06 Сентябр 2018
Дар толори Мақомоти иҷроияи ҳокимияти давлатии шаҳри Хуҷанд таҳти раёсати Раиси шаҳри Хуҷанд Маъруф Муҳаммадзода бо иштироки муовини якуми Раиси шаҳр, муовинони Раиси шаҳр, мудирони шуъбаву воҳидҳои сохторӣ ва идораҳои зертобеъи шаҳр ҷаласаи васеъи корӣ баргузор гардид.
Раиси шаҳри Хуҷанд Маъруф Муҳаммадзода зимни муаррифӣ ва вазифагузории кадрҳои тозатаъин, аз эшон даъват ба амал овард, ки баҳри содиқона хизмат намудан ба халқу миллат, Президенти мамлакат муҳтарам Эмомалӣ Раҳмон ва бо саҳмгузорӣ ба ободонию созандагӣ дар шаҳр саъю талош варзанд.
Сипас, дар назди ҳозирин муовини аввали Раиси шаҳри Хуҷанд Хайрулло Ғайбуллозода, муовинони Раиси шаҳр Фирӯза Нуруллозода, Ҷамшед Абдуқаюмзода ва Аюб Раҳматзода доир ба корҳои анҷомёфта ва иҷрои дастуру супоришҳои дар ҷаласаҳои қаблӣ зикргардида маълумоти муфассал ироа намуданд.
Зикр гардид, ки дар самти саноатикунонии кишвар корхонаҳои истеҳсолии шаҳр пурмаҳсул фаъолияти худро ба роҳ монда, аз ҷониби онҳо ба маблағи 603,7 млн. сомонӣ маҳсулот истеҳсол карда шудааст, ки он дар муқоиса ба ҳамин давраи соли сипаригашта 13,1 дар сад афзоиш ёфтааст. Аз ин миқдор маҳсулот ба маблағи 111,9 млн. сомонӣ ба хориҷи кишвар содир карда шудааст, ки он нисбатан 35,8 фоиз ё 29,5 млн. сомонӣ зиёд мебошад. Ҷиҳати ноил шудан ба ин нишондиҳанда таъсис дода шудани 8 адад корхонаҳои нави истеҳсолии хурду миёна ва ба 161 адад расидани теъдоди корхонаҳо мусоидат ва замина гузоштанд. Инчунин дар ин марҳила 15 адад корхонаҳое, ки қаблан аз фаъолият бозмонда буданд, дар натиҷаи андешидани чораҳои судманд ба истеҳсолот оғоз намуда, аз тарафи онҳо ба маблағи 2376,6 ҳазор сомонӣ маҳсулот истеҳсол карда шудааст. Дар ҳамаи соҳаҳои хоҷагии халқ тибқи маълумоти расмӣ зиёда аз 1591 адад (бо назардошти фаъолияти соҳибкорӣ) ҷойи кории нав таъсис ёфта, музди миёнаи маоши кормандон ба 1306,22 сомонӣ баробар шуд. Ин нишондиҳанда нисбат ба ҳамин давраи соли сипаригашта, 70,98 сомонӣ афзуда, нафақаи миёна бошад, 341,3 сомониро ташкил медиҳад. Дар натиҷаи тадбирҳои андешидашуда, иҷрои нақшаи буҷети умумӣ 102,2 фоиз таъмин гардид, ки он аз нақшаи пешбинишуда 4,7 млн. сомонӣ зиёд маблағ ворид гардидааст. Бақияи қарзи андоз бошад, нисбат ба аввали сол 2,8 млн. сомонӣ ё 12,0 дар сад кам шудааст.
Иттилоъ дода шуд, ки аз ҳисоби ба кор андохтани механизми шарикии рушд тавассути ҳамкориҳои давлатӣ ва соҳибкорӣ то имрӯз 17,4 млн. доллари амрикоӣ сармояҳои дохилию хориҷӣ ҷалб карда шудааст, ки он нисбат ба ҳамин давраи соли сипаригашта 4,8 дар сад ё 0,8 млн. доллари амрикоӣ афзоиш ёфтааст.
Таъкид шуд, ки дар самти бунёдкорию созандагӣ ҳаҷми маблағгузории асосӣ дар соҳаи сохтмон ба 108,5 млн. сомонӣ ва фондҳои асосӣ 92,1 млн. сомонӣ расида, он дар муқоиса бо ҳамин давраи соли гузашта мутаносибан 33,0 дар сад ва 1,9 маротиба зиёд шудааст. Аз тарафи корхонаҳои пудратии шаҳр бошад, ба маблағи 108,9 млн. сомонӣ корҳо ба анҷом расонида шуданд, ки он нисбат ба ҳамин давраи соли 2017 ба маблағи 22,8 млн. сомонӣ ё 26,6 дар сад афзоиш ёфтааст.
Дар майдонҳои ҳудуди шаҳр зиёда аз 4,8 ҳазор адад дарахтони ороишии сояафкан ва ҳамешасабз, зиёда аз 710,0 ҳазор дона гулҳои ҳархелаи ороишӣ, 62,4 ҳазор адад буттагули садбарг, 64,5 ҳазор адад карнайгул шинонида шуда, таҳти нигоҳубин қарор дорад. Илова бар ин, дар кӯчаҳои Раҳим Ҷалил, Султон Умаров ва дигар кӯчаҳои марказӣ 30 адад сипар (ситиформатҳои замонавӣ) насб карда шудааст. Тибқи нақшаи тасдиқшуда соли ҷорӣ 32,5 км таъмири роҳҳои автомобилгард ба нақша гирифта шуда, то имрӯз зиёда аз 26,0 км роҳҳо асфалтпӯш карда шуда, корҳо дар ин самт тақвият меёбанд.
Ҷиҳати тақвияти соҳаи маориф низ чораҳои амалӣ андешида шуда, то имрӯз дар ҳамаи 48 адад муассисаҳои таҳсилоти умумӣ корҳои таъмирӣ ва муҷаҳҳазгардонӣ ба анҷом расонида шуд.
Раиси шаҳри Хуҷанд Маъруф Муҳаммадзода ҷиҳати иҷрои супоришҳои қабландодашуда аз масъулин пурсиш ба амал оварда, барои ислоҳи камбудиҳои мавҷуда муҳлат дод.
Маъруф Муҳаммадзода зимни вазифагузорӣ аз роҳбарон ва масъулини дахлдор даъват ба амал овард, ки баҳри иҷрои босифати нақша-чорабиниҳои 30 солагии Истиқллияти давлатии Ҷумҳурии Тоҷикистон ҷиҳати равнақ бахшидани корҳо созандагию бунёдкорӣ фаъолияти хешро тақвият бахшанд.
Изҳори боварӣ карда шуд, ки кулли сокинони шаҳри бостонии Хуҷанд бо рӯҳияи созанда ҷиҳати татбиқи муҳтавои Паёми навбатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва дастуру супоришҳои Раиси вилояти Суғд Раҷаббой Аҳмадзода корҳои ободониву созандагиро бо заҳмати софдилона ҷоннок намуда, баҳри пурмаҳсулии соли эълонгардидаи “Рушди сайёҳӣ ва ҳунарҳои мардумӣ” ва сазовор истиқбол гирифтани ҷашни 30-солагии Истиқлолияти давлатии Ҷумҳурии Тоҷикистон саҳми арзишманд мегузоранд.
Дафтари матбуоти
Раиси шаҳри Хуҷанд
