Воқеан, агар ба таърихи корномаҳои инсонҳои шарафманд назар афканем, воқиф мешавем, ки онон барои ривоҷу равнақи кишвари азизамон хизматҳои бузург анҷом додаанд. Бахусус, мардуми Хуҷандшаҳр барои пешрафти ин макони таърихии аҷдодӣ заҳматҳои зиёд кашидааст. Дар ин ҷода саҳми тамоми меҳнаткашони касбу кори гуногун назаррас аст.

Занеро, ки васф кардан мехоҳам, аз ҳамон табақаи заҳматпеша аст. Чеҳраи нуронии ў фариштаеро мемонад, ки кас аз тамошояш ҳаргиз сер намешавад. Бале, ў малаксимо асту сираташ ҳам ҳамин гуна. Исми ин модаркалони муборак Фотимахон Шукурова асту имрўз аз давлати пирӣ давр меронад. Ў зодаи Хуҷандшаҳр буда, 14-уми июни соли 1930 чашм ба олами ҳастӣ кушодааст. Ҳафт сол дар мактаб таҳсил намуда, хату савод омўхт ва чун Ҷанги Бузурги Ватанӣ оғоз шуд, ба заҳ-мати ақибгоҳ ҷалб гардид. Истеъдоди дўзандагӣ, ки дошт, барои аскарону афсарони ҳимоятчӣ либоси зимистона, баҳорона, фуфайка, тагпўш ва ғайра медўхт.

Сўҳбати кўтоҳи мо бо ин модаркалони нурониву дуогўй басо хотирмон буд. Ў таърихи зинда аст. Номи кулли қаҳрамонони Ҷанги Бузурги Ватаниро медонад ва ба наберагону аберагонаш нақл мекунад.

Тақдири ин инсони меҳнатдўсту ҳалолкор бо иштирокчии Ҷанги Бузурги Ватанӣ Рауф Ҳакимҷонов пайваст. Онҳо дар зиндагии ҳам-ҷоя соҳиби 5 фарзанд гардида, онҳоро ба роҳи рости зиндагӣ ҳидоятгар шуданд. Имрўз фарзандону наберагон дар вазифаҳои баланди давлатӣ хизмат менамоянду аз авлоди бошараф буданашонро исбот меку- нанд. Фотимахон Шукурова, 35 сол дар Беморхонаи бачагонаи вилояти Суғд фаъолият бурда, ҳамчун инсони озодаву ороста эътироф шудааст. Ҳамагон ўро дўст медоштанду аз сўҳбаташ лаззати маънавӣ мегирифтанд. Ҳоло низ ин пиразани нуронӣ бо суханони гуворову панду насиҳатҳои олимақомаш дили ҳамагонро тасхир мекунад.

Ба ин модаркалони арҷманд саломатии комил ва хотирҷамъӣ орзумандем.