07 Май 2024
Дар микроноҳияи 14-15-уми маҳаллаи Мевағули шаҳри Хуҷанд ҷамъомад оид ба расми кушоди лавҳаи хотиравӣ ва номгузорӣ намудани яке аз кўчаи номнадошта ба номи Ашўров Дадоҷон Турсунович баргузор гардид.
Муяссара Қаҳҳорӣ, муовини Раиси шаҳри Хуҷанд чорабиниро ифтитоҳ намуда, аз ҷумла афзуд, ки пос доштани хотираи арбобони давлатӣ, ҷамъиятиву сиёсӣ, ходимони илм, маориф, фарҳанг ва муҳофизони Ватан ба ҳукми анъана даромадааст. Чӣ тавре, ки ба ҳамагон маълум аст, соли сипаригардидаистода соли таърихӣ, ҷашни 30-солагии Конститутсияи Чумҳурии Тоҷикистон ва 79-умин солагии Рўзи Ғалаба дар Ҷанги Бузурги Ватании солҳои 1941-1945 мебошад. Бахшида ба ин соли ҷашнӣ номгузории яке аз кўчаи номнадоштаи микроноҳияи 14-15-уми маҳаллаи Мевағул ва пардабардорӣ аз лавҳаи ёдбуди шахси накўном Иштирокчии 16-умин иҷлосияи Шўрои олии Ҷумҳурии Тоҷикистон Ашўров Дадоҷон Турсунович, дар ҳаёти иҷтимоиву фарҳангии шаҳру вилоят рўйдоди воқеан хотирмон мебошад.
Зикр гардид, ки тибқи дархости аҳли оила ва пайвандони марҳум ва дар асоси қарори Маҷлиси вакилони халқи шаҳри Хуҷанд аз 10-уми марти соли 2024, таҳти №222 оид ба гузоштани лавҳаи хотиравӣ ва номгузорӣ намудани номи яке аз кўчаи номнадоштаи микроноҳияи 14-15-уми шаҳри Хуҷанд ба номи Ашӯров Дадоҷон Турсунович ба тавсиб расид.
Иттилоъ дода шуд, ки Ашўров Дадоҷон 6-уми майи соли 1939 дар шаҳри Хуҷанд таваллуд шудааст. Миллаташ тоҷик буда соли 1964 Донишкадаи политехники Тоҷикистонро хатм намудааст.
Фаъолияти меҳнатиашро ба ҳайси устои омўзиши касбҳои техникии №5-уми шаҳри Душанбе оғоз намуда, солҳои 1965-1971 дар вазифаҳои усто, прораб, прораби калони СМУ №8 ва СПМК №19 трести Тоҷикгидростройи Вазорати хоҷагии оби Тоҷикистон , солҳои 1971-1972 инструктори шуъбаи сохтмонии кумитаи партиявии вилояти Суғд, аз соли 1972 то соли 1974 дар вазифаи ҷонишини трести Тоҷикселинстрой, аз соли 1976 то соли 1977 ҳамчун сардори иттиҳодияи Тоҷиксовхозстрой, аз соли 1977 то соли 1979 роҳбари трести Гидростройи Глодностепстрой ва Ҷиззахстепстрой ва соли 1979 ба вазифаи директори Маъмурияти корхонаҳои бунёдшавандаи №6, Трести Главсредазирсов-хозстрой таъин гардидааст. Солҳои 1983 то соли 1985 ҳангоми сафари хизматӣ дар Ҷумҳурии Арабии Сурия ба ҳайси роҳбари муттахасисони назорати техникӣ, аз моҳи феврали соли 1985 то моҳи октябри соли 1985 ба ҳайси ҷонишини роҳбари трести Ирмонтажстрой, Гравсредазирсовхозстрой дар минтақаи Тоҷикистон ва аз соли 1985 то соли 1996 сардори Идораи сохтмони асосии комиҷроии вилояти Суғд фаъолият доштааст.
Барои иштироки фаъолона дар корҳои ташкиливу техникӣ ва пеш аз муҳлат сохтани истгоҳи обкашии Янтоқ соли 1976 бо Фармони Президиуми Шӯрои Олии ҶШС Тоҷикистон бо Ифтихорнома ва соли 1999 бо Фармони Президенти Ҷумҳурии Тоҷикистон бо ордени Шараф сарфароз гардонида шудааст. Якчанд маротиба вакили халқии шаҳрӣ, ноҳиявӣ ва вилоятӣ интихоб гардида иштирокчии Иҷлосияи таърихии 16-умин Шўрои Олии Ҷумҳурии Тоҷикистон буд.
Ашўров Дадоҷон Турсунович соли 2001 дар синни 62 солагиаш вафот кардааст.
Дар бораи кору пайкори Дадоҷон Ашӯров, ҳамсабақи марҳум, Ходими ҷамъиятию давлатӣ, Биҳоҷал Раҳимова низ суханронӣ намуд.
Аз номи пайвандон фарзанди Дадоҷон Ашўров –Давронҷон Ашўров ва хоҳари марҳум Дилбар Турсунова баромад намуда, барои чунин ғамхорӣ ба Давлату Ҳукумат миннатдорӣ намуд.
Сипас дар вазъияти тантанавӣ аз рўи лавҳаи ёдгорӣ парда бардошта шуд.
Дафтари матбуоти
Раиси шаҳри Хуҷанд