Нахуст раиси Комиссияи даъвати наваскарон ба хизмати ҳарбӣ, муовини Раиси шаҳри Хуҷанд Бахтиёр Боқизода оид ба ҷамъбасти маъракаи даъвати тирамоҳии соли 2023 ба ҳозирин маълумот дод.

Иттилоъ дода шуд, ки бо мақсади иҷрои Фармони Президенти Ҷумҳурии Тоҷикистон аз 31-уми августи соли 2023 №621 “Дар бораи ба эҳтёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони соли таваллудашон 1996-2005-и Ҷумҳурии Тоҷикистон ба хизмати ҳарбӣ” тамоми чораҳо андешида шуд. Дар асоси Фармони мазкур қарори раиси шаҳр аз 26 сентябри соли 2023 №465 «Дар бораи даъвати шаҳрвандони солҳои таваллудашон 1996-2005 ба хизмати ҳарбии моҳҳои октябр – ноябри соли 2023» ба тасвиб расида, барои дар сатҳи зарурӣ гузаронидани маъракаи даъвати тирамоҳии соли 2023 тадбирҳои мушаххас роҳандозӣ гардид ва дар натиҷа нақшаи даъвати тирамоҳии наваскарон дар муҳлати муқарраргардида иҷро гардид. Дар мактаби ташкилоти мададгори мудофиаи шаҳри Хуҷанд 37 нафар ҷавонони синни даъватӣ барои соҳибкасб гардидан ба курси ронандагӣ омўзонида шуда, ба сафи Қувваҳои Мусаллаҳи Ҷумҳурии Тоҷикистон сафарбар карда шуданд. Дар давраи омӯзишӣ ба 3780 нафар ҷавонони синни даъватӣ даъватнома дода, он таҳлилу баррасӣ карда шуд. Баҳри босифат гузаронидан ва ҳалли мушкилоти ҷойдошта бо қарори раиси шаҳр аз буҷети шаҳр маблағҳои зарурӣ ҷудо ва ба маъракаи даъвати тирамоҳӣ равона карда шуданд.

Сипас, Фирдавс Шарифзода Раиси шаҳри Хуҷанд аз масъулини дахлдор оид ба иҷрои қарори Раиси шаҳр аз 26 сентябри соли 2023 №465 «Дар бораи даъвати шаҳрвандони солҳои таваллудашон 1996-2005 ба хизмати ҳарбии моҳҳои октябр – ноябри соли 2023» пурсиш ба амал оварда, барои иҷрои саривақтии нақшаи даъвати ҷавонон ба хизмати ҳарбӣ дар маъракаи даъвати баҳории соли 2024 эшонро вазифадор кард.

Таъкид шуд, ки хизмат дар сафҳои Қувваҳои мусаллаҳи Ҷумҳурии Тоҷикистон ифтихор ба ҳар ҷавони синни даъватӣ маҳсуб меёбад. Ифтихор аз он бояд кард, ки ватани мо соҳиби Артиши миллӣ буда, қодир аст дар он ҷавонони бонангро аз ҷиҳати ҷисмонӣ пурқувват, аз ҷиҳати сиёсӣ пухтаву зирак омода гардонад. Ду сол хизмат дар Артиши миллии Ҷумҳурии Тоҷикистон кафолати зиндагии осоиштаи хонадони ҳар хизматчӣ, орому осоиштагии кишвар ва ояндаи дурахшони кўдакону ҷавонон мебошад.

Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мўҳтарам Эмомалӣ Раҳмон ба ҷавонони кишварамон эътимоди комил доранд, умед ба он мебанданд, ки бо ақлу заковат, тани пурқуввату ғурури миллиашон ояндаи ватанро мунаввар месозанд. Бояд гуфт, ки Пешвои муаззам барои ҷавонон шароити хуб дар таҳсил, Қувваҳои мусаллаҳ, корхонаҳо ва дигар маконҳои муҳим фароҳам овардаанд. Месазад чунин ғамхориҳоро қадр ва ҷавобан бо матонату ақли солим ба ватан хизмати содиқона кард.

Кормандони комиссариати ҳарбии шаҳр, аъзоёни комиссияи даъват, раисони маҳаллаҳо, директорони коллеҷҳо, литсейҳои касбӣ-техникӣ, муассисаҳои таҳсилоти миёнаи умумӣ, сардорони корхонаи давлатии «Истифодабарии манзил»-и соҳили рост ва чап, роҳбарони ташкилоту муассисаҳо новобаста аз шакли моликият муваззаф гардиданд, ки талаботи Қонуни Ҷумҳурии Тоҷикистон «Дар бораи ўҳдадории умумии ҳарбӣ ва хизмати ҳарбӣ»-ро ҳатман риоя намуда, иҷрои онро таъмин созанд.

Дар ҷараёни ҷаласа прокурори шаҳри Хуҷанд Бахтиёр Нозимзода, комиссари ҳарбии шаҳри Хуҷанд Шералӣ Мансурӣ ва дигарон баромад намуда, ҷиҳати сифатан беҳтар намудани иҷрои нақшаи даъвати баҳоронаи соли 2024 андешаҳои хешро баён доштанд.

Дар анҷоми ҷаласа ба як қатор фаъолон Сипоснома ва туҳфаҳои Мақомоти иҷроияи ҳокимияти давлатии шаҳри Хуҷанд ва Комиссариати ҳарбии вилояти Суғд тақдим карда шуд.