31 Июл 2019
Имрӯз бо иштироки Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода, Раиси вилояти Суғд Раҷаббой Аҳмадзода ва Раиси шаҳри Хуҷанд Маъруф Муҳаммадзода баъди таъмиру азнавсозӣ зерстансияи ёрии таъҷилии шаҳри Хуҷанд мавриди истифода қарор дода шуд.
Баъди шиносоӣ бо фаъолияти кори зерстансияи ёрии таъҷилии шаҳри Хуҷанд Раиси вилояти Суғд Раҷаббой Аҳмадзода назди кормандони соҳаи тандурустӣ ва фаъолони шаҳр баромад намуда, аз ҷумла таъкид дошт, ки бо дастури Асосгузори сулҳу Ваҳдати миллӣ, Пешвои миллат, Президенти мамлакат муҳтарам Эмомалӣ Раҳмон бахшида ба 30 солагии Истиқлолияти давлатии Ҷумҳурии Тоҷикистон дар баробари бунёду азнавсозии иншооти таъиноташ гуногун, ҳамзамон беморхонаву марказҳои саломатӣ ва бунгоҳҳои тиббӣ дар гӯшаву канори вилоят бомаром идома дорад. Соли ҷорӣ баҳри дастгирии соҳаи тандурустии вилоят 3 миллион сомонӣ маблағ ҷудо карда шуд.
Баистифодадиҳии зерстансияи ёрии таъҷилии шаҳри Хуҷанд баъди азнавсозӣ бо харҷи беш аз 1 миллиону 30 ҳазор сомонӣ дар доираи корҳои бунёдкорӣ дар шаҳри Хуҷанд амалӣ карда шуд. Ин имкон фароҳам меорад, ки барои беш аз 120 ҳазор аҳолии соҳили рости шаҳри Хуҷанд хизматрасонии аввалияи тиббӣ дар сатҳи баланд ба роҳ монда шавад.
Раҷаббой Аҳмадзода аз кормандони зерстансияи ёрии таъҷилии шаҳри Хуҷанд даъват ба амал овард, ки зимни адои вазифаи хизматӣ, бо амри дил, содиқона, поквиҷдона кори фаъолият намоянд, зимни даъвати корафтодагон дар баробари ёрии аввали тиббӣ расонидан, онҳоро ройгон бо доруворӣ таъмин ва ба беморхонаҳо таъҷилан интиқол диҳанд.
Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода гуфт, ки азнавсозӣ гардидани зерстансияи ёрии таъҷилии шаҳри Хуҷанд имконот ва шароити арзандаро барои табибони ин муассисаи тандурустӣ фароҳам хоҳад овард. Ин имкон медиҳад, ки барои беморон ва корафтодагон хизматрасонии сифатан аъло ба роҳ монда шавад. Давлату Ҳукумат ҳамеша кӯшиш менамояд, ки иқтидорҳои пойгоҳи соҳаи тандурустиро тақвият бахшад ва табибони варзида тамоми амалиёту табобатҳоро дар дохили кишвар ба роҳ монанд.
Аҳли заҳмати зерстансияи ёрии таъҷилии шаҳри Хуҷанд аз ин таваҷҷуҳу ғамхории Давлату Ҳукумати мамлакат миннатдорӣ баён намуданд.
Ҷоиз ба зикр аст, ки зерстансияи ёрии таъҷилии шаҳри Хуҷанд ҳанӯз соли 1952 дар назди беморхонаи шаҳрӣ таъсис ёфта, аз соли 1985 чун сохтори алоҳида фаъолият менамояд. Хизматрасонии зерстансияи ёрии таъҷилии шаҳри Хуҷанд барои сокинони соҳили рости шаҳри Хуҷанд пешбинӣ гардида, алҳол дар ин муассисаи тиббӣ 11 бригадаи хизматрасонии ёрии аввалияи тиббӣ мавҷуд буда, дар мошини ёрии таъҷилӣ таҷҳизоти лозимӣ аз қабили: дастгоҳи барқароркунии кори бомароми дил, сабти барқии дил, дастгоҳи дастии нафаси сунъӣ, лӯлаи оксигеннигоҳдорӣ ва ғайраҳо мавҷуданд. Утоқҳои корӣ бо усули муосир бо маблағгузории Мақомоти иҷроияи ҳокимияти давлатии шаҳри Хуҷанд аз ҷониби ширкати сохтмонии "Манзили Ориён" таъмиру азнавсозӣ гардидаанд.
Дафтари матбуоти
Раиси шаҳри Хуҷанд
