Дар доираи чорабинии мазкур аз ҷониби омўзгорони муассиса маърўзаҳои ҷолиб, дарсҳои кушод, бозиҳои шавқовари фаннӣ, ҳимояи лоиҳаву чорабиниҳои дигар ташкил карда шуданд, ки писанди меҳмонону иштирокдорони семинар гардид.

Ҷоиз ба зикр аст, ки Муассиса ҳамчун маркази методии омўзгорони муассисаҳои таҳсилоти миёнаи умумии вилояти Суғд, ки таҳсилашон ба забони русӣ ба роҳ монда шудааст, баромад карда, бо мақсади баланд бардоштани маҳорату малакаи касбӣ ва сатҳи тахассуси омўзгорон мунтазам ҷамъомаду вохўриҳо ва семинарҳои мухталиф оид ба баланд бардоштани сатҳу сифати таълим баргузор карда мешавад.

Бояд қайд намуд, ки Муассисаи давлатии буҷетии таҳсилоти миёнаи умумии Россия-Тоҷикистон «Мактаби миёнаи умумӣ дар шаҳри Хуҷанд ба номи А.П. Чехов» моҳи сентябри соли 2022 дар асоси Созишномаи Ҳукумати Ҷумҳурии Тоҷикистон ва Ҳукумати Федератсияи Россия аз 30 ноябри соли 2021 ба фаъолият оғоз намудааст.

Таҳсил дар муассиса дар асоси стандартҳои давлатии таълимии федералии Россия бо забони русӣ, бо омўзиши ҳатмии фанҳои забони тоҷикӣ, таърихи халқи тоҷик ва географияи Тоҷикистон, тариқи ройгон, аз ҳисоби маблағгузории ҷониби Федератсияи Россия ва Тоҷикистон ба роҳ монда шудааст. Хонандагони синфҳои поёнӣ бо як маҳал хўроки бепул таъмин карда мешаванд. Мактаб дорои шароити муосири техникиву технологӣ буда, бо тамому ашёву ҷиҳози таълим пурра таъмин карда шудааст.

Алҳол дар синфҳои 1-9 муассиса 1080 нафар хонандагон бо таҳсил фаро гирифта шуда, ба онҳо зиёда аз 70 нафар омўзгорони соҳибтаҷриба аз фанҳои мухталиф дарс мегўянд. Боиси қайд аст, ки аз теъдоди номбаршуда 19 нафарашонро омўзгорони баландихтисоси аз Федератсияи Россия ҷалбгардида ташкил медиҳанд.

Муассиса ғолиби озмуни «Мактаби беҳтарини Россия дар хориҷа», ки моҳи декабри соли 2023 дар шаҳри Москва баргузор гардид, дониста шудааст. Ҳамчунин, 14 нафар омўзгорони муассиса «Омўзгори беҳтарини Россия дар хориҷа» эътироф карда шуданд.

Хонандагони муассиса на танҳо кўшиш менамоянд, ки бо баҳои хубу аъло таҳсил намуда, таҳсилашонро минбаъд дар донишгоҳу донишкадаҳои бонуфузи ҷумҳуриву Федератсяи Россия идома диҳанд, балки иштирокчии фаъоли ҳамагуна озмуну олимпиадаҳои фанниии байналмилалӣ, умумироссиягӣ ва ҷумҳуриявӣ низ мебошанд. Давоми соли таҳсили гузашта 186 нафар хонандагон ғолибу ҷоизадори чунин озмуну олимпиадаҳо гаштанд. Чунончи, ду нафар хонандагони муассиа Шукурова Ойишахон ва Абдувоҳидов Фаррух дар Олимпиадаи байналмилалии хонандагон дар шаҳри Анталияи Туркия сазовори мақоми аввал гаштанд, хонандаи синфи 9 комилова Нозанин дар Олимпиадаи байналмилалии «TeenEagle», ки дар шаҳри Лондони Британияи Кабир баргузор гардида, сазовори ҷойи дуюм, хонандаи синфи 9-ум Мухамедова Амина дар Озмуни байналмилалии «Хайку», ки бо ташаббуси СММ ташкил карда шудааст, сазовори ҷойи сеюм, хонандаи синфи 4-уми Ахмедов Аҳмад дар Озмуни уммумироссиягии «Дар бораи Ватани худ нақл бикун» сазовори ҷои аввал, хонандагони синфи 8-ум дар Озмуни умумироссиягӣ бахшида ба муқовимат ба коррупсия сазовори ҷойи сеюм, муассиса шаш нафар хонадагони муассиса ғолиби даври ҷумҳуриявии Олимпиадаи фаннии хонандагон гаштанд. Ҳамчунин, чор нафар хонандагони мактаб дар байни 1517 нафари довталабон ғолиб омада, аз рўи лоиҳаи «Мағлубнашудагон» («Непкороенные») ба 14 шаҳрҳои ҷануби Россия сафар намуданд.

Имсол низ хонандагони мактаб дар озмуну олимпиадаҳо ва чорабиниҳои дигари сатҳи гуногун иштирок карда, соҳиби 6768 диплому ифтихорнома ва сертификатҳо гаштанд. Аз ҷумла, 12 нафар хонандагон ба давраи финалии Озмуни байналмилалии корҳои илмӣ-таҳқиқотии ба номи Д.И. Менделеев роҳ ёфта, 4 нафари онҳо дар шаҳри Москва ҷоизадори ин озмун гаштанд.

Алҳол 8 нафар хонандагони муассиса, ки аз байни ҳазорон нафар ғолиб омада, барои иштирок дар Фестивали умимҷаҳонии ҷавонон, ки охири моҳи феврал дар шаҳри Сочии Федератсияи Россия мегардад, роҳхат гирифта, барои сафар омодагӣ дида истодаанд.