Маъруф Муҳаммадзода дар Рӯзи шаҳри Хуҷанд ба 40 ҳунарманд грант дод

24 Сентябрь 2018

Чанд лаҳза пеш дар толори Мақомоти иҷроияи ҳокимияти давлатии шаҳри Хуҷанд аз тарафи Раиси шаҳри Хуҷанд Маъруф Муҳаммадзода ба 40 нафар ҳунармандоне, ки дар озмуни Гранти Раиси шаҳр ғолиб омада буданд, Гувоҳнома ва маблағҳои пулӣ тақдим карда шуд.

Раиси шаҳри Хуҷанд Маъруф Муњаммадзода зимни суханронии худ таъкид дошт, ки Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар сиёсати фарҳангпарваронаи хеш ба масъалаи ҳунармандӣ ва рушди он диққати ҷиддӣ дода, борҳо таъкид намудаанд, ки гузаштагони мо аз замонҳои хеле қадим ба ҳунармандӣ ва косибӣ шуғл дошта, дар тӯли асрҳои зиёд ҷиҳати эҷоди садҳо навъи ҳунар роҳ кушодаанд. Кулолгарӣ, заргарӣ, матоъбофӣ, читгарӣ, намадбофӣ, бурёбофӣ, алочабофӣ, қуроқдӯзӣ, зардӯзӣ, сӯзанӣ, истеҳсоли маҳсулоти дастии гачкорӣ ё сафоливу шишагӣ аз ҷумлаи ҳунарҳои аҷдодии миллати тоҷик маҳсуб меёбанд. Либосҳои миллии духтарони атласу адраспӯш ки ҳар нақшу нигори он бозгӯи таъриху тамаддуни оламшумули миллати тоҷиканд, боиси ифтихору саодатмандии мост. Эълон гардидани соли 2018 «Соли рушди сайёҳӣ ва ҳунарҳои мардумӣ» таваҷҷуҳи дигар ба рушди ҳунармандӣ арзёбӣ мегардад.

Хушбахтона солҳои охир ҳунари ниёгон аз нав эҳё шуда, чевариву чакандӯзӣ миёни бонувон маҳбубияти хос-са пайдо намуд ва имрӯз чун намунаи барҷастаи мероси моддиву маънавии халқи тоҷик ба шумор мераванд. Таваҷҷуҳи доимии Раиси вилояти Суғд, муовини аввали Раиси Маҷлиси миллии Маҷлиси Олии Ҷумҳурии Тоҷикистон муҳтарам Раҷаббой Аҳмадзода ба рушди ҳунарҳои мардумӣ ва эҳёи корхонаҳои саноатии истеҳсоли атласу адрас боиси фарогирии истеҳсолоти ҳунармандон шуда истодааст. Хуҷанди бостонӣ яке аз шаҳрҳои қадимтарини Осиёи Марказӣ буда, таъриху тамаддун, адабу фарҳанги дерина дорад ва тайи асрҳои зиёд дар ҳаёти иқтисодиву иҷтимоӣ ва маънавию фарҳангии минтақа нақши муассир бозидааст. Номи Хуҷанд дар сарчашмаҳои куҳани таърихӣ дар қатори бузургтарин шаҳрҳои минтақаи Осиёи Марказӣ зикр гардидааст.

Иттилоъ дода шуд, ки дар оғози соли ҷорӣ Қарори Раиси шаҳри Хуҷанд «Дар бораи таъсис ва ҷудо намудани грантҳои Раиси шаҳр оид ба дастгирӣ ва рушди фаъолияти соҳибкории занони ҳунарманд ва эҷодкор барои соли 2018» ба тавсиб расида буд. Мутобиқи ин қарор дар соли 2018-ум 40 гранти Раиси шаҳр барои дастгирӣ ва рушди фаъолияти соҳибкории занони ҳунарманд ва эҷодкор таъсис дода шудаанд, аз ҷумла: 5 грант дар ҳаҷми 8000 сомонӣ; 10 грант дар ҳаҷми 5000 сомонӣ ва 25 грант дар ҳаҷми 3000 сомонӣ, ки маҷмуъан 165 ҳазор сомониро ташкил медиҳад. Баҳри амалӣ намудани ин қарор шуъбаи кор бо занон ва оила, бахшҳои сармоягузорӣ ва идораи амволи давлатӣ, ҷавонон ва варзиши мақомоти иҷроияи ҳокимияти давлатии шаҳр ва дигар сохторҳои марбута муваззаф гардидаанд, ки ҷиҳати дар сатҳи зарурӣ ба роҳ мондани чорабиниҳои ташкиливу ҳуқуқӣ, техникӣ, иттилоотӣ ва тарғиботию ташвиқотии грантҳои Раиси шаҳр оид ба дастгирӣ ва рушди фаъолияти соҳибкории занони ҳунарманд ва эҷодкор барои соли 2018 тадбирҳои зарурӣ андеша ва он ҳама дар сатҳи баланд ташкил гардид. Ва ба озмун беш аз 60 нафар ҳунармандон иштирок намуданд.Ёдовар мешавем, ки маблағи гранти Раиси шаҳр барои занони ҳунарманд соли гузашта 65 (шасту панҷ) ҳазор сомониро ташкил медод ва имсол беш аз 100 (сад) ҳазор сомонӣ афзудааст.

Сипас аз тарафи Раиси шаҳри Хуҷанд Маъруф Муњаммадзода ба 40 нафар барандагони гранти Раиси шаҳри Хуҷанд ҷоизаҳоро тақдим карда шуд.

Ҷоиз ба зикр аст, ки чорабинии мазкур дар доираи тантанаҳои Рӯзи шаҳри Хуҷанд баргузор гардид.

Дафтари матбуоти
Раиси шаҳри Хуҷанд