05 Июн 2014
Раиси вилояти Суғд Абдураҳмон Қодирӣ ва Раиси шаҳри Хуҷанд Раҷаббой Аҳмадзода аз якчанд корхонаҳои саноатии шаҳри Хуҷанд боздид ба амал оварданд. Нахуст Абдураҳмон Қодирӣ ва ҳайати ҳамроҳонаш бо фаъолияти кунунии коргоҳи «Нассоҷии Хуҷанд» ошноӣ пайдо намуданд. Коргоҳ соли гузашта дубора ба фаъолият оғоз намуда, барои харидорон маҳсулоти гуногуни ватаниро аз нахи пахта пешкаш менамояд. Раиси вилояти Суғд аз намоиши маҳуслоти корхона дидан кард. Иттилоъ дода шуд, ки айни замон дар коргоҳ зиёда аз 30 намуд маҳсулот аз ҷумла, куртаҳои мардона ва занона, сару либоси мактабиву корӣ, рахти хоб ва ғайра истеҳсол карда мешавад, ки сифати он дар бозори имрӯза рақобатнок аст. Тамоми матоҳои истифодамешуда, пурра аз нахи пахта буда, ба саломатии инсон муфид мебошад. Сарвари вилоят ба масъулин дастур дод, ки дар ин радиф бояд ашёи хоми ватанӣ, ки аз пахта гирифта мешавад мавриди истифодаи бештари сокинон карор гирад.
Давоми чанд рӯзи охир фаъолияти як қисми корхона бинобар ба итмом расидани шартнома бо фармоишгар қатъ гардидааст. Роҳбари коргоҳ иброз дошт, ки айни замон гуфтушунид бо ширкатҳои давлати Федератсияи Руссия, Ҷумҳурии Белорус ва Ҷумҳурии Мардумии Чин ва Ҷумҳурии Туркия ҷараён дошта, рӯзҳои наздик шартномаи тарафайн ба имзо расонида хоҳад шуд. Дар натиҷа коргоҳ имкон пайдо мекунад ба маблағи умумии 5 милион сомонӣ маҳсулот истеҳсол намуда, ба ин мамлакатҳо содироти онро ба роҳ монад. Иқтидори истеҳсолии корхонаи мазкур то 4 ҳазор тонна нахи пахтаро дар як сол ташкил медихад. Дар сехи дузандагии корхона асосан дӯхти либосҳои мактабӣ, низомӣ, корҷомаҳо ва ғайра ба роҳ монда шудааст. Ҳамчунин тибқи шартнома коргоҳ сарулибоси махсус барои ширкати «Росатом»-и Федератсияи Россия омода месозад. Алҳол маҳсулоти корхона аз ҷониби коршиносони ин ширкати ҷаҳонӣ мавриди омӯзиш қарор дорад. Дар натиҷаи ба роҳ мондани ҳамкорӣ бо ин ширкат корхона имкониятҳои хеле калони содиротӣ пайдо мекунад. Дар корхона 7 намуди мато барои сарулибоси мактабӣ тайёр карда мешавад.Дар назди корхона ҳамчунин мағозаи фирмавии он кушода шудааст, ки дар он навъҳои сершумори либосвории хушсифати пахтагин бо нархҳои нисбатан дастрас ба фӯруш гузошта шудааст. Роҳбари вилоят таъкид дошт, ки бо маҳсулоти омодагаштаи ватанӣ бозори дохилиро таъмин гардад. Зеро сару либос ва дигар матоҳои комилан аз пахта истеҳсол шуда, дар таркиби он нахҳои сунъӣ мавҷуд нест. Дар ҳамин мавзеъ сарвари вилоят аз мағозаи «Дунёи атлас» боздид ба амал овард. Чи тавре зикр ёфт, дар ин ҷо намуди зиёди атлас ва адрас, бо нақшу нигори гуногун ба фурӯш гузошта шудааст. Раиси вилояти Суғд ҷихати ба роҳ мондани адрасбофӣ ва таъмини бозори дохилӣ бо маҳсулоти ватанӣ масъулинро муаззаф намуд. Бо ин мақсад ба роҳ мондани меҳнати хонагӣ ва ба омӯзиши адрасбофӣ фаро гирфтани шумораи харчи бештари занон мувофиқи матлаб арзёбӣ гардид. Аз ҳамин хотир сарвари вилоят фаъолияти имрӯзаи коргоҳи «ВТ Силк»-ро мавриди назар карор дод. Айни замон 11 дастгохи адрасбофи насб гардида барои бозомӯзӣ духтарони маҳаллӣ ба ин кор ҷалб шудаанд. Абдураҳмон Қодирӣ бо тарзи бофти адрас шинос гардида, барои зиёд намудани шумораи дастгоххо ва ба омузиш фаро гирифтани шумораи харчи бештари занону духтарон ба Раиси шаҳри Хуҷанд Раҷаббой Аҳмадзода ва роҳбарияти коргоҳ супориш дод. Қайд гардид, ки ба касбомузи ҷалб намудани бонувон имкон медихад, то сатхи зиндагонии онҳо хело беҳтар гардад. Дар ояндаи наздик дар ин коргоҳ 50-адад дастгохи адрасбофи насб карда шуда, бо чалби устохои соха занону духтарон аз тамоми шахру навохии вилоят ба касбомузи фаро гирифта мешаванд.
Айни замон дар корхонаи мазкур қабули пиллла ва хушккунии он ҷараён дошта, аз мохи июл нахгирии он огоз меёбад. Тибки супориши Раиси вилоят соли равон пиллаи истехсол гардида ба пурраги дар вилоят коркард хоҳад шуд.. Раиси вилояти Суғд Абдураҳмон Қодирӣ роҳбарони корхонаҳоро вазифадор намуд, то коркарди абрешимро то маҳсулоти ниҳоӣ дар вилоят ба роҳ монанд. Бо ин мақсад атласи тоҷик, ки ватани он щаҳри Хуҷанд мебошад ду бора барқарор ва эҳё карда шавад. Бо ин мақсад ба роҳбари корхонаи «Хуҷандатлас» Азим Ғафуров дастур дода шуд то бо истифода аз абрешими маҳаллӣ фаъолияти пурраи корхонаи мазкурро ба роҳ монад. Раиси вилоят қайд намуд, ки алҳол дар бозори ҷахонӣ матоҳои абрешимӣ хеле арзиши баланд дорад ва вилояти Суғд имкониятҳои истеҳсоли ин гуна матоҳоро дорад. Тараққӣ додани ин соҳа ҳам ҷойи корӣ ва ҳам иқтисодиёти вилоятро рушд медихад. Дар ниҳояти шиносоӣ Раиси вилояти Суғд Абдураҳмон Қодирӣ ва Раиси шаҳри Хуҷанд Раҷаббой Аҳмадзода бо роҳбарони корхонаҳои саноати сабуки маркази вилоят машварати корӣ доир намуданд.
