04 Апрель 2013
Ба муносибати гусели нахустгурӯҳи даъватшудагон иборат аз 40 нафар аз шаҳри Хуҷанд, ки аксарият ихтиёран ва бо хоҳиши хеш номнавис шудаанд, дар майдони шоҳ Исмоили Сомонӣ ҷамъомади тантанавӣ доир гардид. Дар он садҳо нафар шаҳрвандон, намояндагони Мақомоти иҷроияи ҳокимияти давлатии шаҳри Хуҷанд, собиқадорони ҷангу меҳнат, кормандони идораву муассисаҳо, устодону толибилмони мактабҳои миёнаву олӣ иштирок намуданд. Бояд гуфт, ки имсол бори нахуст чунин ҷамъомад дар ин мавзеи зебову дилрабои шаҳр сурат гирифт. Зеро, аз ин қабл (дар даъватҳои гузашта) чунин чорабинӣ дар назди бинои Комиссариати ҳарбии шаҳр баргузор мегардид. Аз ин лиҳоз, чорабинӣ ин навбат шукӯҳи дигар гирифт.
Пас аз садо додани Суруди миллии Ҷумҳурии Тоҷикистон Раиси шаҳри Хуҷанд Раҷаббой Каримов назди ҳозирин сухан карда, аз ҷумла зикр намуд, хушбахтона сафи ҷавононе, ки ихтиёран ба хидмати Ватан-Модар мераванд, торафт меафзояд. Барои хидмати афсарону сарбозон дар қисмҳои низомии мамлакат бо дастгириву ғамхориҳои Сарфармондеҳи Олии Қувваҳои Мусаллаҳи Ҷумҳурии Тоҷикистон, Ҷаноби Олӣ, мӯҳтарам Эмомалӣ Раҳмон тамоми шароит муҳайё гардидааст.
Бовар дорем, ки бар ивази ин ҳама меҳрубониву ғамхориҳои Сардори давлат ҳар як шаҳрванди Тоҷикистони соҳибистиқлол, бахусус ҷавонони бо нангу номус барои дифои марзу буми Ватани азизамон кӯшиш ба харҷ медиҳанд. Зеро, хидмат ба Ватан қарзи шаҳрвандии ҳар як инсони ватандӯст ва ифтихори бузург аст.
Умед дорем, илова намуд Раиси шаҳр Р.Каримов, Шумо-даъватшавандагони соли 2013 бо баробари шомил шудан ба сафи Қувваҳои Мусаллаҳи Ҷумҳурии Тоҷикистон хизмати Модар-Ватанро дилгармона ва содиқона ба ҷо меоваред.
Бо итминони комил метавон гуфт, ки имрӯз дар қисмҳои низомӣ тамоми шароит барои хизмат муҳайё гардидааст. Яъне, афсарону сарбозон бо сару либоси низомӣ, хӯроки гарму болаззат ҳамаҷониба таъмин мебошанд. Ин суханҳоро худи падару модарони хизматчиёне, ки аз рафти хизмати фарзандонашон дар қисмҳои низомии гарнизони Душанбе, вилояти Хатлон ва водии Рашт дидан карданд, борҳо зикр намуданд.
Дар фарҷоми сухан Раиси шаҳр ба ҳамаи навдаъватшавандагон, ки ба хизмати Модар-Ватан дар сафи Артиши миллӣ сафарбар мегарданд, роҳи сафед, хизмати аъло ва тансиҳативу сарбаландиро таманно намуд.
Сипас муовини комиссари ҳарбии вилоят, полковник Носирҷон Тошматов, иштирокчии Ҷанги Бузурги Ватании солҳои 1941-1945 Ҳабибулло Хоҷаев, ҷанговари интернатсионалист Ҳасанҷон Каримов, модаркалони даъватшаванда Амирҷон Саидов Алияхон Саидова ва ҷавони навдаъватшуда Раҳматҷон Неъматов сухан гуфта, қарзи шаҳрвандии ҳар як ҷавонмарди ватандӯсту меҳанпарвар будани хидмат дар сафи Артиши миллиро баён намуданд.
Сипосномаи командири қисми низомии 12019 полковник Иззатов, ки ба унвони падарони ду нафар сарбозони қисми низомӣ барои тарбияи хуб ва саривақт ба хидмати ҳақиқии ҳарбӣ фиристоданашон расидааст, қироат карда шуда, барояшон тӯҳфаҳои хотиравӣ тақдим гардид.
Ҳамзамон, дар вазъияти тантанавӣ Раиси шаҳри Хуҷанд Раҷаббой Каримов ба ҳар ҷавони навдаъватшуда тӯҳфаҳои хотиравии Мақомоти иҷроияи ҳокимияти давлатии шаҳрро супорид.
Қисми фарҳангии чорабиниро саҳначаи омода намудаи донишҷӯёни Коллеҷи тиббии шаҳр бо номи «Гусели даъватшаванда ба хидмати ҳарбӣ» ва суруду таронаҳои рӯҳнавози сарояндагони хушсадову соҳибистеъдод ҷилои тоза бахшиданд.
Бовар дорем, ки даъватшавандагони соли 2013-ум чун дар соли 20-умин солгарди таъсисёбии Қувваҳои Мусаллаҳи Ҷумҳурии Тоҷикистон барои хидмати ҳақиқии ҳарбӣ шомили Артиши миллии мамлакат мегарданд, боиси ифтихори Ватан-Модар ва ҷомеаи имрӯз хоҳанд шуд.
