28 Декабр 2018
Субҳи имрӯз дар толори Мақомоти иҷроияи ҳокимияти давлатии шаҳри Хуҷанд иҷлосияи шонздаҳуми Маҷлиси вакилони халқи шаҳри Хуҷанд, даъвати панҷум бо садо додани Суруди миллӣ оғоз гардид.
Раиси Маҷлиси вакилони халқи шаҳри Хуҷанд, Раиси шаҳри Хуҷанд Маъруф Муҳаммадзода баъди иҷрои муқаррароти иҷлосия иттилоъ дод, ки дар рўзномаи иҷлосияи шонздаҳуми Маҷлиси вакилони халқи шаҳри Хуҷанд, даъвати панҷум 8 масъала мавриди баррасӣ қарор дода мешавад.
Аз рӯйи масъалаи якуми иҷлосия аз ҷониби Раиси шаҳри Хуҷанд Маъруф Муҳаммадзода оид ба фаъолияти мақомоти иҷроияи ҳокимияти давлатии шаҳр 11 моҳи дар соли 2018 ҳисобот дода шуд. Зикр гардид, ки мо ҳамагон зери таасуроти амиқи нишотбахши Паёми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ қарор дорем, ки ду рӯз қабл тариқи шабакаҳои телевизионӣ ироа гардид.
Зимни суханронӣ Сарвари давлат таъкид доштанд, ки соли 2018 бо рӯйдодҳои ниҳоят муҳиму хотирмони худ барои мардуми шарифи Тоҷикистон ва давлати соҳибистиқлоли тоҷикон соли воқеан таърихӣ буд. Бисту дуюми марти соли ҷорӣ дар Рӯзи байналмилалии захираҳои об татбиқи ташаббуси чоруми ҷаҳонии мо дар соҳаи об - Даҳсолаи байналмилалии амал “Об барои рушди устувор, солҳои 2018-2028” бо иштироки Президенти Ҷумҳурии Тоҷикистон дар Маҷмаи умумии Созмони Милали Муттаҳид расман оғоз гардид. Ба кор андохтани агрегати якуми нерӯгоҳи барқи обии “Роғун”, яъне иншооти тақдирсози аср ва ояндаи дурахшони Тоҷикистон, ки ба шарофати он орзуи чандинсолаи мардуми шарифу заҳматқарини тоҷик амалӣ гардид, як қадами устувору бузурги кишвари мо дар самти расидан ба ҳадафи якуми стратегии миллӣ - истиқлолияти энергетикӣ мебошад.Ҳалли масъалаҳои дар тӯли зиёда аз ду даҳсола бавуҷудомадаи сиёсиву иқтисодӣ ва тиҷоратӣ бо Ҷумҳурии Ӯзбекистон рӯйдоди сеюми таърихӣ дар ҳаёти иҷтимоиву иқтисодӣ ва маънавии мардум унвон гардид.
Дар натиҷаи иҷрои саривақтии дастуру супоришҳои Президенти Ҷумҳурии Тоҷикистон, муҳтарам Эмомалӣ Раҳмон нақшаи чорабиниҳои Ҳукумати Ҷумҳурии Тоҷикистон ва нишондодҳои Раиси вилояти Суғд Раҷаббой Аҳмадзода, густариши ислоҳоти иқтисодӣ ва захираҳои мавҷуда муяссар гардид, ки рушди бонизоми иқтисодии шаҳр ҳамчун қисми таркибии иқтисоди миллӣ таъмин гардида, дар ёздаҳ моҳи соли 2018 ба нишондиҳандаҳо ва дастовардҳои назарраси соҳаҳои хоҷагии халқи шаҳр ноил гардидем.
Маъруф Муҳаммадзода гуфт, ки бо мақсади тавсеаи нуфузи шаҳр ҳамчун минтақаи саноатии вилоят ва таъмин намудани рушди босуръати соҳаи пешбарандаи иқтисодиёт, ҷиҳати вусъат бахшидан ба истеҳсолоти воридотивазкунанда ва афзунгардонии иқтидори содиротӣ тадбирҳои судманд роҳандозӣ шуда истодааст.
Боиси қаноатмандист, ки соли ҷорӣ барои ин соҳа хеле бобарор буда, новобаста аз омилҳои манфии таъсири беруна ҳаҷми умумии маҳсулоти истеҳсолгардида бори нахуст аз сатҳи 1,0 миллиард сомонӣ зиёд гардида, он ба 1033,3 миллион сомонӣ расидааст, ки нисбат ба ҳамин давраи соли гузашта 11,6 фоиз афзудааст.
Таҳлили нишондиҳандаҳои давраи ҳисоботӣ собит намуд, ки дар тамоми соҳаҳои хоҷагии халқ шумораи корхонаю муассисаҳо ба 1783 адад расида, теъдоди умумии кормандон 1081 адад зиёд шудааст, 12 адад корхонаҳои нави истеҳсолӣ (бо назардошти соҳибкорони инфиродӣ) бо теъдоди 296 ҷойи кории нав таъсис дода шуда, шумораи умумии корхонаҳои калону хурд ба 165 адад расидааст.
Боиси тазаккур аст, ки баҳри рушди соҳаи саноати шаҳр ба маблағи зиёда аз 73,0 миллион сомонӣ сармояҳои дохилӣ ва хориҷӣ ҷалб гардида, нисбат ба ҳамин давраи соли сипаригашта 24,0 дар сад афзудааст.
Дар давраи ҳисоботӣ номгўи намуди маҳсулотҳои истеҳсолшаванда низ зиёд шуда, аз ҷониби 11 корхонаҳои саноатӣ ба маблағи 166,1 миллион сомонӣ маҳсулот ба давлатҳои муштаракулманофеъ содирот карда шудааст, ки он нисбат ба ҳамин давраи соли гузашта ба маблағи 7,1 миллион сомонӣ ё 4,5 дар сад зиёд шудааст.
Аз миқдори умумии корхонаҳои саноатӣ 54 адад ё 32,7 фоизашон 21 намуд молҳои воридотивазкунанда ба маблағи 292,3 миллион сомонӣ истеҳсол шудааст, ки нисбат ба ҳамин давраи соли сипаригашта ба маблағи 35,1 миллион сомонӣ ё 13,6 фоиз зиёд мебошад. Ин омилҳо барои ғанӣ гардонидани бозори дохилӣ ва кам шудани маҳсулоти қаблан воридшаванда шароити мусоид фароҳам меорад.
Раиси шаҳри Хуҷанд Маъруф Муҳаммадзода аз фаъолияти сусти корхонаҳои коркарди пахта изҳори нигаронӣ намуда, масъулини дахдоррро муваззаф намуд, ки ҷиҳати марҳилаи ниҳоӣ коркарди нахи пахта чоораҳои дахлдор андешида шавад.
Сипас аз тарафи Маъруф Муҳаммадзода доир ба нишондодҳо дигаи иқтисодӣ, иҷтимоӣ ва фарҳангиии Мақомоти иҷроияи ҳокимияти давлатии шаҳр маълумоти муфассал ироа гардид.
Дар анҷоми суханронии худ Роҳбари шаҳр Маъруф Муҳаммадзода таъкид намуд, ки Соли рушди сайёҳӣ ва ҳунарҳои мардумӣ эълон гардидани соли 2018 ба дарки аҳамияти самтҳои мазкур дар ҳаёти иҷтимоиву иқтисодии мардум такони ҷиддӣ бахшид, вале барои расидан ба ҳадафҳои пешбинишуда, муаррифии пурраи имкониятҳои сайёҳии кишвари мо, эҳё ба рушди ҳунарҳои мардумӣ як сол басанда нест. Аз ин ру зимни ироаи Паём Сарвари давлат муҳтарам Эмомалӣ Раҳмон солҳои 2019-2021 “Солҳои рушди деҳот, сайёҳӣ ва ҳунарҳои мардумӣ” эълон карданд. Боварии комил дорам, ки дар соли нави омадаистода кулли сокинон бо номуси баланди ватандорӣ ҷиҳати татбиқи нуктаҳои Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон боз ҳам корҳои ободониву созандагиро бо заҳмати софдилона пеш гирифта, барои пурмаҳсулии солҳои минбаъда саҳми босазо мегузоранд.
Вакилон Мадина Набизода, Муяссар Раҳимова ва Муҳсин Исобоева дар музокира баромад намуда, андешаҳои хешро доир ба дастовардҳои соҳаҳои шаҳри Хуҷанд дар соли 2018 баён доштанд.
Сипас, вакилон буҷети шаҳри Хуҷанд барои соли 2019 муҳокима ва ҳисоботи буҷети шаҳри Хуҷанд дар соли 2017 тасдиқ намуданд. Ҳамин тавр буҷети шаҳри Хуҷанд барои соли 2019 ба маблағи зиёда аз 419 миллион сомонӣ қабул гардид.
Дар ҷараёни иҷлосияи масоил марбут оид ба муқаррар намудани меъёрҳои андоз ва пардохтҳои ҳатмии алоҳида дар ҳудуди шаҳри Хуҷанд, ҳисоботи вакили Маҷлиси вакилони халқи шаҳри Хуҷанд аз ҳавзаи интихоботии “Гулистон”, № 15 Назокат Ёрматова оид ба рафти иҷрои ваколати вакилӣ, номгузории объектҳои физикию ҷуғрофӣ мавриди баррасӣ қарор дода ва нақшаҳои муфассали тарҳрезишудаи маҳаллаҳои шаҳри Хуҷанд, дар бораи ворид намудани тағйиру иловаҳо ба буҷети шаҳри Хуҷанд барои соли 2018, қарорҳои Раиси шаҳри Хуҷанд таъғироти кадриро баъди муҳокима тасдиқ намуданд.
Иттилоъ дода шуд, ки муассисаи давлатии гимназияи №1-и шаҳри Хуҷанд ба номи Раҳим Ҷалил, муассисаи таҳсилоти миёнаи умумии №20-и шаҳри Хуҷанд ба номи Маҳмудхоҷа Беҳбудӣ аз кўчаи навбунёди маҳаллаи 15-и шаҳри Хуҷанд ба номи шоира Норинисо Алимуҳаммад, гузоштани лавҳаи хотиравии Қаҳҳор Махкамов ба суроғаи маҳаллаи Содирхон Ҳофиз, кўчаи Мансур Акрамов, ҳавлии №78 Ҳамчунин истгоҳҳои аз нав сохташаванда дар шаҳр номгузорӣ карда шуданд.Номи кўчаи байни микроноҳияи 8-12 ба номи Усмон Қосимов иваз карда шуд.
Дар ҷараёни кори иҷлосия муовини Раиси вилояти Суғд Анвар Яқубӣ иштирок ва суханронӣ намуд. Анвар Яъқубӣ аз вакилон даъват ба амал овард, ки ҷиҳати сазовор пешвоз гирифтани 30 солагии Истиқлолияти давлатии Ҷумҳурии Тоҷикистон саҳмгузорӣ намуда, барои рушду нумуъи шаҳри бостонии Хуҷанд ҳиссаи арзандаи хешро гузоранд.
Бо садо додани Суруди миллӣ ба кори иҷлосияи ҳусни анҷом бахшида шуд.
Дафтари матбуоти
Раиси шаҳри Хуҷанд
