05 Июнь 2018
Дар раванди сиёсии ҷомеа ва дар пешравии он нақши мафкура ва шуури сиёсӣ аҳамияти муҳим дорад. Тавре маълум аст, дар Тоҷикистон ҳизбҳои гуногун фаъолият доранд ва ҳар кадоми онҳо ба худ хос мафкура дошта, онро тарғиб месозанд.
Раванди имрӯза талаб менамояд, мафкураи ҳамаи ҳизбҳои сиёсӣ бояд ҳаракатери солим дошта,он ба манфиати ҷомеа хизмат намояд.
Алалхусус дар замони пуртазод, бархӯрди таммадунҳо ҷараёнҳои экстремистӣ мехоҳанд, ба доми худ ҷавонони гумроҳро шомил намояд. Аз ин раванд ҷавонони минтақаи Осиёи Марказӣ низ дар канор нестанд. Мисоли равшани онро мо дар иштироки ҷавонон дар набардҳои Сурияву Ироқ бараъло мебинем. Маҳз пайдоиши ба ном «Давлати исломӣ» имрӯзҳо ҳазорҳо нафар шаҳрвандони на танҳо Тоҷикистон, балки тамоми минтақаробадомихудкашидаистодааст. Дарин ҷода бояд корҳои фаҳмондадиҳӣ дар байни шаҳрвандон ҷоннок карда шавад, то ки ингуна зуҳуроти номатлуб аз ҷомеа барканор шавад. Вале таҳлилҳо нишон медиҳад, ки сол ба сол сафи ҷавонони ноогоҳ зиёд гашта истодааст. Тибқи изҳороти расмии мақомоти ҳифзи ҳуқуқи мамлакат имрӯзҳо ҳазорҳо нафар шаҳрвандон дар низоъҳои Шарқи Наздик ва сафи ба ном «Хилофати исломӣ» бар муқобили реҷими давлатӣ дар Сурия, Яман, Ливиё ва Ироқи штирок доранд. Аз рӯи таҳлилҳо аксари нафарони дар Сурияву Ироқ ҷанганда то 35 – сола ва аз он ҳам ҷавонтар ҳастанд. Ин бори дигар гувоҳи он аст, ки имрӯз бояд тамоми аҳли ҷомеа бар муқобили ингуна зуҳурот, тафаккури иртиҷоӣ дошта муборизаи беамон барад. Аз сухан бояд ба амал гузашт, то фардо дер нагардад. Бояд мақомоти дахлдори соҳавӣ аз рӯи барномаҳои мушаххас тамоми шаҳрвандони мамлакатро ва пеш аз ҳама ҷавонону наврасонро аз симои разили гурӯҳҳои тундрав огоҳ намоянд. Дини поки исломро аз ҳаргуна сиёҳкориву палидиҳо пок созанд. Исломи суннатиро, ки қарнҳо инҷониб бобоёну падарони мо мепарастиданд, фаҳмонанд ва дини мубинро аз сиёсати разилу иртиҷоӣ фарқ намоянд. Зеро дар он ҷомеае, ки дин мавриди сиёсишавӣ қарор мегирад, он дини созанда неву балки сӯзанда мегардад. Мисоли равшани онро дар давлати ҳамсояи мо – Ҷумҳурии исломии Афғонистон мебинем, ки солиёни зиёд вазъияти ҷангӣ доманадор аст. Аллома Иқбол гуфта аст:Ислом дар зоти худ надорад айбе,
Ҳар айбе ки ҳаст, дар мусулмонии мост.
Равандҳои бузурги геополитикӣ мамлакати кӯчаки моро низ дар канор монда наметавонад. Сентябри соли 2015 як гурӯҳи муайян хостанд дар Тоҷикистон низ ҷанг сар занад ва бо роҳбарии бевоситаи размандаи Иттиҳоди нерӯҳои мухолифини тоҷик, собиқ муовини вазири мудофиаи мамлакат генерал – майор Ҳоҷӣ Ҳалим Назарзода ба табаддулоти давлатӣ даст заданд, вале ба мақсади нопоки худ нарасиданд. Тибқи баёноти расмии мақомоти ҳифзи ҳуқуқ дар сари ин ҳама амалҳои нопок раиси ҲНИТ М.Кабирӣ меистад. ҲНИТ аз замони таъсисаш барои бунёди ҷомеаи исломӣ, ба монанди Афғонистону Сурия ва Ироқ, кӯшиш кард. Аммо тираш хок хӯрд. Ин вазъи номатлуб бори дигар моро ба зиракиву ҳушёрӣ водор месозад.
Дар натиҷаи ҳамин мафкураю шуури сиёсӣ дар солҳои ҷанги бародаркуш ғояи ташкил кардани давлати исломӣ дар ҷумҳурӣ аз тарафи ҲНИТ тарғиб карда мешуд ва он аз тарафи аъзоёни ҳизб ва ҷонибдорони онҳо дастгирӣ меёфт.
Пас аз имзои Созишномаи сулҳи тоҷикон ҲНИТ барои сиёсинамоии мафкураи динӣ аҳамияти ҷиддӣ дода, онро пурзӯр мекард.
Дар натиҷа дар бисёр минтақаҳои ҷумҳурӣ фаъолияти аъзоёни ҳизб ва домуллоҳои чаласавод пурзӯргар дида, ба таври ғайриқонунӣ мактабҳои динию масҷидҳо ташкил медоданд.
Тавре маълум аст, дар ҷумҳурӣ ба гирифтани донишҳои динӣ аз тарафи ҳукумат тамоми шароитҳо фароҳам оварда шудааст. Пӯшидани сатру аврат ва мондани ришҳои дарози дилгиркунандаву безеб ба либоси миллию анъанаҳои давлатдории тоҷикон мухолифат менамояд.
Дар натиҷаи дастгирии ҲНИТ зиёда аз 500 нафар ҷавонони тоҷик дар сафҳои ҷангиёни ДИИШ бамуқобили Сурия меҷангиданд.
Фаъолияти хоинонаву ғайриқонунии ин ҳизб бар хилофи Конститутсия ва дигар қонунҳои давлат ба шумор рафта, аз характери экстремистию террористии ҲНИТ шаҳодат медиҳад.
Ҷомеаи демократӣ волоияти қонун ва риояи онро аз ҳамаи ҳизбу ҳаракатҳо талаб менамояд.
Баста шудани фаъолияти ҲНИТ бо қорори Суди Олии Тоҷикистон минбаъд барои пешгирӣ кардани фаъолияти ифротгароӣ ва босиёсат омезиш додани динро пешгирӣ намуда,ҷомеаро дар руҳияи арзишҳои солими қонунию динӣ тарбия менамояд.
Ҳар шаҳрванди ҷумҳуриро зарур аст, ватандӯсту худогоҳ бошанд, дар ягон ҳолат бетарафӣ набояд кард. Нагузорем, ки нафарони нохалаф майнаи ҷавонони моро бо ғояҳои ифротгароёнаи худ пур намоянд. Ба ҳар як ҳуҷуми ин гуна гурӯҳҳои экстремистӣ аслиҳа дошта бошем ва зиракиву ҳушёрии сиёсиро аз даст надиҳем ва дар гирди давлат ва Пешвои миллат муттаҳид гардем .
Ҳотамҷон Фаттоев, мудири кафедраи таърих
ва ҷомеашиносии Коллеҷи омӯзгории шаҳри Хуҷанд
