11 Октябрь 2023
Недоступен ни однин перевод.
Бо мақсади беҳтар намудани хизматрасонии нақлиёти ҷамъиятӣ дар шаҳри Хуҷанд тадбирҳои мушаххас андешида шуда, дар ин самт лоиҳаи соҳавӣ татбиқ карда мешавад.
Раиси вилояти Суғд Раҷаббой Аҳмадзода ҷараёни корҳои ободониву созандагӣ ва васлу насби дастгоҳу таҷҳизоти муосирро дар КВД комуналии «Нақлиёти мусофиркашони шаҳри Хуҷанд» мавриди таваҷҷуҳ қарор дод.
Зимни шиносоӣ ба роҳбари вилоят иттилоъ дода шуд, ки айни замон татбиқи лоиҳаи «Рушди нақлиёти ҷамъиятӣ дар шаҳри Хуҷанд» ҷараён дошта, то ин марҳила беш аз 50 дарсади корҳо ба сомон расонида шудааст. Лоиҳаи мазкур бо дастгирии Бонки аврупоии таҷдид ва рушд амалӣ гашта, зиёда аз 100 адад автобуси мусофиркашон ворид гардида, системаи пардохти корти нақлиётӣ ба кор андохта шудааст.
Дар доираи лоиҳаи мазкур тамоми ҳудуди КВД комуналии «Нақлиёти мусофиркашони шаҳри Хуҷанд» навсозӣ гашта, ҷавобгӯ ба талаботи замони муосир дастгоҳу таҷҳизот ворид карда мешавад. Айни замон корҳои ободониву бунёдкорӣ дар ин мавзеъ босуръат ҷараён дошта, сохтмони як қатор иншоот ба роҳ монда шудааст.
Мувофиқи нақша бунёди 13 адад сехҳои истеҳсолӣ ва таъмирӣ, нуқтаи таъмини сузишворӣ, шустушӯи нақлиёт, назорати даромаду баромади нақлиёти мусофиркашон ва фаъолияти муназзами он дар хатсайрҳо, ошхона, сехи рангуборкунӣ, чоҳи зеризаминӣ, ҳавзи захираи об барои сухторнишонӣ бунёд ёфта, ҳудуди муассиса пурра мумфарш ва тамоми бино ба систеами ягонаи гармидиҳӣ пайваст мегардад. Дастгоҳу таҷҳизот аз кишварҳои Чин, Туркия ва Россия ворид гардида, имкон медиҳад то дар самти фаъолияти муассиса дигаргунии ҷиддӣ ва вавобгӯ ба талаботи замонави ҷорӣ гардад.
Раиси вилоят зимни шиносоӣ таъкид дошт, ки лоиҳаи мазкур бо дастгирии Ҳукумати мамлакат амалӣ шуда, ҳадаф хизматрасонии босифат ба аҳолӣ ба ҳисоб меравад.
Ҳамзамон ҷиҳати назорати қатъии корҳои сохтмонӣ, воридоти дастгоҳу таҷҳизоти замонавӣ, сари вақту босифат ба итмом расонидани тамоми корҳо, мақсаднок истифодабарии маблағҳои грантӣ ва назорати сарфаи он ба масъулин дастуру супоришҳои мушаххас дод. Таъкид гардид, ки бояд ҳамаи нақлиёти мусофиркашон дар ҳолати коршоям қарор дошта, хатсайри автобусҳо дар асоси талабот ва зиёд гаштани аҳолӣ афзун карда шавад. Айни замон ҳамарӯза ба бошандагони шаҳри Хучанд ва атрофи он то 30 адад нақлиёт хизмат мерасонад ва дар оянда шумораи автобус ва хатсайрҳо зиёд карда мешавад.
Дар назар аст, ки барои беҳтар намудани хизматрасонӣ инчунин 20 адад электробус ворид карда шавад.
Дафтари матбуоти
Раиси шаҳри Хуҷанд
