24 Май 2019
Дар коллеҷи омӯзгории шаҳри Хуҷанд мулоқоти сардори ШВКД ҶТ дар шаҳри Хуҷанд подполковники милитсия Олим Бурҳониён бо муҳассилини ин боргоҳи илму маърифат баргузор гардид.
Нахуст Усмонҷон Юсуфӣ, мудири шуъбаи рушди иҷтимоӣ ва робита бо ҷомеаи дастгоҳи Раиси шаҳри Хуҷанд доир роҳҳои пешгирии гаравидани ҷавонону наврасон ба ҳизбу ҳаракатҳои мамнуъ баромад намуда, аз ҷмла афзуд, ки дар замони муосир низ, давлатҳои абарқудрат аз ин фишангҳои эътиқодӣ сўистифода карда, дар мамолики араб ба монанди Сурия, Ироқ, Ливия ва кишварҳои Осиёи Марказӣ, аз ҷумла Афғонистон вазъро номўтадил ва ноором гардонида истодаанд.
Боиси ташвиш ва нигаронӣ аст, ки дар задухўрдҳои мусалаҳонаи кишварҳои боло номбаршуда шаҳрвандони Тоҷикистон низ иштирок доранд. Яке аз сабабҳои асосии шомил гардидани ҷавонони гумроҳ ба сафи созмону ташкилотҳои байнахалқии террористӣ-экстремистӣ, аз қабили «Давлати исломӣ», «Ҷабҳат–ан-Нусра» ва ғайраҳо, маҳз дар сатҳи паст қарор доштани маърифату маълумоти динӣ, фарҳангӣ, дунявӣ ва сиёсӣ, суст ба роҳ монда шудани тарбияи онҳо аз ҷониби волидайн, фаъолони ҷомеа, зиёиён, намояндагони расмии дин ва руҳониёни барўманд мебошад. Омили дигари ифротишавии ҷавонони Тоҷикистон таҳсили ғайрирасмии онҳо дар муасиссаҳои динии давлатҳои исломӣ мебошад. Ҷавонони мо дар кишварҳои исломӣ, аз ҷумла мамолики араб дар муассисаҳои таълимии динӣ солҳои тулонӣ таҳсил намуда, пурра фарогири мазҳаби динӣ, фарҳанг, урфу одат ва ҳатто забони онҳо мегарданд ва баъди баргаштан ба ватан тибқи супоришҳои хоҷагони худ ба ташвиқу тарғиб ва паҳн намудани мазҳаб ва фарҳанги ба миллати тоҷик бегона машғул мешаванд.
Сипас, сардори ШВКД ҶТ дар шаҳри Хуҷанд подполковники милитсия Олим Бурҳониён баромад намуда, аз ҷумла афзуд, ки чорабинии имрӯза дар партави мулоқоти Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо кормандони мақомоти молия, андоз, гумрук, сармоягузорӣ ва бонкҳои кишвар сурат мегирад, ки он барои ҳар як шаҳрванд, бахусус барои мутахасисони оянда сабақ ва бардошти хубест.
Олим Бухониён гуфт, ки Роҳбари давлат дар мулоқот тамоми ҷабҳаҳои фаъолияти молиёти кишварро таҳлил намуда, аз камбудиҳои ҷиддии масъулини соҳа ёдовари намуданд. Ҳамзамон ба сохторҳои зикршуда якҷо бо Прокуратураи генералӣ, Палатаи ҳисоб ва Агентии назорати давлатии молиявӣ ва мубориза бо коррупсия ҷиҳати бартараф намудани омилҳои ба содиршавии ҷиноятҳои коррупсионӣ, ҳолатҳои ғайримақсаднок истифода намудани маблағҳои буҷетӣ, суиистифода аз ваколатҳои мансабӣ, ҷиноятҳои иқтисодии дорои хусусияти коррупсионӣ мусоидаткунанда ва паст намудани хавфи чунин қонунвайронкуниву ҷиноятҳо баҳри андешидани тадбирҳои иловагӣ супоришҳои мушаххас доданд. Ҳамзамон таъкид шуд, ки бо ин, дар самти баланд бардоштани сатҳи касбияти кормандон ва аз аттестатсия гузаронидани онҳо, татбиқи технологияҳои рақамӣ, ки таъсири омили инсониро бартараф месозад, чораҷӯӣ карда шавад. Роҳбарони Вазорати молия ва раёсату шуъбаҳои минтақавии он, мақомоти иҷроияи ҳокимияти давлатии вилоятҳо ва шаҳру ноҳияҳо вазифадор гардиданд, ки ба масъалаҳои банақшагирии дурусти буҷетҳои маҳаллӣ, мутобиқати хароҷот ба меъёрҳои муқарраргардида ва арзёбии имкониятҳои воқеии манбаъҳои андоз эътибори аввалиндараҷа диҳанд.
Маҷмуъан таҳлили таъкидҳои Пешвои миллат аз он бозгӯйӣ менамояд, ки дар баробари пешравиҳо дар самти рушди иҷтимоиву иқтисодии кишвар то ба имрӯз дар фаъолияти соҳаҳои молия, андоз, гумрук, сармоягузорӣ ва бонкҳо камбудиҳои зиёд низ ба назар мерасанд. Таъкид шуд, ки Ҳукумати кишварро зарур аст, ки барои сари вақт ислоҳ намудани камбудиҳои зикршуда тибқи нақшаи чорабиниҳои алоҳидаи ҳар яке аз мақомоти масъул ва расидан ба нишондиҳандаҳои стратегии кишвар ва барномаҳои соҳавӣ корҳои назоратиро ба таври қатъӣ ба роҳ монад. Таъмин намудани рушди дарозмуддати Тоҷикистон ва баланд бардоштани сатҳу сифати зиндагии мардуми кишвар ҳадафи олии Ҳукумати мамлакат ба ҳисоб меравад ва дар ин самт ҳамаи мо масъул мебошем.
Сардори ШВКД ҶТ дар шаҳри Хуҷанд подполковники милитсия Олим Бурҳониён ҳамзамон доир ба қонуншикании ҷавонон андешаронӣ намуда, аз ҷумла зикр дошт, ки яке аз падидаҳои бисёр ҳам номатлуби ҷаҳони имрӯза- ин гаравиши бархе аз ҷавонон ба ҳизбу ҳаракатҳои иртиҷоӣ мебошад. Коршиносони дохилӣ ва хориҷӣ сабабу омилҳои ин раванди номатлуби иҷтимоиро ҳамеша мавриди баҳс қарор медиҳанд ва роҳҳои дур кардани ҷавонони кишварро аз ин гуна ҳизбҳо меҷӯянд. Яке аз роҳҳои пешгирии ҷавонон аз шомилшавӣ ба гурӯҳҳои ифротгаро- баланд бардоштани фарҳанги сиёсӣ, маърифати ҳуқуқӣ ва ватандӯстии онҳо мебошад. Қабл аз он, ки мо дар бораи сабабҳои ба гурӯҳҳои ифротгаро шомил шудани ҷавонон сухан кунем, бояд омилҳои асосии пайваст шудани ҷавононро ба ҳамин гуна ҳизбу ҳаракатҳои иртиҷоӣ мушаххас намоем. Омилҳо гуногунанд. Имрӯзҳо дар замони ҷаҳонишавӣ таваҷҷуҳ ба фарҳанги бегона ва бархӯрди андешаҳо хеле зиёд ба назар мерасад. Дар ҷаҳони пуртазоди имрӯза мо бояд ба ҳамин ҷараёнҳои манфии ҷаҳонишавӣ муқобилият карда тавонем. Дар ҳифзи ҳувияти миллии худ ва нигаҳдошти арзишҳои маънавии худ бояд ҳар шахс масъулият дошта бошад.
Мулоқот дар фазои озоду ошкоро сурат гирифт.
Дафтари матбуоти
Раиси шаҳри Хуҷанд
