Ҳамин гуна оилаи якдилу якмаром оилаи Охуновҳо аз кумитаи маҳаллаи Қорираҳмат Қурбонов мебошад, ки тайи 35 соли ҳамзистӣ намуна ба дигарон гардад. Сарвари оила марди бофарҳангу хушодоб, духтур-байтор, собиқадори меҳнат Расулҷон Охунов бо ҳамсари бовафою меҳрубон Санавбархон Охуноваи омӯзгори пешқадам тавонист як муҳити созгорро созмон диҳад. Аз рӯзи аввали ҳамзистӣ ин ду ҷавон ба ҳамдигар ваъда дода буданд, ки чи дар хушбахтӣ ва чи дар щамгинӣ паҳлӯи ҳам қарор гирифта, ҳамроҳ зиндагиро давом медиҳанд. Ҳамин тавр шуд. Махсусан, Санавбархон аз рӯзҳои аввалини арӯсиаш дар хонадони Охуновҳо худро ҳамчун духтараки хушзабону меҳантӣ, озодаву пазанда нишон дод. Аз ҳама муҳим, ҳеҷ гоҳ овозаш баланд набуд, ҳамеша «хуб шудаст» гӯён дар иҷрои кор мешуд. Ҳамин хислатҳои шоистаи Санавбархон ба дили хусуру хушдоман ва шавҳари азизаш ҷо шуданд ва онон ӯро дӯст доштанд.

Сарвари оила Расулҷон Охунов баъди хатми Институти хоҷагии қишлоқ, бахши духтур-ветеринарӣ зиёда аз 30 сол дар Фабрикаи парандапарварии ноҳияи Ҷаббор Расулов заҳмат кашид. Ӯ тайи ин солҳо барои ин коргоҳ, саломатии парандаҳо, зиёд кардани зоти ин парандаҳо, ободонии коргоҳ хизматҳои зиёд карда, барои фаъолияти бенуқсонаш борҳои бо сипосномаву ифтихорномаҳо сарфароз гардидааст. Ҳоло ҳам Расулҷон Охунов дар хизмати мардум қарор дошта, барои саломатии ҷонварон, молу ҳайвонот талош меварзад.

Санавбархон Охунова ҳамчун инсони хушрафтору некпиндор дар ҷамъият мақому манзалат дорад. Сисола собиқаи корӣ дар арсаи маориф дораду касби худро дӯст медорад. Барои донишандӯзии ҳар шогирдаш талош меварзад, шабҳо бедохобӣ мекашад, то ба онҳо чизеро дода тавонаду толибилмонаш дар ба чизе муваффақ гардад.

Ӯ аз авдоди бофарҳанг ба дунё омада, аз падару модари худ тарбия хуб гирифтааст. Баъди хатми Мактаби миёнаи №3-юми шаҳри Хуҷанд ба бахши томактабии Омӯзишгоҳи омӯзгорӣ дохил шуда, онро бо баҳои хубу аъло ба итмом расонд. Дар бощчаву кӯдакистонҳо ҳамчун мураббия фаъолия бурда, соҳиби обрӯву нуфуз гардид. Донишу маҳорат, ҷустуҷӯ, корбарии дақиқи Санавбархон ба ҳамагон мақбул буд. Бо тавсияи ёру дӯстон, ҳамкорон ва пайвандон азм намуд, ки муаллимаи синфҳои ибтидоӣ дар мактабҳои миёна гардад. Ҳуҷҷатҳояшро тахт кард ва ба риштаи синфҳои ибтидоии мактаби олӣ супурд. Малакаи касбӣ, ки аллакай дошт, донишгоҳро бомуваффақият ба итмом расонд ва ба таълими шогирдон шурӯъ кард. Чун соҳиби дипломи омӯзгори синфҳои ибтидоӣ гашт, пешниҳодҳо аз мактабҳои пешқадам бисёр буданд, вале Санавбар Охуноваи раҳмдилу бошафқат кор бо кӯдакони маъюбу имконияташон маҳдудро интихоб кард. Зеро ҳамеша ба онҳо раҳм дораду мехоҳад, ки онон дар ҷодаи зиндагӣ азоб накашанд, дониш гиранду аз пайи ягон коре шаванд. Бо ҳамин ниятҳои нек роҳ сӯи Мактаби интернати давлатӣ барои кӯдакони имконияташон маҳдуди ба номи Сироҷиддин Тоҷибоевро гирифт. Алҳол дар мактаб ба кӯдакони ноқисулақл, маъюбу имконияташон маҳдуд ҳамчун муаллимаи синфҳои ибтидоӣ дарс мегӯяд. Ӯ ба ин кӯдакони мӯҳтоҷ қабл аз ҳама ҳамчун модар, тарбиятгар, ҳамшираи шафқат, мураббӣ, хизматрасон, парастор, ошпаз ва даҳҳо дигар ёрдачӣ аст. Тавре ба ҳамагон маълум, шогирдони ин муассиса ба парастории омӯзгор мӯҳтоҷ буда, доимо дар бари омӯзгор қарор дорад. Муаллима Санавбар Охунова аз иҷрои чунин вазифаҳо мебарояд ва ӯро кулли шогирдонаш дӯст медоранд, зеро дар симояш, дар амалаш меҳрубониву щамхориро мебинанд.

Бале, ин оила намуна дар ҳама ҷиҳат ҳастанд. Баробари хизмат ба халқу меҳан, 3 фарзанд: Раҳимҷону Абдурауф ва Сабоатхонро ба роҳи рости зиндагӣ ҳидоят намуданд. Фарзандон дар ҷомеа мақому ҷойгоҳи худро ёфтаанд. Раҳимҷон сармуҳосиб дар бонку Абдурауф ҳунарманди чирадаст, Сабоатхон муаллима асту бо оилаҳои худ зиндагии тифоқро пеш мебаранд.

Оилаи намунавии Охуновҳо, воқеан сазовор ба таҳсину тавсиф ҳастанд. Дар ин хонадон ҳамеша хандаву хурсандӣ танинандоз аст. 8 набераи дилбанд ба хушбахтии ин ду сарвари оила хушрӯзии иловагиро зам мекунад.

Бошад, ки чунин оилаҳои намунавӣ афзоянду фарзандону наберагони меҳанпарасту заҳматпеша диёри азизамонро рушду ривоҷ диҳанд.