25 Ноябр 2019
Ба ифтихори Рӯзи Парчами давлатии Ҷумҳурии Тоҷикистон дар доираи корҳои ободонию созандагӣ ба муносибати 30 солагии Истиқлолияти давлатии Ҷумҳурии Тоҷикистон дар маҳаллаи Тиллокони шаҳри Хуҷанд Маҷмааи варзишии «Тир» мавриди баҳрбардорӣ карор дода шуд.
Дар маросими ифтитоҳии иншооти мазкур Президенти Федератияи тирпарронии Ҷумҳурии Тоҷикистон Беҳзод Файзуллоев, муовини Раиси шаҳри Хуҷанд Фирӯза Нуруллозода, сардори Раёсати кор бо ҷавонон ва варзиши вилояти Суғд Мирзоқосим Каримзода, сокинони маҳалла ва варзишгарон ширкат варзиданд.
Иттилоъ дода шуд, ки иншооти мазкур аз ҷониби мураббӣ оид ба намуди тирпарронӣ Марат Абдукаримов ба маблағи 1 миллион сомонӣ сохта ва ба истифода дода шудааст. Дар ин маҷмаа барои дӯстдорони намудҳои гуногуни варзиши тирпарронӣ шароит муҳайё гардидааст ва шаҳрвандон дар ин макон метавонанд маҳорати тирпаррониро омӯзанд ва онро такмил диҳанд. Бинои мазкур аз 3 ошёна иборат буда, бо технологияи навтарини сохтмонӣ бунёд ёфтааст.
Дар маросими ифтитоҳи маҷмааи варзишӣ, муовини раиси шаҳри Хуҷанд Фирӯза Нуруллозода барои чунин иқдоми нек ба мураббӣ оид ба намуди тирпарронӣ Марат Абдукаримов аз номи Раиси шаҳри Хуҷанд Маъруф Муҳаммадзода миннатдорӣ баён намуда, аз ҷумла зикр дошт, ки дар Рӯзи Парчами миллии Ҷумҳурии Тоҷикистон ифтитоҳ ёфтани чунин маҷмааи варзишӣ хеле рамзист, зеро варзишгарони мо дар тамоми гӯшаву канори дунё бо ғолибияти худ Парчами миллии моро парафшонӣ менамоянд. Варзиш чун омили камолоти ҷисмонӣ ва тавоноии мардуми диёр пазироӣ ва мавриди таваҷҷўҳу эътибор қарор дода шуда, дар ҳар давру замон қосиди сулҳу дўстӣ ва муаррификунандаи ҷаҳони маънавию солимии миллату давлат буд ва минбаъд низ боқӣ хоҳад монд.
Дафтари матбуоти
Раиси шаҳри Хуҷанд
