20 Ноябр 2018
19 ноябри соли 2018 дар Кохи фарҳанги «Суғдиён» - и маркази вилоят ҳамоиши гирандагони стипендияи Президенти Ҷумҳурии Тоҷикистон таҳти унвони “Ҷавонон – пайрави Пешвои миллат” бо иштироки Раиси вилояти Суғд Раҷаббой Аҳмадзода ва раиси Кумитаи ҷавонон ва варзиши назди Ҳукумати Ҷумҳурии Тоҷикистон Адҳам Абдуллозода баргузор гардид.
Дар ҳамоиш xавонони саодатманди диёр, устодону муҳассилини муассисаҳои таҳсилоти олӣ ва миёнаи умумии вилоят ва аҳли зиёи вилоят иштирок намуданд.
Дар чорабинии мутантан Раиси вилояти Суғд Раҷаббой Аҳмадзода суханронӣ намуда, аз ҷумла изҳор дошт, ки дастгирии ҷавонон ва ғамхорӣ нисбати онҳо дар меҳвари сиёсати давлату Ҳукумати кишвар ҷойгоҳи муҳимро касб карда, Ҳукумати Тоҷикистони соҳибистиқлол пайваста ба татбиқи сиёсати ҷавонон аҳамияти хоса зоҳир менамояд.
- Дар ин айёми пурсафо ҳамаи мо дар рўзҳое қарор дорем, ки дар Тоҷикистони соҳибистиқлол рўйдоди муҳиму тақдирсоз ба вуқўъ пайваста, қадами устуворе барои расидан ба истиқлолияти комили энергетикӣ гузошта шуд. Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вазъияти тантанавӣ агрегати якуми Нерўгоҳи барқи обии «Роғун»-ро ба кор дароварданд ва ба фаъолияти ин иншооти бузурги аср, ки ба рушду тараққиёти кишвар мусоидат хоҳад кард, оғоз бахшиданд, - зикр дошт Раиси вилоят Раҷаббой Аҳмадзода.
Дар ҳамоиш раиси Кумитаи ҷавонон ва варзиши назди Ҳукумати Ҷумҳурии Тоҷикистон Адҳам Абдуллозода низ суханронӣ намуда, аз нақши шоистаи ҷавонон дар ҷомеаи муосир, дастгириҳои беназири Пешвои миллат ва татбиқи Барномаҳо ва Стратегияҳои соҳавӣ ҳарф зад.
Мавсуф таъкид дошт, ки ҷавонони ватандўсти диёр чун ворисони арзандаи ниёгони шарафманди хеш баҳри пешрафту шукуфоии Тоҷикистони азиз, садоқатмандона хидмат намуда, бо ташаббусҳои наҷиб, талошҳои пайгирона, дастовардҳои фикриву эҷодӣ ва варзишӣ ҳамчун намояндаи ҳақиқии насли нави фардосози тоҷик барои афзоишу таҳкими нуфуз ва эътибори Ватани азизу маҳбуби хеш саҳми муносиб хоҳанд гузошт.
Сипас, дар вазъияти тантанавӣ Раиси вилояти Суғд Раҷаббой Аҳмадзода ва раиси Кумитаи ҷавонон ва варзиши назди Ҳукумати Ҷумҳурии Тоҷикистон Адҳам Абдуллозода ба ҷавонони боистеъдод стипендияи Президенти Ҷумҳурии Тоҷикистонро тақдим доштанд.
Дар фарҷом барномаи рангини фарҳангӣ ба аҳли ҳамоиш пешниҳод гардид, ки муҳтавои он саршор аз мавзуъҳои ватандӯстӣ, ифтихор аз Тоҷикистони соҳибистиқлол ва дунёи рангини ҷавонӣ буд.
Ҷоиз ба зикр аст, ки аз шаҳри Хуҷанд 7 нафар ба гирифтани стипендияи Президенти Ҷумҳурии Тоҷикистон дар соли хониши 2018-2019 шарафёб гардиданд.
Дафтари матбуоти
Раиси шаҳри Хуҷанд
