҳо шарафёб гардида истодаанд.
Мо бо ҷавононе, ки имрўз дар мусобиқаҳои гуногуни варзишии сатҳи шаҳриву вилоятӣ, ҷумҳуриявию ҷаҳонӣ иштирок намуда, сазовори ҷойҳои намоён шуда истодаанд, ифтихор мекунем ва барои дастгирии минбаъдаи онон талош меварзем.
Рўзи ҷавонон чун ҳамасола бо ташкил ва баргузории силсилаи чорабиниҳо бо иштироки васеи наврасону ҷавонон дар сатҳи баланди ташкилӣ гузаронида мешавад.
Ҷавонони шаҳри Хуҷанд чун фарзандони асили миллат марзу буми Ватани азизи худро чун гавҳараки чашм эҳтиёт мекунанд, ба қадри ин кишвари биҳиштосо мерасанд, барои пешрафти иқтисодиву иҷтимоӣ заҳмат мекашанд ва бо кору пайкори хеш идомаи неки падарони шуҷоу модарони арҷманд мегарданд.
Рўзи ҷавонони Тоҷикистонро ба кулли мардуми шаҳр, ҷавонон ва наврасон бори дигар шодбод мегўям. Бигузор шаҳру кишвари мо ҳамеша дар саргаҳи сулҳу амонӣ, пешрафту тараққиёт қарор дошта бошад ва ваҳдати ҷавонон пойбарҷо бимонад.
Рўзи ҷавонию баҳори зиндагонӣ муборак, ҳамдиёрон!
